ಕುಮಟಗಿ ಗ್ರಾಮದ ಸಿಂದಗಿ ರಸ್ತೆಯಲ್ಲಿ ಉದ್ಯಮಿಗಳಾದ ಪಿ.ಕೆ. ಚಿಂಚಲಿ, ಸಿದ್ದಯ್ಯ ಮಠ, ಮಲ್ಲಿಕಾರ್ಜುನ ಬಿಜ್ಜರಗಿ ಹಾಗೂ ಸುರೇಶ ಪರಗೊಂಡ ಎಂಬುವರು ಸ್ವಯಂ ಚಾಲಿತ ರೇಷ್ಮೆ ನೂಲು ಬಿಚ್ಚಣಿಕೆ ಘಟಕ ಸ್ಥಾಪಿಸಿದ್ದಾರೆ. ರೈತರ ಜಮೀನಿನಿಂದ ಬರುವ ರೇಷ್ಮೆ ಗೂಡುಗಳನ್ನು ವಿಂಗಡಿಸಿ, ಸ್ವಚ್ಛಗೊಳಿಸಿ ಬಳಿಕ ವಿವಿಧ ಹಂತಗಳಲ್ಲಿ ರೇಷ್ಮೇ ನೂಲು ತೆಗೆಯುವ ಪ್ರಕ್ರಿಯೆ ನಡೆದಿದೆ. ಉತ್ಪಾದಿತ ಗ್ರೇಡ್-ಎ ಮಾದರಿಯ ರೇಷ್ಮೆ ನೂಲುಗಳನ್ನು ರಾಜ್ಯದ ಬೆಂಗಳೂರು ಹಾಗೂ ಪಶ್ಚಿಮ ಬಂಗಾಳ, ಆಸ್ಸಾಂ ರಾಜ್ಯಗಳಿಗೆ ರಫ್ತು ಮಾಡಲಾಗುತ್ತಿದೆ. ಈ ಮೊದಲು ರೇಷ್ಮೆ ನೂಲು ತೆಗೆಯಲು ರಾಮನಗರವನ್ನೇ ನೆಚ್ಚಿಕೊಂಡಿದ್ದ ಜಿಲ್ಲೆಯ ರೇಷ್ಮೆ ಬೆಳೆಗಾರರಿಗೆ ಇದೀಗ ಈ ಘಟಕ ವರವಾಗಿದೆ.
