ಮಕ್ಕಳ ಸ್ಕ್ರೀನ್ ಟೈಂನಲ್ಲಿ (ಟಿವಿ, ಮೊಬೈಲ್ ಇತ್ಯಾದಿ) ಅವರ ಜತೆ ಸ್ವಲ್ಪ ಹೊತ್ತು ನಾವೂ ಕುಳಿತು ಕಾರ್ಯಕ್ರಮಗಳನ್ನು ನೋಡಿ ನಕ್ಕು ನಲಿದು, ಆ ಬಗ್ಗೆ ರ್ಚಚಿಸಿದರೆ, ಕೆಲವು ಕಾರ್ಯಕ್ರಮಗಳಿಂದಾಗಿ ಮಕ್ಕಳಿಗೆ ಸಿಗುತ್ತಿರುವ ತಪ್ಪು ಸರಿ ಕಲ್ಪನೆಗಳ ಅರಿವು ನಮಗೆ ಸಿಗುತ್ತದೆ. ಮಕ್ಕಳ ಗಮನ ಎಲ್ಲಿ ಅಡ್ಡಹಾದಿ ಹಿಡಿಯುತ್ತಿದೆ ಎಂಬುದು ಮುಂಚಿತವಾಗಿಯೇ ಮನಗಂಡರೆ ಸಾಕು ಪರಿಹಾರವೇನೂ ದೊಡ್ಡ ವಿಷಯವಲ್ಲ. ಗಾರ್ಡನಿಂಗ್, ಕರಕುಶಲತೆ ಇತ್ಯಾದಿ ಹವ್ಯಾಸ ಇಟ್ಟುಕೊಂಡ ಅಮ್ಮಂದಿರು, ತಮ್ಮ ಮಕ್ಕಳಿಗೆ ಆ ಹವ್ಯಾಸದ ಸಮಯವನ್ನು ಮುಂಚಿತವಾಗಿಯೇ ತಿಳಿಸಿ, ಅವರೊಡನೆ ಮಾಡಿ ಸಂಭ್ರಮಿಸಬಹುದು. ದೊಡ್ಡ ವಯಸ್ಸಿನ ಮಕ್ಕಳಾದರೆ, ಯೋಗಾಭ್ಯಾಸ, ಉಪಾಹಾರ, ಅಭ್ಯಾಸದ ಸಮಯ, ಬರವಣಿಗೆ, ಆಟದ ಸಮಯ, ಹವ್ಯಾಸಗಳ ಸಮಯ, ಟಿವಿ ಮತ್ತಿತರ ಮನರಂಜನೆಯ ಸಮಯ ಎಂಬಿತ್ಯಾದಿ ಶಾಲಾ ಮಾದರಿಯ ಟೈಂ ಟೇಬಲ್ ಮಾಡಿಕೊಟ್ಟು, ಅದಕ್ಕೆ ಪೂರಕವಾಗಿ ಮನೆಯ ಪ್ರತಿಯೊಬ್ಬರೂ ಶಿಸ್ತಿನಿಂದ ಮಕ್ಕಳ ಚಟುವಟಿಕೆಗಳಿಗೆ ಬೆಂಬಲಿಸಿ ದರೆ, ಮಕ್ಕಳು ನಿಯಮಗಳಿಗೆ ಒಂದೆರಡು ದಿನ ರಗಳೆ ಮಾಡಿದರೂ ಕ್ರಮೇಣ ಒಗ್ಗಿಕೊಳ್ಳುವುದರಿಂದ ಕಿರಿಕಿರಿ ಕಡಿಮೆಯಾಗುತ್ತದೆ.
