ಪ್ರಸಕ್ತವಾಗಿ ಇಸ್ಲಾಮಿನಲ್ಲಿ ಸ್ತ್ರೀ ಶೋಷಣೆಗೊಳಪಡುತ್ತಿದ್ದಾಳೆ ಎನ್ನುವಂಥ ಅರ್ಥವಿಲ್ಲದ ಕೂಗಿಗೆ ಹದಿನಾಲ್ಕು ಶತಮಾನಗಳ ಹಿಂದೆಯೇ ಪ್ರವಾದಿ (ಸ) ಉತ್ತರವನ್ನು ಕಂಡುಕೊಂಡು, ಆಕೆಗೆ ಮಾಣಿಕ್ಯಗಿಂತಲೂ ಅಧಿಕವಾದ ಸ್ಥಾನಮಾನವನ್ನು ನೀಡಿ ಗೌರವಿಸಿದರು. ಇಸ್ಲಾಮಿನಲ್ಲಿ ಒಂದಕ್ಕಿಂತ ಹೆಚ್ಚು ಮದುವೆ ಆಗಬಹುದೆಂದು ಹೇಳುವವರು ಪ್ರವಾದಿ ಮುಹಮ್ಮದರ ಆಗಮನ ಕಾಲದ ಬಗ್ಗೆ ತುಟಿಪಿಟಿಕ್ಕೆನ್ನುವುದಿಲ್ಲ. ಪ್ರವಾದಿ ಆಗಮನ ಪೂರ್ವದಲ್ಲಿ ಅರೇಬಿಯನ್ನರು ಹತ್ತರಿಂದ ನೂರು, ಇನ್ನೂರು ಹೆಣ್ಮಕ್ಕಳನ್ನು ಮದುವೆಯಾಗುತ್ತಿದ್ದರು. ಆಗ ಪೈಗಂಬರ್ ಮುಹಮ್ಮದ್ ಅವರು ಅರೇಬಿಯನ್ನರಿಗೆ, ‘ಒಂದುವೇಳೆ ಒಂದಕ್ಕಿಂತ ಜಾಸ್ತಿ ಮದುವೆ ಆಗಲೇಬೇಕೆಂದರೆ 4 ಮದುವೆ ಮಾತ್ರ ಆಗಬಹುದು’ ಎಂದು ಹೇಳುತ್ತ ಅದಕ್ಕೆ ನೂರಾರು ಷರತ್ತುಗಳನ್ನು ವಿಧಿಸಿದರು. ಇಂದಿಗೂ ಋತುಮತಿಯಾದ ಹೆಣ್ಣನ್ನು ಮನೆಯ ಹೊರಗಡೆ ಮಲಗಿಸುವ ಅಮಾನವೀಯ ಪದ್ಧತಿ, ಗಂಡ ಮರಣ ಹೊಂದಿದರೆ ಜೀವನಪರ್ಯಂತ ವಿಧವೆಯಾಗಿ ಜೀವಿಸುವಂತಹ ವ್ಯವಸ್ಥೆ ಜಾರಿಯಲ್ಲಿದ್ದರೂ, ತಲಾಕ್ನ ಸಾಧಕ, ಬಾಧಕಗಳ ಕುರಿತು ಅರಿಯದೆ ‘ಇಸ್ಲಾಮಿನಲ್ಲಿ ಸ್ತ್ರೀ ಸ್ವಾತಂತ್ರ್ಯವಿಲ್ಲ’ ಎಂದು ವಾದ ನಡೆಸುವವರು ಪ್ರವಾದಿ (ಸ) ಜಗತ್ತಿಗೆ ತೋರಿಸಿಕೊಟ್ಟ ಮಾದರಿಯೋಗ್ಯ ನಡೆ, ಮಹಿಳೆಯರಿಗೆ ಕಲ್ಪಿಸಿದ ಸ್ಥಾನಮಾನಗಳ ಕುರಿತು ಅಧ್ಯಯನ ನಡೆಸಬೇಕಾಗಿದೆ.
