‘ಕನ್ನಡನ ಇಂಗ್ಲಿಷ್ ನುಂಗಿತ್ತಾ ನೋಡವ್ವ ತಂಗಿ...’ ಎಂದು ಖ್ಯಾತ ವಾಗ್ಮಿ ಹಾಸ್ಯಪಟು ಪೊ›. ಕೃಷ್ಣೇಗೌಡರು ಸಂದರ್ಶನವೊಂದರಲ್ಲಿ ಹಾಡಿದ ಅಣಕವಾಡನ್ನು ನೀವು ಕೇಳಿರಬಹುದು. ಅದರ ಚಿತ್ರತುಣುಕು ಸಾಮಾಜಿಕ ಜಾಲತಾಣಗಳಲ್ಲೂ ಸಾಕಷ್ಟು ಹಂಚಿಕೆಯಾಗಿತ್ತು. ಹೆಚ್ಚಿನವರು ಅದನ್ನು ಹಾಸ್ಯವೆಂದೇ ಆನಂದಿಸಿದರು. ಅದರಲ್ಲಿರುವ ವಿಷಾದದ ಛಾಯೆ-ಚಿಂತನೆಯನ್ನು ಗ್ರಹಿಸಿದವರು ಕಡಿಮೆ. ನಿಜವಾಗಿಯೂ ನಮ್ಮ ಸಂವಹನದಲ್ಲಿ- ಅನೌಪಚಾರಿಕ ಸಂಭಾಷಣೆಯಿರಲಿ, ಶಿಷ್ಟವಾದ ಬರೆವಣಿಗೆಯೇ ಇರಲಿ, ಅದೆಷ್ಟು ಇಂಗ್ಲಿಷ್ ಪದಗಳು ದಾಂಗುಡಿಯಿಡುತ್ತಿವೆ! ಕನ್ನಡ ವಾಹಿನಿಗಳಲ್ಲಿ ಅಡುಗೆ ಕಾರ್ಯಕ್ರಮ ವೀಕ್ಷಣೆಯೊಂದೇ ಸಾಕು ಇದರ ಗಾಂಭೀರ್ಯ ಅರಿವಾಗುವುದಕ್ಕೆ. ‘ಇನ್ಗ್ರೇಡಿಯೆಂಟ್ಸ್ ಲಿಸ್ಟು, ಮಸ್ಟರ್ಡ್, ಕ್ಯುಮಿನ್ ಸೀಡ್ಸ್, ಗ್ರೀನ್ ಚಿಲ್ಲೀಸ್, ಮೀಡಿಯಂ ಫ್ಲೇಮ್ ಸ್ಟವ್ ಮೇಲೆ ಒಂದು ಫ್ರೖೆಯಿಂಗ್ ಪ್ಯಾನ್ನಲ್ಲಿ ಎರಡ್ ಸ್ಪೂನು ಕುಕಿಂಗ್ ಆಯಿಲ್ ಹಾಕ್ಕೊಳ್ಳಿ... ಗೋಲ್ಡನ್ ಬ್ರೌನ್ ಕಲರ್ ಬರೋವರ್ಗೆ ರೋಸ್ಟ್ ಮಾಡಿ ಆಮೇಲೆ ಮಿಕ್ಸ್ ಮಾಡಿ... ಕೋರಿಯಾಂಡರ್ ಲೀವ್ಸ್ ಹಾಕಿ ಗಾರ್ನಿಷ್ ಮಾಡಿ...’ ಅಂತೆಲ್ಲ ಇಂಗ್ಲಿಷ್ ಪದಗಳೇ ರಾರಾಜಿಸುತ್ತವೆಯೇ ಹೊರತು ಸಾಸಿವೆ, ಜೀರಿಗೆ, ಹಸಿಮೆಣಸು, ಉಪ್ಪು, ಹುಣಿಸೆ, ಗಜ್ಜರಿ, ಗೂದೆಹಣ್ಣು ಮುಂತಾಗಿ ಚಂದದ ಕನ್ನಡ ಪದಗಳು ಕೇಳಿಬರುವುದೇ ಇಲ್ಲ. ರುಬ್ಬುವುದು, ಗೋಟಾಯಿಸುವುದು, ಮಂದ ಉರಿಯಲ್ಲಿ ಹುರಿಯುವುದು, ಕೊನೆಗೆ ಒಗ್ಗರಣೆ ಹಾಕುವುದು... ಯಾವುದೂ ಕನ್ನಡದಲ್ಲಿ ಅಲ್ಲ, ಎಲ್ಲ ಇಂಗ್ಲಿಷ್ನಲ್ಲೇ!
