ಅಂಗವೈಕಲ್ಯವನ್ನು ಮೆಟ್ಟಿನಿಂತು ಇಡೀ ದೇಶವೇ ಬೆರಗಾಗುವಂಥ ಸಾಧನೆ ಮಾಡಿ ಬೀಗಿದ್ದಾರೆ ಶೂಟರ್ ಅವನಿ ಲೇಖರ. 19 ವರ್ಷದ ಅವನಿ, ರಾಜಸ್ಥಾನದ ಈಶಾನ್ಯ ಭಾಗದವರು. ಕಾನೂನು ಪದವಿಯಲ್ಲಿ ಓದುತ್ತಿರುವ ಅವನಿ, ಪ್ಯಾರಾಲಿಂಪಿಕ್ಸ್ನಲ್ಲಿ ನೂತನ ದಾಖಲೆಯೊಂದಿಗೆ ಸ್ವರ್ಣ ಸಾಧನೆ ಮಾಡಿದರು. 2012ರಲ್ಲಿ ಸಂಭವಿಸಿದ ರಸ್ತೆ ಅಪಘಾತದಲ್ಲಿ ತಮ್ಮ11ನೇ ವಯಸ್ಸಿಗೆ ಕಾಲು ಕಳೆದುಕೊಂಡ ಅವನಿ ಲೇಖರ, ಛಲ ಬಿಡದೆ ಇತರರಂತೆ ಜೀವನ ಸಾಧಿಸಿ ಇದೀಗ ಪ್ಯಾರಾಲಿಂಪಿಕ್ಸ್ನಲ್ಲಿ ಅವಳಿ ಪದಕಗಳ ಒಡತಿಯಾಗಿದ್ದಾರೆ. ಅವನಿ ಲೇಖರ ತಮ್ಮ ತಂದೆಯವರ ಮಾರ್ಗದರ್ಶನದಲ್ಲಿ ಕ್ರೀಡೆಯನ್ನು ಆಯ್ದುಕೊಂಡರು, 2008ರ ಬೀಜಿಂಗ್ ಒಲಿಂಪಿಕ್ ಕ್ರೀಡಾಕೂಟದ ಶೂಟಿಂಗ್ನಲ್ಲಿ 10 ಮೀಟರ್ ಏರ್ ರೈಫಲ್ನಲ್ಲಿ ಸ್ವರ್ಣ ಜಯಿಸಿದ ಅಭಿನವ್ ಬಿಂದ್ರಾ ಅವರ ಆತ್ಮಚರಿತ್ರೆಯನ್ನು ಓದಿ ಸ್ಪೂರ್ತಿಯಾಗಿ ತೆಗೆದುಕೊಂಡ ಅವನಿ, ತಮ್ಮ ಅಂಗವೈಕಲ್ಯಕ್ಕೆ ಸೆಡ್ಡು ಹೊಡೆದು ಅಭ್ಯಾಸ ಆರಂಭಿಸಿದರು. ಬಿಂದ್ರ ಮಾದರಿಯಲ್ಲೇ 10 ಮೀಟರ್ ಏರ್ ರೈಫಲ್ನಲ್ಲಿ ಸ್ವರ್ಣ ಗೆದ್ದುಕೊಂಡರು. 10 ಮೀಟರ್ ಏರ್ಫೈನಲ್ ಸ್ಟಾ್ಯಡಿಂಗ್ ಎಸ್ಎಚ್-1 ವಿಭಾಗದಲ್ಲಿ ಸ್ವರ್ಣ ಗೆದ್ದರೆ, 50 ಮೀಟರ್ ರೈಫಲ್-3 ಪೊಸಿಷನ್ ಎಸ್ಎಚ್-1 ವಿಭಾಗದಲ್ಲಿ ಕಂಚಿನ ಪದಕ ಜಯಿಸಿದರು. ಸ್ಪರ್ಧಿಸಿದ ಚೊಚ್ಚಲ ಪ್ಯಾರಾಲಿಂಪಿಕ್ಸ್ನಲ್ಲಿ ಅವಳಿ ಪದಕ ಜಯಿಸುವ ಮೂಲಕ ಭಾರತೀಯ ಕ್ರೀಡಾಪ್ರೇಮಿಗಳ ಮನಗೆದ್ದರು. ಅಲ್ಲದೆ, ಒಂದೇ ಕೂಟದಲ್ಲಿ ಅವಳಿ ಪದಕ ಜಯಿಸಿದ ಭಾರತದ ಮೊದಲ ಕ್ರೀಡಾಪಟು ಎನಿಸಿಕೊಂಡರು. ಅವನಿ ಅವರ ಈ ಸಾಧನೆಯನ್ನು ಗುರಿತಿಸಿದ ಭಾರತೀಯ ಪ್ಯಾರಾಲಿಂಪಿಕ್ಸ್ ಸಂಸ್ಥೆ, ಟೋಕಿಯೊ ಪ್ಯಾರಾಲಿಂಪಿಕ್ ಕ್ರೀಡಾಕೂಟದ ಸಮಾರೋಪದ ಸಮಾರಂಭದಲ್ಲಿ ಧ್ವಜಧಾರಿಯನ್ನಾಗಿ ಆಯ್ಕೆ ಮಾಡಿತ್ತು.
