ನನ್ನ ಗಂಡ ನನ್ನಿಂದ ದೂರವಾಗಿ ಎರಡು ವರ್ಷಗಳಾಗಿವೆ. ಈವರೆಗೂ ಮಗನ ಖರ್ಚಿಗೆ ಬಿಡಿಗಾಸೂ ಕೊಟ್ಟಿಲ್ಲ. ನಮ್ಮ ಮದುವೆಯಾಗಿ ಹದಿನೈದು ವರ್ಷಗಳಾಗಿವೆ. ನನ್ನ ಮಗನಿಗೆ ಈಗ ಎಂಟು ವರ್ಷ ವಯಸ್ಸು. ಮಗನನ್ನು ನೋಡಲು ಬರುತ್ತೇನೆ ಎನ್ನುತ್ತಾನೆ. ಅವನು ಬಂದರೆ ಮಗನ ಮನಸ್ಸು ಕೆಡಿಸಿಬಿಡುತ್ತಾನೆ ಎಂದು ಹೆದರಿಕೆ. ನಾನು ಒಳ್ಳೆಯ ಕೆಲಸದಲ್ಲಿ ಇದ್ದೇನೆ. ನನಗೆ ನನ್ನ ಗಂಡನಿಂದ ಹಣದ ಅಪೇಕ್ಷೆ ಇಲ್ಲ. ಆದರೆ “ನನ್ನ ಗಂಡ ಯಾವತ್ತೂ ಮಗನನ್ನು ನೋಡಬಾರದು, ಮಗನ ಹತ್ತಿರ ಬರಬಾರದು ಅಷ್ಟೇ”, ಇದಕ್ಕೆ ನ್ಯಾಯಾಲಯದಲ್ಲಿ ಕೇಸು ಹಾಕಬಹುದೇ? ನನ್ನ ಗಂಡ ನಾನು ಮಗನನ್ನು ನೋಡಲು ಬಿಡದಿದ್ದರೆ ತಾನೇ ಕೇಸು ಹಾಕುವುದಾಗಿ ಹೆದರಿಸುತ್ತಿದ್ದಾನೆ. ಮಗನನ್ನು ತಾನೇ ಕರೆದುಕೊಂಡು ಹೋಗಿಬಿಡುತ್ತೇನೆ ಎಂದು ಧಮಕಿ ಹಾಕುತ್ತಿದ್ದಾನೆ. ಹೀಗಾಗಿ ನಾನೇ ಮೊದಲು ಕೇಸು ಹಾಕಬೇಕೇ ತಿಳಿಸಿ.ಉತ್ತರ: ನಿಮ್ಮ ಪತಿಗೆ ತನ್ನ ಮಗನನ್ನು ಭೇಟಿ ಮಾಡುವ, ಮಗನ ಜೊತೆ ಸಮಯ ಕಳೆಯುವ ಹಕ್ಕು ಇರುತ್ತದೆ. “ನನ್ನ ಗಂಡ ಯಾವತ್ತೂ ಮಗನನ್ನು ನೋಡಬಾರದು, ಮಗನ ಹತ್ತಿರ ಬರಬಾರದು“ ಎನ್ನುವ ಆದೇಶ ಕೊಡಿ ಎಂದು ನೀವು ನ್ಯಾಯಾಲಯದಲ್ಲಿ ಕೇಸು ಹಾಕಲು ಆಗುವುದಿಲ್ಲ. ಮಗುವಿಗೆ ತಂದೆ ತಾಯಿ ಇಬ್ಬರೂ ಮುಖ್ಯ ಎನ್ನುವುದನ್ನು ನೀವು ಮರೆಯಬಾರದು. ನಿಮ್ಮ ಮಗನನ್ನು ಏಕಾಏಕಿ ನಿಮ್ಮಿಂದ ಕಿತ್ತುಕೊಂಡು ಹೋಗುವ ಅಧಿಕಾರ ನಿಮ್ಮ ಪತಿಗೆ ಇರುವುದಿಲ್ಲ. ನಿಮಗೆ ಈ ವಿಷಯದಲ್ಲಿ ಹೆದರಿಕೆ ಇದ್ದರೆ, ನ್ಯಾಯಾಲಯದಿಂದ ನಿಮ್ಮ ಪತಿ ನಿಮ್ಮ ಮಗನನ್ನು ನಿಮ್ಮಿಂದ ತೆಗೆದುಕೊಂಡು ಹೋಗದಂತೆ ಇಂಜಂಕ್ಷನ್ ಆದೇಶವನ್ನು ಪಡೆಯಬಹುದು. ನಿಮ್ಮ ಪತಿ ಕೇಸು ಹಾಕಿದರೆ ನೀವು ಹೆದರಬೇಕಿಲ್ಲ. ನಿಮ್ಮ ತಕರಾರನ್ನು ನೀವು ಸಲ್ಲಿಸಬಹುದು. ಸಾಮಾನ್ಯವಾಗಿ ತಾಯಿಯ ಹತ್ತಿರ ಇರುವ ಮಗುವನ್ನು ತಾಯಿಯಿಂದ ಬೇರ್ಪಡಿಸಿ, ತಂದೆಗೆ ಕಸ್ಟಡಿ ಕೊಡುವ ಅವಕಾಶಗಳು ಬಹಳ ಕಡಿಮೆ ಇರುತ್ತದೆ. ಆದರೆ, ನಿಶ್ಚಯವಾಗಿ, ತಂದೆ ಮಗುವನ್ನು ಭೇಟಿ ಮಾಡುವ, ಮಗುವಿನೊಂದಿಗೆ ಸಮಯ ಕಳೆಯುವ ಅವಕಾಶವನ್ನು ನ್ಯಾಯಾಲಯ ಮಾಡಿಕೊಡುತ್ತದೆ ಎನ್ನುವುದನ್ನು ನೀವು ಮರೆಯಬೇಡಿ.
