ಅಂಗಡಿಯಲ್ಲಿ ಆತ ಹಿಂದಿ ಭಜನೆ ಹಾಡುಗಳನ್ನು (ಹನುಮಾನ್ ಚಾಲೀಸಾ) ಜೋರಾಗಿ ಕೇಳಿಸುವಂತೆ ಹಾಕಿದ್ದನೆಂದೂ, ಅದೇ ವೇಳೆ ಅಜಾನ್ ಆಗುತ್ತಿದ್ದುದರಿಂದ ಭಜನೆ ಹಾಡು ನಿಲ್ಲಿಸುವಂತೆ ಯುವಕರು ಕೇಳಿದರೂ ಅಂಗಡಿಯವ ನಿಲ್ಲಿಸದೇ ಇದ್ದುದಕ್ಕೆ ಹಲ್ಲೆ ಮಾಡಿದರೆಂದೂ ವರದಿಯಾಗಿದೆ. ಇದನ್ನು ಅಂಗಡಿ ಮಾಲೀಕನೇ ದೃಢಪಡಿಸಿದ್ದಾನೆ. ಈ ಸಂಬಂಧ ಮೂವರನ್ನು ಪೊಲೀಸರು ಬಂಧಿಸಿ ವಿಚಾರಣೆ ನಡೆಸಿದಾಗ, ಹಿಂದಿ ಭಜನೆ ಹಾಡು ಹಾಕಿದ್ದಕ್ಕೆ ಜಗಳ ತೆಗೆದು ಹಲ್ಲೆ ಮಾಡಿದ್ದಾಗಿ ಒಪ್ಪಿಕೊಂಡಿದ್ದಾರೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಆದರೂ, ಅಂಗಡಿ ಮಾಲೀಕ ನೀಡಿರುವ ದೂರಿನಲ್ಲಾಗಲೀ ಎಫ್ಐಆರ್ನಲ್ಲಾಗಲೀ ಈ ಅಂಶ ನಮೂದಾಗಿಲ್ಲ. ಭಜನೆ ಹಾಡು, ಹನುಮಾನ್ ಚಾಲೀಸಾ, ಅಜಾನ್ ಯಾವುದರ ಪ್ರಸ್ತಾಪವೂ ಅದರಲ್ಲಿ ಇಲ್ಲದಿರುವುದು ಅಚ್ಚರಿಯ ಸಂಗತಿ. ಪ್ರಕರಣ ರಾಜಕೀಯ ತಿರುವನ್ನೂ ಪಡೆದಿದ್ದು, ಹಲ್ಲೆಗೆ ಒಳಗಾದ ಮುಖೇಶ್ ಅವರನ್ನು ಸಂಸದರಾದ ತೇಜಸ್ವಿ ಸೂರ್ಯ, ಪಿ.ಸಿ ಮೋಹನ್, ಶಾಸಕ ಉದಯ್ ಗರುಡಾಚಾರ್ ಭೇಟಿ ಮಾಡಿ ಯೋಗಕ್ಷೇಮ ವಿಚಾರಿಸಿದ್ದಾರೆ. ‘ಕಾಂಗ್ರೆಸ್ ಅಧಿಕಾರಕ್ಕೆ ಬಂದ ನಂತರ ಇಂತಹ ಘಟನೆ ಹೆಚ್ಚಾಗುತ್ತಿವೆ. ಸರ್ಕಾರ ಕಿಡಿಗೇಡಿಗಳ ಪರ ನಿಲ್ಲುತ್ತಿದೆ’ ಎಂದು ಆರೋಪಿಸಿದ್ದಾರೆ. ಸೋಶಿಯಲ್ ಮೀಡಿಯಾದಲ್ಲೂ ಆ ಯುವಕರ ವಿರುದ್ಧ ತೀವ್ರ ಆಕ್ರೋಶ ವ್ಯಕ್ತವಾಗುತ್ತಿದೆ.
