ಆದರೆ, ನಮ್ಮಲ್ಲಿ ನಕಾರಾತ್ಮಕ ಸುದ್ದಿಗಳು, ನಕಾರಾತ್ಮಕ ಬೆಳವಣಿಗೆಗಳು ವೇಗವಾಗಿ ಹರಡುವಷ್ಟು ಒಳ್ಳೆಯ ಕಾರ್ಯಗಳು ಪ್ರಸಾರಗೊಳ್ಳುವುದಿಲ್ಲ. ಏಕೆಂದರೆ, ಸಜ್ಜನ ಶಕ್ತಿಗಳು ತಮ್ಮ ಪಾಡಿಗೆ ತಾವು ವನಸುಮಗಳಂತೆ ಕೆಲಸ ನಿರ್ವಹಿಸುತ್ತ, ಅದರಲ್ಲಿ ಸಂತೃಪ್ತಿ ಕಂಡಿರುತ್ತಾರೆ ಎಂಬುದೇನೋ ನಿಜ. ಆದರೆ, ಇಂಥ ಕಾರ್ಯಗಳನ್ನು ಗಟ್ಟಿದನಿಯಲ್ಲಿ ಇಡೀ ಸಮಾಜಕ್ಕೆ ಮತ್ತೆ ಮತ್ತೆ ಕೇಳಿಸುವ, ತೋರಿಸುವ ಕೆಲಸವನ್ನು ಮಾಡಬೇಕಿದೆ. ಆಗಲೇ, ಸಮಾಜದ ಶಕ್ತಿ ಎಷ್ಟು ಅದ್ಭುತ, ಪ್ರತಿಯೊಂದಕ್ಕೂ ಸರ್ಕಾರದ ಮೇಲೆ ಅವಲಂಬಿತರಾಗಬೇಕಿಲ್ಲ ಎಂಬುದರ ಸ್ಪಷ್ಟ ಅರಿವು ಮೂಡುತ್ತದೆ. ಭಾರತ ವಿಕಾಸ ಸಂಗಮ ಸಂಘಟನೆಯು ಕಳೆದ 22 ವರ್ಷಗಳಿಂದ ವಿಕಾಸದ ಸಮರ್ಥ ಮಾದರಿಗಳನ್ನು ಅನುಷ್ಠಾನಗೊಳಿಸಿದೆ. ಈಗ ಇದೊಂದು ಪ್ರೇರಣೆಯ, ಸಮಾಜಕ್ಕೆ ಸ್ಪಷ್ಟ ದಿಕ್ಕು ತೋರುವ, ಅಭಿವೃದ್ಧಿಯ ವ್ಯಾಖ್ಯೆಯನ್ನು ನಿಜಾರ್ಥದಲ್ಲಿ ಅನುಷ್ಠಾನಗೊಳ್ಳಿಸುತ್ತಿರುವ ದೇಶದ ದೊಡ್ಡ ಸಾಮಾಜಿಕ ವೇದಿಕೆಯಾಗಿ ಮಾರ್ಪಟ್ಟಿದೆ. ಭಾರತೀಯ ಮೌಲ್ಯಗಳು-ಸ್ವದೇಶಿ ಚಿಂತನೆಯ ವಿಸ್ತಾರದಲ್ಲಿ ತೊಡಗಿರುವ ಸಾವಿರ ಸಂಘಟನೆಗಳು ಭಾರತ ವಿಕಾಸ ಸಂಗಮದೊಂದಿಗೆ ಜೋಡಿಸಿಕೊಂಡಿವೆ. ಸಮಾಜದ ಪ್ರತಿ ವ್ಯಕ್ತಿಯ ಶಕ್ತಿ, ಬುದ್ಧಿ, ಕ್ಷಮತೆ, ಕೌಶಲ ಸಮಾಜನಿರ್ವಣ ಕಾರ್ಯದಲ್ಲಿ ವಿನಿಯೋಗವಾಗಬೇಕು ಎಂಬ ಆಶಯ ಈಗ ನಿಧಾನವಾಗಿ ಈಡೇರುತ್ತಿದೆ.
