ಇಷ್ಟಾಗಿಯೂ, ಕಬ್ಬಿಣದ ಪರದೆಯೊಳಗಿದ್ದ ಸೋವಿಯೆತ್ ಯೂನಿಯನ್ ಜಗತ್ತಿಗೆ ಸುಳ್ಳು ಅಂಕಿಅಂಶಗಳನ್ನು ನೀಡುತ್ತಾ ತನ್ನೊಳಗೆ ಎಲ್ಲವೂ ಸರಿಯಿದೆ ಎಂದು ನಾಟಕವಾಡುತ್ತಾ ವರ್ಷವರ್ಷಗಳನ್ನು ಕಳೆದುಬಿಟ್ಟಿತ್ತು. ಇದನ್ನು ಬದಲಾಯಿಸಲು, ತನ್ನ ಜನರಿಗೆ ನಿಜವಾಗಿಯೂ ಉತ್ತಮವೆನಿಸುವ ಬದುಕನ್ನು ನೀಡಲು ನಾಯಕನೊಬ್ಬ ಅವತರಿಸಲೇಬೇಕಾಗಿತ್ತು. ಆ ಐತಿಹಾಸಿಕ ಜವಾಬ್ದಾರಿಗೆ ಹೆಗಲು ಕೊಟ್ಟದ್ದು ಮಿಖಾಯಿಲ್ ಗೋರ್ಬಚೆವ್. ‘ಹೊರಜಗತ್ತಿಗೆ ಸುಳ್ಳು ಹೇಳುವುದರಿಂದ ನಮ್ಮ ಪರಿಸ್ಥಿತಿಯೇನೂ ಉತ್ತಮಗೊಳ್ಳುವುದಿಲ್ಲ. ಅದು ನಿಜವಾಗಿಯೂ ಉತ್ತಮಗೊಳ್ಳುವುದು ನಾವು ವಾಸ್ತವವನ್ನು ಒಪ್ಪಿಕೊಂಡು ಅಗತ್ಯ ಪರಿಹಾರಾತ್ಮಕ ಕಾರ್ಯಯೋಜನೆಗಳನ್ನು ರೂಪಿಸಿ ಅನುಷ್ಠಾನಗೊಳಿಸುವುದರಿಂದ ಮಾತ್ರ’ ಎಂದು ಹೇಳಿದ ಗೋರ್ಬಚೆವ್ ತಾವು ಬೇರೆಯೇ ಮಣ್ಣಿನಲ್ಲಿ ಮಾಡಿದ ನಾಯಕ ಎಂದು ಜಗತ್ತಿಗೇ ಸಾರಿದರು. ಮುಂದೆ ಘಟಿಸಿದ್ದು ಇತಿಹಾಸ. ರೋಗಪೀಡಿತ ಸೋವಿಯೆತ್ ವ್ಯವಸ್ಥೆಯನ್ನು ಸುಧಾರಿಸಲು ಗೋರ್ಬಚೆವ್ ಹಾಕಿಕೊಂಡದ್ದು ಮೂರು ಯೋಜನೆಗಳು- 1 ಸೋವಿಯೆತ್ ರಾಜಕೀಯ ವ್ಯವಸ್ಥೆಯಲ್ಲಿ ಪಾರದರ್ಶಕತೆ (Glasnost), ಆರ್ಥಿಕ ಕ್ಷೇತ್ರದಲ್ಲಿ ಪುನರ್ವ್ಯವಸ್ಥೆ(Perestroika), ಆಡಳಿತ ಕ್ಷೇತ್ರದಲ್ಲಿ ಪ್ರಜಾಪ್ರಭುತ್ವೀಕರಣ (Demokratizasia). ಅನಗತ್ಯವಾದ ಮಿಲಿಟರಿ ವೆಚ್ಚಗಳನ್ನು ಕಡಿತಗೊಳಿಸಿ ಆ ಹಣವನ್ನೆಲ್ಲಾ ಆರ್ಥಿಕ ಪ್ರಗತಿಗೆ ತೊಡಗಿಸಬೇಕು ಎಂದು ಗೋರ್ಬಚೆವ್ ರ್ತಸಿದ್ದು ಸರಿಯಾಗಿಯೇ ಇತ್ತು. ಆದರೆ ಪ್ರಮುಖ ವಿರೋಧಿಗಳೊಂದಿಗೆ ಸ್ನೇಹಸಂಬಂಧ ವೃದ್ಧಿಯಾಗದೇ ಅದು ಅಸಾಧ್ಯ ಎಂದೂ ಅವರು ಅರಿತಿದ್ದರು. ಹೀಗಾಗಿಯೇ ಅಧಿಕಾರದ ಪ್ರಾರಂಭದ ದಿನಗಳಿಂದಲೇ ಅವರು ಅಮೆರಿಕಾ ಮತ್ತು ಚೀನಾಗಳ ಜತೆ ಸಂಬಂಧ ಸುಧಾರಣೆಗೆ ತಮ್ಮ ಸರ್ಕಾರ ಸಿದ್ಧ ಎಂಬ ಸೂಚನೆಗಳನ್ನು ನೀಡತೊಡಗಿದರು. ಅಮೆರಿಕಾದಿಂದ ಬಂದದ್ದು ನಕಾರಾತ್ಮಕ ಪ್ರತಿಕ್ರಿಯೆ. ಸೋವಿಯೆತ್ ನಾಯಕನೊಬ್ಬ ವಿಶ್ವಶಾಂತಿಯ ಬಗ್ಗೆ ಮಾತಾಡುವುದನ್ನು ನಂಬಲು ತಾವು ತಯಾರಿಲ್ಲ ಎಂಬ ನಿಲುವನ್ನು ಅಧ್ಯಕ್ಷ ರೇಗನ್ ವ್ಯಕ್ತಪಡಿಸಿದ್ದು ನಾಟಕೀಯವಾಗಿ. ಆ ಮಾಜಿ ಹಾಲಿವುಡ್ ನಟ 1985ರಲ್ಲಿ ಪಶ್ಚಿಮ ಬರ್ಲಿನ್ಗೆ ಭೇಟಿ ನೀಡಿ, ಪೂರ್ವ-ಪಶ್ಚಿಮ ವಿಭಜನೆಯ ಸಂಕೇತವಾದ ಬರ್ಲಿನ್ ಗೋಡೆಯ ಮುಂದೆ ನಿಂತು ದನಿಯೆತ್ತರಿಸಿ ಕೂಗಿದ್ದು ಹೀಗೆ- ‘ಮಿಸ್ಟರ್ ಗೋರ್ಬಚೆವ್, ನಿಮಗೆ ವಿಶ್ವಶಾಂತಿಯ ಬಗ್ಗೆ ನಿಜವಾಗಿಯೂ ಕಾಳಜಿ ಇದ್ದರೆ ಶೀತಲ ಸಮರದ ಸಂಕೇತವಾದ ಈ ಗೋಡೆಯನ್ನು ಕೆಡವಿ.’
