ಮೊದಲಿಗೆ ಜ್ವರ ಬಂತು. ಅದಾದ ಬಳಿಕ ಮೈ ಕೈ ನೋವು ಶುರುವಾಯ್ತು. ನಾನು ಮತ್ತು ಕೃಷ್ಣ ಒಟ್ಟಿಗೆ ಕಾರ್ನಲ್ಲಿ ಊರಿಗೆ ಹೋಗಿದ್ದರಿಂದ ಇಬ್ಬರೂ ಕೋವಿಡ್ ಪರೀಕ್ಷೆ ಮಾಡಿಸಿದಾಗ ಇಬ್ಬರಿಗೂ ಕರೊನಾ ಇರುವುದು ದೃಢಪಟ್ಟಿತು. ಅದರಂತೆ ಮನೆಯಲ್ಲಿಯೇ ಇಬ್ಬರೂ ಐಸೋಲೇಟ್ ಆಗಿದ್ದೆವು. ಜ್ವರ ಹೆಚ್ಚಾಯಿತು. ಒಂದೆರಡು ದಿನಗಳಲ್ಲಿ ನಾಲಿಗೆ ರುಚಿ ಗ್ರಹಿಸದಂತಾಯ್ತು. ವಿಪರೀತ ಮೈಕೈ ನೋವು, ಸುಸ್ತೋ ಸುಸ್ತು. ಆದರೆ, ಕೃಷ್ಣ ಅವರಿಗೆ ಮಾತ್ರ ಮೈ ಕೈ ನೋವಷ್ಟೇ ಇತ್ತು. ಬೇರೆ ಲಕ್ಷಣಗಳು ಇರಲಿಲ್ಲ. ಮನೆಯಲ್ಲಿ ತಮ್ಮನೇ ಡಾಕ್ಟರ್ ಆಗಿರುವುದರಿಂದ, ಸೂಕ್ತ ಸಲಹೆ-ಸೂಚನೆಗಳನ್ನು ನೀಡಿದ. 14 ದಿನಗಳ ಬಳಿಕ ಕರೊನಾ ವರದಿ ನೆಗೆಟಿವ್ ಬಂತು. ಪೌಷ್ಟಿಕ ಆಹಾರ ಮತ್ತು ದೈಹಿಕ ಶ್ರಮದ ಅಭ್ಯಾಸ ಇದ್ದವರಿಗೆ ಇದು ಯಾವುದೇ ಸಮಸ್ಯೆ ಮಾಡದು. ನಿಮಗೂ ಕರೊನಾ ಬಂದರೆ ವೈದ್ಯರು ಹೇಳುವುದನ್ನು ತಪ್ಪದೇ ಪಾಲಿಸಿ. ಅನಿವಾರ್ಯವಾಗಿ ಹೊರಗಡೆ ಹೋದರೂ, ಸಾಮಾಜಿಕ ಅಂತರವನ್ನು ಕಾಯ್ದುಕೊಂಡೇ ಎಚ್ಚರಿಕೆಯಿಂದ ಇರಿ. ನಿತ್ಯ ವ್ಯಾಯಾಮ, ಯೋಗ, ಪೌಷ್ಟಿಕ ಆಹಾರ ಪದ್ಧತಿಯನ್ನು ಅಳವಡಿಸಿಕೊಳ್ಳುವುದು ಇಂಥ ಸಮಯದಲ್ಲಿ ತುಂಬ ಅವಶ್ಯಕ. ಏಕೆಂದರೆ, ಕರೊನಾಕ್ಕೆ ಬಲಿಯಾದವರಲ್ಲಿ ವ್ಯಸನಿಗಳು, ಕಾಯಿಲೆಗಳು ಇದ್ದವರೇ ಹೆಚ್ಚಿದ್ದಾರೆ.
