ಹೇಳಿಕೇಳಿ ವ್ಯಾಗ್ನರ್ ಗ್ರೂಪ್ ಕೂಲಿ ಸೇನೆ ರಶಿಯಾದ್ದೇ ಒಂದು ಅನಧಿಕೃತ ಸೇನೆ. ಹಣೆಪಟ್ಟಿ ಮಾತ್ರ ಬೇರೆ ಅಷ್ಟೇ. ಅದಕ್ಕೆ ಹಣ ಹಾಗೂ ಶಸ್ತ್ರಾಸ್ತಗಳ ಪೂರೈಕೆ ಸ್ವತಃ ಪೂತಿನರ ಇಚ್ಚೆ ಹಾಗೂ ಆದೇಶದಂತೇ. ಅದರ ಮಾಲೀಕ ಯೆವ್ಗೆನಿ ಪ್ರಿಗೋಝಿನ್ ಅಧ್ಯಕ್ಷ ಪೂತಿನ್ ಹೇಳಿದ್ದು ಮಾಡುವ ಬಲಗೈ ಬಂಟ. ಬಿಲ್ ಕ್ಲಿಂಟನರಿಂದ ಇದುವರೆಗಿನ ಅಮೆರಿಕಾದ ‘ಸಭ್ಯ’ ಅಧ್ಯಕ್ಷರೆಲ್ಲರೂ ಇರಾಕ್, ಅಫ್ಘಾನಿಸ್ತಾನ, ಲಿಬಿಯಾ ಸೇರಿದಂತೆ ವಿಶ್ವಾದ್ಯಂತ ಹಲವಾರು ದೇಶಗಳನ್ನು ತಮ್ಮ ‘ಕೆಟ್ಟ ಕೆಲಸ’ಗಳನ್ನು ಬ್ಲಾ್ಯಕ್ ವಾಟರ್ಸ್ ಕೂಲಿ ಸೇನೆಯಿಂದ ಮಾಡಿಸಿ, ತಮ್ಮ ಕೈಗಳು ಶುದ್ಧವಾಗಿಯೇ ಇವೆಯೆಂದು ತೋರಿಸಿಕೊಂಡಂತೇ ಚಾಣಾಕ್ಷ ಪೂತಿನ್ ತಮ್ಮ ‘ಕೆಟ್ಟ ಕೆಲಸ’ಗಳನ್ನು ವ್ಯಾಗ್ನರ್ ಗ್ರೂಪ್ನಿಂದ ಮಾಡಿಸಿ, ‘ನಾನೇನೂ ಮಾಡಿಲ್ಲಪ್ಪ, ನಾನು ತುಂಬಾ ಒಳ್ಳೆಯ ಹುಡುಗ’ ಎಂದು ಜಗತ್ತಿಗೆ ಹೇಳುವ ದಾರಿಯನ್ನು ಕಂಡುಕೊಂಡದ್ದರಲ್ಲಿ ಆಶ್ಚರ್ಯವೇ ಇಲ್ಲ. ವ್ಯಾಗ್ನರ್ ಗ್ರೂಪ್ ಬಳಸಿಯೇ ಅವರು ಸಿರಿಯಾದಲ್ಲಿ ರಶಿಯಾದ ಘನಿಷ್ಟ ಸಹಯೋಗಿ ಬಷರಾಲಾಸದ್ರನ್ನು ಅಧ್ಯಕ್ಷ ಸ್ಥಾನದಲ್ಲೇ ಕೂರಿಸುವುದರಲ್ಲಿ ಯಶಸ್ವಿಯಾಗಿದ್ದಾರೆ, ಕಳೆದೆರಡು ವರ್ಷಗಳಲ್ಲೇ ಕನಿಷ್ಠ ಅರ್ಧ ಡಜನ್ ಆಫ್ರಿಕನ್ ದೇಶಗಳಲ್ಲಿ ಪಶ್ಚಿಮದ, ಮುಖ್ಯವಾಗಿ ಮಾಜಿ ವಸಾಹತುಶಾಹಿ ದೈತ್ಯ ಫ್ರಾನ್ಸ್ನ, ಪರವಾದ ಸರ್ಕಾರಗಳನ್ನು ಉರುಳಿಸಿ ತಮ್ಮ ಪರವಾದ ಸರ್ಕಾರಗಳನ್ನು ಸ್ಥಾಪಿಸಿದ್ದಾರೆ. ವ್ಯಾಗ್ನರ್ ಗ್ರೂಪ್ ಎಲ್ಲ ಬಗೆಯಲ್ಲೂ ‘ರಶಿಯಾದ ಬ್ಲಾ್ಯಕ್ ವಾಟರ್ಸ್’ ಆಗಿರುವ ಕಾರಣ ಪೂತಿನ್ರನ್ನು ನೇರವಾಗಿ ಬೈಯಲು ಶ್ವೇತಭವನದ ಪ್ರಭುಗಳಿಗೆ ಸಾಧ್ಯವಾಗುತ್ತಿಲ್ಲ. ಅದೀಗ ಪೋಲ್ಯಾಂಡ್, ಸ್ಲೊವೇಕಿಯಾ ಮತ್ತು ಲಿಥುವೇನಿಯಾಗಳಿಗೆ ‘ಪಾಠ’ ಕಲಿಸುವ ದಾರಿಯನ್ನು ಪೂತಿನರಿಗೆ ತೋರಿಸಿದೆ! ವ್ಯಾಗ್ನರ್ ಗ್ರೂಪ್ ಅನ್ನು ಆ ದೇಶಗಳ ಮೇಲೆ ಛೂ ಬಿಟ್ಟು ತಾನು ದೂರದಲ್ಲಿ ತಣ್ಣಗೆ ಕೂತು ಮಜಾ ತೆಗೆದುಕೊಳ್ಳುವ ಲೆಕ್ಕಾಚಾರವನ್ನು ಪೂತಿನ್ ಹಾಕಿದ್ದಾರೆ. ಜೂನ್ 24ರ ನಸುಕಿನಿಂದ ಇಲ್ಲಿವರೆಗೆ ನಡೆಯುತ್ತಿರುವ ಬೆಳವಣಿಗೆಗಳನ್ನು ನಾವು ಈ ಹಿನ್ನೆಲೆಯಲ್ಲಿ ನೋಡಬೇಕು.
