ಮೋದಿ ಅನೇಕ ಬಾರಿ ತಾಯಿ ಕುರಿತಂತೆ ಹೇಳುತ್ತಾ ಗದ್ಗದಿತರಾದದ್ದಿದೆ. ಆಕೆಯ ಗುಣಗಾನ ಮಾಡುವ ಸಂದರ್ಭವನ್ನು ಅವರೆಂದಿಗೂ ಬಿಟ್ಟುಕೊಟ್ಟಿಲ್ಲ. ಅಧಿಕಾರ ಹಿಡಿಯುವಾಗ ‘ಎಂದೂ ಲಂಚಕ್ಕೆ ಕೈ ಒಡ್ಡಬೇಡ’ ಎಂದು ತಾಯಿ ಹೇಳಿದ್ದನ್ನು ಅವರು ಅನೇಕ ವೇದಿಕೆಗಳಲ್ಲಿ ಹಂಚಿಕೊಂಡಿದ್ದಾರೆ. ವಿದೇಶದ ಸಂದರ್ಶನವೊಂದರಲ್ಲಂತೂ ತಾಯಿಯ ಕುರಿತಂತೆ ಹೇಳುತ್ತಾ ಉಮ್ಮಳಿಸಿಬರುವ ದುಃಖ ತಡೆಯಲು ಅವರು ಮಾಡಿದ ಪ್ರಯತ್ನವನ್ನು ಇಂದಿಗೂ ಯುಟ್ಯೂಬ್ಗಳಲ್ಲಿ ನೋಡಬಹುದು. ಹೀಗಾಗಿಯೇ ತಾಯಿಯನ್ನು ಕಳಕೊಂಡ ದುಃಖ ಮೋದಿಯವರಿಗೆ ಶಾಶ್ವತವಾದ್ದು. ಆದರೆ ಅದನ್ನು ಅವರು ಸ್ವೀಕರಿಸಿದ ರೀತಿ ಇತ್ತಲ್ಲ ಅದು ಮಾತ್ರ ಮಾರ್ಗದರ್ಶಿ. ವಿಚಾರ ತಿಳಿದ ಕೆಲವು ಗಂಟೆಗಳಲ್ಲೇ ಅಂತ್ಯಸಂಸ್ಕಾರವನ್ನೂ ಮಾಡಿಮುಗಿಸಿ, ದೇಶಕ್ಕೊಂದು ಸಮರ್ಥ ಸಂದೇಶ ಕಳಿಸಿದರು. ಯಾವ ಗೌಜು-ಗದ್ದಲವಿರಲಿಲ್ಲ, ಆಡಂಬರವೂ ಇರಲಿಲ್ಲ. ತಾಯಿಯ ಶವಯಾತ್ರೆಗೆ ಬಂದು, ತನ್ನನ್ನು ಪ್ರಭಾವಗೊಳಿಸುವ ಯಾವ ಅವಕಾಶವನ್ನೂ ರಾಜಕಾರಣದ ಬಕೆಟ್ಟುಗಳಿಗೆ ಅವರು ಕೊಡಲೇ ಇಲ್ಲ. ಅನೇಕರ ಟ್ವೀಟುಗಳಲ್ಲಿ ಮೋದಿಯವರನ್ನು ಹೊಗಳಿದ್ದಾರಲ್ಲ, ಅದರೊಡನೆ ಅವರೆದುರಿಗೆ ನಿಲ್ಲುವ ಅವಕಾಶವೊಂದು ತಪ್ಪಿಹೋಯ್ತಲ್ಲ ಎಂಬ ಚಿಂತೆಯೂ ಇದ್ದಂತಿತ್ತು! ಹಾಗೆಯೇ ಸುಮ್ಮನೆ ಊಹಿಸಿ ನೋಡಿ, ಹೀರಾಬೆನ್ರ ಅಂತಿಮ ದರ್ಶನಕ್ಕೆ ಅವಕಾಶವಿದ್ದಿದ್ದರೆ ಯಾರ್ಯಾರು ಅಲ್ಲಿ ಹಾಜರಿರುತ್ತಿದ್ದರು ಅಂತ. ನಿಸ್ಸಂಶಯವಾಗಿ ಭಾಜಪದ ರಾಷ್ಟ್ರ, ರಾಜ್ಯ ನಾಯಕರುಗಳಲ್ಲದೇ ಕೊನೆಗೆ ಈ ಬಾರಿಯ ವಿಧಾನಸಭೆಯ ಟಿಕೆಟ್ ಆಕಾಂಕ್ಷಿಯೂ ನಿಂತಿರುತ್ತಿದ್ದ. ಮತ್ತು ಆ ಮಹಾತಾಯಿಯ ಶವದೊಂದಿಗೆ ತನ್ನದೊಂದು ಸೆಲ್ಪಿ ಹಾಕಿಕೊಂಡು ಸಾಧ್ಯವಾದರೆ ಎಂಟ್ಹತ್ತು ಚಿತ್ರಗಳ ಒಂದು ಫೈಲ್ ಮಾಡಿಕೊಂಡು ಸಂಘ ಕಾರ್ಯಾಲಯದೆದುರು ನಿಂತುಬಿಡುತ್ತಿದ್ದ. ಈ ಕಾರಣಕ್ಕಾದರೂ ಟಿಕೆಟು ಕೊಡಲಿ ಅಂತ. ಈ ಹೊಲಸಿಗೆ ಆ ಪುಣ್ಯಾತ್ಮ ಅವಕಾಶವನ್ನೇ ಕೊಡಲಿಲ್ಲ!
