ವ್ಯಾಸಂಗಕ್ಕೆ ವಿದೇಶಕ್ಕೆ ಹೋಗುವವರನ್ನು ಹೆಮ್ಮೆಯಿಂದ ನೋಡುವ ವರ್ಗ ಒಂದೆಡೆ. ಅದೇ ರೀತಿ, ಇಲ್ಲಿ ಸೀಟುಗಿಟ್ಟಿಸಿಕೊಳ್ಳಲಾಗಿಲ್ಲ. ಅದಕ್ಕೆ ವಿದೇಶಕ್ಕೆ ಹೋಗ್ತಿದ್ದಾರೆ. ದುಡ್ಡು ಕೊಟ್ಟು ಸರ್ಟಿಫಿಕೇಟ್ ತಗೊಂಡು ಬರ್ತಾರೆ ಎಂಬಿತ್ಯಾದಿ ತುಚ್ಛ ಭಾವದಿಂದ ನೋಡುವ ವರ್ಗ ಇನ್ನೊಂದೆಡೆ. ಒಟ್ಟಿನಲ್ಲಿ ವಿದೇಶ ವ್ಯಾಸಂಗ ಎಂಬುದು ಹೂವಿನ ಹಾಸಿಗೆಯಲ್ಲ ಎಂಬುದು ವಾಸ್ತವ. ಇದನ್ನು ಅರ್ಥಮಾಡಿಕೊಳ್ಳಬೇಕಾದರೆ ಭಾರತದ ಜನಸಂಖ್ಯೆಯನ್ನು ಮತ್ತು ಶಿಕ್ಷಣ ವ್ಯವಸ್ಥೆಯನ್ನು ಸೂಕ್ಷ್ಮವಾಗಿ ಗಮನಿಸಬೇಕಾದುದು ಅವಶ್ಯ. ಕಳೆದ ವರ್ಷ ಜುಲೈನಲ್ಲಿ ಕೇಂದ್ರ ಸರ್ಕಾರ ಲೋಕಸಭೆಗೆ ನೀಡಿದ ಲಿಖಿತ ಉತ್ತರದಲ್ಲಿ ವಿದೇಶದಲ್ಲಿ ವ್ಯಾಸಂಗಕ್ಕೆ ತೆರಳಿದ ಭಾರತೀಯರ ದತ್ತಾಂಶವನ್ನು ಉಲ್ಲೇಖಿಸಲಾಗಿದೆ. ಇದರ ಪ್ರಕಾರ, 11,33,749 ಭಾರತೀಯರು ವಿದೇಶಕ್ಕೆ ತೆರಳಿ ವ್ಯಾಸಂಗ ಮಾಡುತ್ತಿದ್ದಾರೆ. ಯುನೈಟೆಡ್ ಅರಬ್ ಎಮಿರೇಟ್ಸ್ , ಕೆನಡಾ, ಅಮೆರಿಕ, ಆಸ್ಟ್ರೇಲಿಯಾ, ಸೌದಿ ಅರೇಬಿಯಾ, ಯುನೈಟೆಡ್ ಕಿಂಗ್ಡಂ, ಒಮಾನ್, ನ್ಯೂಜಿಲೆಂಡ್, ಚೀನಾ, ಜರ್ಮನಿ - ಇವು ಭಾರತದ ವಿದ್ಯಾರ್ಥಿಗಳು ಗರಿಷ್ಠ ಸಂಖ್ಯೆಯಲ್ಲಿರುವ ಟಾಪ್ 10 ರಾಷ್ಟ್ರಗಳು. ಇದೇ ರೀತಿ ರೆಡ್ಸೀರ್ ಎಂಬ ಸಂಸ್ಥೆಯ ಅಂದಾಜಿನಂತೆ ವಿದೇಶ ವ್ಯಾಸಂಗಕ್ಕೆ ತೆರಳುವ ಭಾರತದ ವಿದ್ಯಾರ್ಥಿಗಳ ವಾರ್ಷಿಕ ವೆಚ್ಚ ಪ್ರಮಾಣ 2019ರ ಲೆಕ್ಕಾಚಾರ ಪ್ರಕಾರ 28 ಶತಕೋಟಿ ಡಾಲರ್ ಅಂದರೆ ಅಂದಾಜು 2,14,194 ಕೋಟಿ ರೂಪಾಯಿ. 2024ರ ವೇಳೆ ಇದು 80 ಶತಕೋಟಿ ಡಾಲರ್ ಆಗಲಿದೆ ಎಂದು ಅದು ತನ್ನ ‘ಹೈಯರ್ ಎಜುಕೇಶನ್ ಅಬ್ರಾಡ್’ ವರದಿಯಲ್ಲಿ ತಿಳಿಸಿದೆ.
