ಸೋದರಿ, ಸ್ನೇಹಿತರಿಂದ ಸಾಲ: ಸ್ನೇಹಿತರು, ಸೋದರಿಯರಿಂದ ಸಾಲ ಪಡೆದ ಅಲ್ಪ ಹಣದಿಂದ ಪ್ರಕಾಶನ ಶುರು ಮಾಡಿ, ಮೊದಲ ಪುಸ್ತಕ ಮಾರಿ ಬಂದ ಹಣವನ್ನೇ ಮುಂದಿನ ಪುಸ್ತಕದ ಬಂಡವಾಳವಾಗಿ ಮಾಡಿಕೊಳ್ಳುವ ಅನಿವಾರ್ಯ ಸುಬ್ರಹ್ಮಣ್ಯ ಅವರಿಗಿತ್ತು. ಯಂಡಮೂರಿ, ಕೆ.ಟಿ. ಗಟ್ಟಿ, ಸುದರ್ಶನ ದೇಸಾಯಿ ಅವರಂತಹ ಆ ಕಾಲದ ಜನಪ್ರಿಯ ಲೇಖಕರೇ ಸಾಹಿತ್ಯ ಪ್ರಕಾಶನಕ್ಕೊಂದು ಆರ್ಥಿಕ ದೃಢತೆಯ ಅಡಿಪಾಯ ಒದಗಿಸಿದ್ದನ್ನು, ಸರ್ಕಾರದ ಸ್ವಯಂ ಉದ್ಯೋಗ ಯೋಜನೆಯ 35,000 ರೂ. ಸಾಲದ ನೆರವನ್ನು ಸುಬ್ಬಣ್ಣ ನೆನಪಿಸಿಕೊಳ್ಳುತ್ತಾರೆ. ಜನಪ್ರಿಯ ಕೃತಿಗಳೊಂದಿಗೆ ವೈಚಾರಿಕ ಕೃತಿಗಳು ಅಂದರೆ ಶಂ.ಬಾ. ಜೋಶಿ, ವಿ.ಕೃ. ಗೋಕಾಕ್, ಸಿಂಪಿ ಲಿಂಗಣ್ಣ, ಪಾಟೀಲ ಪುಟ್ಟಪ್ಪ, ಎನ್ಕೆ, ಜೆ. ಕೃಷ್ಣಮೂರ್ತಿ ಅಂಥವರನ್ನು ಸೇರಿಸಿಕೊಂಡಾಗಲೇ ಸಾಹಿತ್ಯ ಪ್ರಕಾಶನಕ್ಕೆ ಒಂದು ಗಾಂಭೀರ್ಯವೂ ದಕ್ಕಿತೆಂದು ಸುಬ್ರಹ್ಮಣ್ಯ ಪರಿಭಾವಿಸುತ್ತಾರೆ.
