ನಮಗೆ ಅರಿವಿಲ್ಲದ, ನಾವು ನಿರೀಕ್ಷಿಸಿರದ, ನಮಗೆ ಬೇಕಿಲ್ಲದ, ಏಕಾಏಕಿ ನಮ್ಮೆದುರು ಉದ್ಭವಿಸುವ ಕಠಿಣ ಸನ್ನಿವೇಶಗಳನ್ನು ಎದುರಿಸುವುದು ಕಷ್ಟದ ಕೆಲಸ. ಆದರೆ, ಒಂದಂತೂ ನಿಜ. ಒಂದು ಸಣ್ಣ ವಸ್ತುವಿನಿಂದ ದೊಡ್ಡ ಮಹತ್ವಾಕಾಂಕ್ಷೆಯವರೆಗೆ ಯಾವುದೂ ಅನಾಯಾಸವಾಗಿ ನಮ್ಮ ಕೈಗೆಟುಕುವುದಿಲ್ಲ. ಪ್ರತಿಯೊಂದಕ್ಕೂ ಅದಕ್ಕೆ ಅವಶ್ಯಕವಾದ ಪ್ರಯತ್ನ, ಪರಿಶ್ರಮ, ಕಷ್ಟ ಪಡಲೇಬೇಕು. ವಿದ್ಯಾರ್ಥಿಗಳು ತಮ್ಮ ಕಲಿಕೆಯಲ್ಲಿ ಯಶಸ್ವಿ ಆಗಬೇಕಾದರೆ ಕಷ್ಟಪಡಲೇಬೇಕು, ನಿದ್ರೆಗೆಡಲೇ ಬೇಕು. ಓರ್ವ ಉದ್ಯಮಿ ಯಶಸ್ವಿ ಆಗಬೇಕಾದರೆ, ಓರ್ವ ಉದ್ಯೋಗಿ ತನ್ನ ವೃತ್ತಿಯಲ್ಲಿ ಉನ್ನತಿ ಸಾಧಿಸಬೇಕಾದರೆ, ಓರ್ವ ಕ್ರೀಡಾಪಟು ತನ್ನ ಆಯ್ಕೆಯ ಕ್ರೀಡೆಯಲ್ಲಿ ಎತ್ತರದ ಸಾಧನೆ ಮಾಡಬೇಕಾದರೆ, ವರ್ಷಾನುಗಟ್ಟಲೆ ಶ್ರಮ ಪಡಬೇಕಾಗುತ್ತದೆ. ಹಸಿವು, ನಿದ್ರೆ, ಜೀವನದ ಹಲವು ಐಷಾರಾಮಗಳನ್ನು ತ್ಯಜಿಸಿ ಗುರಿ ಸಾಧನೆಗಾಗಿ ಹೋರಾಟ ಮಾಡಬೇಕಾಗುತ್ತದೆ. ಸಾಧನೆಯ ಹಾದಿಯಲ್ಲಿ ಮನಸ್ಸನ್ನು ವಿಚಲಿತಗೊಳಿಸುವಂಥ ಪ್ರಲೋಭನೆಗಳು ಸಾವಿರ. ಡಯೆಟ್ ಮಾಡುವವರಿಗೆ ಇವತ್ತೊಂದು ದಿನ ಸಿಹಿ ತಿಂದರೆ ಏನೂ ಆಗುವುದಿಲ್ಲ ಎಂಬಂಥ ಆಕರ್ಷಣೆಗಳು ಅವು. ಹಿಂದೆಲ್ಲ ಋಷಿಮುನಿಗಳು ಅಥವಾ ರಾಕ್ಷಸರೂ ಯಾವುದೋ ಗುರಿ ಸಾಧನೆಗಾಗಿ ತಪಸ್ಸು ಮಾಡುವಾಗ ಅವರನ್ನು ವಿಚಲಿತಗೊಳಿಸಲು ರಂಭೆ, ಊರ್ವಶಿ, ಮೇನಕೆ ಬರುತ್ತಿದ್ದರು. ಈಗ ಅಂಥ ಅಪ್ಸರೆಯರ ಅವಶ್ಯಕತೆ ಇಲ್ಲ. ಏಕೆಂದರೆ ನಮ್ಮೆಲ್ಲರ ಬಳಿಯೂ ಮೊಬೈಲ್ ಫೋನ್, ಟಿವಿ ಇದೆಯಲ್ಲ, ಅದೇ ಸಾಕು! ಇದೇ ಕಾರಣಕ್ಕೆ ತಿಳಿದವರು ಫೋಕಸ್ ಎಂಬ ಪದ ಯಾವಾಗಲೂ ಬಳಸುತ್ತಾರೆ. ಅಂದರೆ, ಆಟದಲ್ಲಾಗಲೀ, ಬದುಕಿನಲ್ಲಾಗಲೀ ಗುರಿ ಮುಟ್ಟಲು ಫೋಕಸ್ ಇರಲೇಬೇಕು. ಕಾರ್ಯಸಾಧನೆ ಆಗುವವರೆಗೂ ಎಲ್ಲಿಯೂ ವಿಚಲಿತಗೊಳ್ಳದೆ, ಮಾರ್ಗ ಬದಲಿಸದೆ, ನಿರಂತರವಾಗಿ ಪ್ರಯತ್ನ ಪಡುವುದೇ ಫೋಕಸ್. ಈ ರೀತಿ ಪ್ರಯತ್ನ ಪಡುವಾಗ ನಮ್ಮ ಜೀವನಶೈಲಿಯಲ್ಲಿ ಅನೇಕ ಮಾರ್ಪಾಡು ಮಾಡಿಕೊಳ್ಳಬೇಕಾಗುತ್ತದೆ, ದೈಹಿಕವಾಗಿ ಕಠಿಣವಾದ ಶ್ರಮಗಳನ್ನು ಪಡಬೇಕಾಗುತ್ತದೆ. ಮಾನಸಿಕವಾಗಿ ಕಷ್ಟಕರವಾದ ಹಲವು ತ್ಯಾಗಗಳನ್ನು ಮಾಡಬೇಕಾಗುತ್ತದೆ. ಇದನ್ನೇ ಸಾನಿಯಾ ಮಿರ್ಜಾ ಒಂದೆಡೆ ಹೇಳುತ್ತಾರೆ. ‘ಎಲ್ಲ ಮಕ್ಕಳೂ ಬೆಳಗ್ಗೆ ಸುಖನಿದ್ರೆ ಮಾಡುತ್ತಿರುವಾಗ ನಾನು 5 ಗಂಟೆಗೆ ಎದ್ದು ಮಳೆಗಾಲ, ಚಳಿಗಾಲ ಎನ್ನದೆ ಅಭ್ಯಾಸ ಮಾಡುತ್ತಿದ್ದೆ. ಸ್ನೇಹಿತರು, ಸಹಪಾಠಿಗಳು ಸುತ್ತಾಡುತ್ತ, ಪಾನಿಪುರಿ, ಐಸ್ಕ್ರೀಮ್ ತಿನ್ನುತ್ತ, ಸಿನಿಮಾ, ಮಾಲ್ ಎಂದು ಎಂಜಾಯ್ ಮಾಡುತ್ತಿದ್ದರೆ ನಾನು ಟೆನಿಸ್ ಕೋರ್ಟ್ನಲ್ಲಿ ಪ್ರಾಕ್ಟೀಸ್ ಮಾಡುತ್ತಿದ್ದೆ...’ ಇದು ಸಾನಿಯಾ ಮಾತ್ರವಲ್ಲ, ಸೈನಾ ನೆಹ್ವಾಲ್, ವಿರಾಟ್ ಕೊಹ್ಲಿ, ವಿಶ್ವನಾಥನ್ ಆನಂದ್... ಇವರೆಲ್ಲರೂ ಇದೇ ರೀತಿ ಗುರಿ ಮುಟ್ಟಿದವರು. ಒಂದು ಸಾಮಾನ್ಯ ಕುಟುಂಬದಲ್ಲಿ ಜನಿಸಿದ ಹುಡುಗ ಏನೂ ಪ್ರಯತ್ನ ಮಾಡದೆ, ಕೇವಲ ಅದೃಷ್ಟದ ಬಲದಿಂದ ರಾಫೆಲ್ ನಡಾಲ್ ಅಥವಾ ವಿರಾಟ್ ಕೊಹ್ಲಿ ಆಗುವುದಿಲ್ಲ. ‘ವಿರಾಟ್ ಕೊಹ್ಲಿ ಬಾಲಿವುಡ್ ನಟಿಯನ್ನು ಮದುವೆ ಆಗಿದ್ದಾರೆ, ಅವರು ಕುಡಿಯುವ ನೀರು ಕೂಡ ವಿದೇಶದಿಂದ ಆಮದಾಗುತ್ತದೆ. ಅವರು ಕೋಟಿಗಟ್ಟಲೆ ಬೆಲೆಯ ಕಾರಿನಲ್ಲಿ ಓಡಾಡುತ್ತಾರೆ, ಅರಮನೆಯಂಥ ಬಂಗಲೆಯಲ್ಲಿ ವಾಸ ಮಾಡುತ್ತಾರೆ’ ಎಂಬ ಸಂಗತಿಗಳು ಜನರಿಗೆ ವಿಸ್ಮಯವೆಂಬಂತೆ ತೋರುತ್ತದೆ. ತುಂಬ ಮಕ್ಕಳು ‘ವಿರಾಟ್ ಕೊಹ್ಲಿಯಂತೆ ಆಡಬೇಕು ಎನ್ನುವುದಕ್ಕಿಂತ ವಿರಾಟ್ ಕೊಹ್ಲಿಯಂತೆ ಆಗಬೇಕು’ ಎಂದು ಆಸೆ ಪಡುತ್ತಾರೆ. ಆದರೆ, ಕೊಹ್ಲಿ ಈ ಹಂತ ತಲುಪುವುದಕ್ಕಾಗಿ ಎಷ್ಟು ಮಣ್ಣು ಹೊತ್ತಿದ್ದಾರೆ ಎನ್ನುವುದನ್ನು ಜನ ಮರೆಯುತ್ತಾರೆ. ಪ್ರತೀ ವರ್ಷ ಕೋಟ್ಯಂತರ ಮಕ್ಕಳು ಕ್ರಿಕೆಟ್, ಟೆನಿಸ್, ಬ್ಯಾಡ್ಮಿಂಟನ್, ಈಜು, ಚೆಸ್ ಮತ್ತಿತರ ಕ್ರೀಡೆಗಳ ತರಬೇತಿಗೆ ಸೇರಿಕೊಳ್ಳುತ್ತಾರೆ. ಹಣ ಖರ್ಚು ಮಾಡುತ್ತಾರೆ. ಅಭ್ಯಾಸ ಮಾಡುತ್ತಾರೆ. ಆದರೆ, ಆ ಕೋಟಿ ಮಕ್ಕಳಲ್ಲಿ ವಿರಾಟ್ ಕೊಹ್ಲಿ, ಲಿಯಾಂಡರ್ ಪೇಸ್, ಲಕ್ಷ್ಯ ಸೇನ್, ಪಿ.ವಿ. ಸಿಂಧು, ತಾನ್ಯಾ ಸಚ್ದೇವ್ ಆಗುವುದು ಒಬ್ಬಿಬ್ಬರು ಮಾತ್ರ. ಅಂದರೆ, ಕನಸಿನ ಹಾದಿಯಲ್ಲಿ ಎಡವಿದರೂ, ಬಿದ್ದರೂ, ಅಪನಂಬಿಕೆ, ಅವಮಾನಗಳಿಂದ ಜರ್ಜರಿತರಾದರೂ ಪ್ರಯತ್ನ ಬಿಡದೆ, ಹಟ ಬಿಡದೆ, ಆತ್ಮವಿಶ್ವಾಸ ಕಳೆದುಕೊಳ್ಳದೆ ದೃಢಮನಸ್ಸಿನಿಂದ ಮುನ್ನುಗ್ಗುವುದೇ ನಿಜವಾದ ಫೋಕಸ್.
