ಚಿಕ್ಕಬಳ್ಳಾಪುರ ಎಂದಾಕ್ಷಣ ದ್ರಾಕ್ಷಿ, ತರಕಾರಿ, ಹೂವಿನ ಬೆಳೆ ನೆನಪಾಗುತ್ತದೆ. ಇದರ ನಡುವೆ ಗುಡಿಬಂಡೆ ತಾಲೂಕಿನ ರೈತರೊಬ್ಬರು ಖರ್ಜೂರ ಬೆಳೆದು ಇತರರಿಗೆ ಮಾದರಿಯಾಗಿದ್ದಾರೆ. ಗುಡಿಬಂಡೆ ತಾಲೂಕು ಹಂಪಸಂದ್ರ ಗ್ರಾಮದ ಪ್ರಗತಿಪರ ರೈತ ಲಕ್ಷ್ಮೀನಾರಾಯಣ ಜಿಲ್ಲೆಯಲ್ಲಿ ಮೊದಲ ಬಾರಿಗೆ ನೂತನ ಪ್ರಯೋಗ ನಡೆಸಿ ಯಶಸ್ಸು ಕಂಡಿದ್ದಾರೆ. 4 ಎಕರೆ ಜಮೀನಿನಲ್ಲಿ ಟೊಮ್ಯಾಟೊ ಬೆಳೆಯುತ್ತಿದ್ದ ಇವರು ಬೆಲೆ ಸಿಗದೆ, ಮಾವು, ಸಪೋಟ ತೋಟ ಮಾಡಿದ್ದರು. ಅದರಲ್ಲೂ ನಿರೀಕ್ಷಿತ ಲಾಭ ಕಾಣದೆೆ ನಷ್ಟ ಅನುಭವಿಸಿದ್ದರು. ಈ ನಡುವೆ ಏನಾದರೂ ನೂತನ ಪ್ರಯೋಗ ಮಾಡಬೇಕೆಂದು ಯೋಚಿಸಿ ಖರ್ಜೂರ ಬೆಳೆಯನ್ನು ಬೆಳೆದಿದ್ದಾರೆ. ಗ್ರಾಪಂ ಅಧ್ಯಕ್ಷ ರೂ ಆಗಿರುವ ಲಕ್ಷ್ಮೀನಾರಾಯಣ, ಉಷ್ಣವಲಯದಲ್ಲಿ ಬೆಳೆಯುವ ಖರ್ಜೂರ ತಳಿ ಬಗ್ಗೆ ತಮಿಳುನಾಡಿನ ವ್ಯಕ್ತಿಯೊಬ್ಬರಿಂದ ಮಾಹಿತಿ ಪಡೆದುಕೊಂಡು, ಅವರ ಮೂಲಕವೇ ಕುವೈತ್ನಿಂದ ಸಸಿ ತರಿಸಿ ತಮ್ಮ ಹೊಲದಲ್ಲಿ ನಾಟಿ ಮಾಡಿದ್ದಾರೆ. ನಾಲ್ಕು ಎಕರೆ ಜಾಗದಲ್ಲಿ 260 ಗಿಡಗಳಿದ್ದು, ಅದರಲ್ಲಿ ಸದ್ಯ ಕೆಲವು ಫಸಲು ಬಿಟ್ಟಿವೆ. ತೋಟದಲ್ಲೇ 1 ಕೆ.ಜಿ ಖರ್ಜೂರವನ್ನು 250 ರೂ. ಗೆ ಮಾರಾಟ ಮಾಡುತ್ತಿದ್ದಾರೆೆ.
