ಇದೊಂದು ಜನಪದರಲ್ಲಿ ಪ್ರಚಲಿತವಿರುವ ರಾಮಾಯಣದ ಸನ್ನಿವೇಶ. ವನವಾಸದಿಂದ ರಾಮ, ಸೀತೆ, ಲಕ್ಷ್ಮಣ ಅಯೋಧ್ಯೆಗೆ ಹಿಂತಿರುಗಿದ್ದಾರೆ. ಶ್ರೀರಾಮನ ಪಾದುಕೆಯ ಸಾನಿಧ್ಯದಲ್ಲಿ ಹದಿನಾಲ್ಕು ವರ್ಷ ಅಯೋಧ್ಯೆಯನ್ನು ಆಳಿದ ಭರತ ಅಣ್ಣನಿಗೆ ರಾಜ್ಯ ಬಿಟ್ಟು ಕೊಟ್ಟ ಸಂದರ್ಭ. ರಾಜ್ಯಾಧಿಕಾರ ವಹಿಸಿಕೊಂಡ ರಾಮನಿಗೆ ರಾಜ್ಯದ ಖಾಲಿ ಭಂಡಾರ ನೋಡಿ ಗಾಬರಿಯಾಯಿತು. ಭರತನನ್ನು ಕುರಿತು ‘ಆದಾಯ ಎಲ್ಲಿ, ತೆರಿಗೆ ಸಂಗ್ರಹ ಆಗಲಿಲ್ಲವೇ?’ ಎಂದರೆ ‘ಅಯ್ಯೋ ಅಣ್ಣಾ! ನೀನು ಇರಲಿಲ್ಲವಲ್ಲ ಬೇಜಾರಾಗಿ ನಾನೂ ತೆರಿಗೆ ಬಗ್ಗೆ ತಲೆಕೆಡಿಸಿಕೊಳ್ಳಲಿಲ್ಲ, ಪ್ರಜೆಗಳೂ ಕೊಡಲಿಲ್ಲ!’ ಎಂದು ಬಿಟ್ಟ. ಆದರೆ ರಾಮನಿಗೆ ಚಿಂತೆ ಹೆಚ್ಚಾಗಿ ಅದರ ಕುರಿತೇ ಆಲೋಚಿಸತೊಡಗಿದ. ಭಂಡಾರ ಖಾಲಿ ಆಗಿರುವ ವಿಷಯವನ್ನು ಕೇಳಿದ ಸೀತೆ ‘ಈ ಸಮಸ್ಯೆಗೊಂದು ಉಪಾಯ ಮಾಡುತ್ತೇನೆ’ ಎಂದಳು.
