ಹೀಗೆ ನಡೆಯುತ್ತದೆ ತರಗತಿ: ಗೀತಾಪರಿವಾರದ ವತಿಯಿಂದ ವಾರದಲ್ಲಿ ಐದು ದಿನ (ಸೋಮವಾರದಿಂದ ಶುಕ್ರವಾರದವರೆಗೆ) ಜೂಮ್ ಆಪ್ ಮೂಲಕ 18 ಬೇರೆ ಬೇರೆ ಸಮಯಗಳಲ್ಲಿ (ಬೆಳಗ್ಗೆ 5 ಗಂಟೆಯಿಂದ ರಾತ್ರಿ 2 ಗಂಟೆಯವರೆಗೆ) 40 ನಿಮಿಷಗಳ ತರಗತಿಗಳು ನಡೆಯುತ್ತವೆ. ಇದರಲ್ಲಿ ಪ್ರವೇಶ, ಕಲಿಕೆ ಎಲ್ಲವೂ ಉಚಿತ. ಗೀತೆಯ 18 ಅಧ್ಯಾಯಗಳನ್ನು ನಾಲ್ಕು ಹಂತಗಳಲ್ಲಿ ಕಲಿಯಬಹುದು. ಸುಮಾರು ಒಂದೂಕಾಲು ವರ್ಷದಲ್ಲಿ ಸಂಪೂರ್ಣ ಭಗವದ್ಗೀತೆಯ ಶುದ್ಧ ಉಚ್ಚಾರಣೆಯನ್ನು ಸಾಧಿಸಬಹುದು. ಆಸಕ್ತರು ತಮಗೆ ಅನುಕೂಲವೆನಿಸುವ ಸಮಯ, ಭಾಷೆ ಆಯ್ದುಕೊಂಡು, ಹೆಸರು ನೋಂದಾಯಿಸಿಕೊಂಡರೆ ಅವರ ಹೆಸರನ್ನು ಆ ಸಮಯದ ವಾಟ್ಸ್ಆಪ್ ಗುಂಪಿಗೆ ಸೇರಿಸಲಾಗುತ್ತದೆ. ಜೂಮ್ ಲಿಂಕ್ ಹಾಗೂ ತರಗತಿಯ ಎಲ್ಲಾ ವಿವರಗಳು ವಾಟ್ಸ್ಆಪ್ ಗುಂಪಿನ ಮೂಲಕ ತಲುಪುತ್ತವೆ. ಅನುಭವವುಳ್ಳ ನುರಿತ ಶಿಕ್ಷಕರು ಸಂಸ್ಕೃ ವ್ಯಾಕರಣವನ್ನು ಅನುಸರಿಸಿ ಗೀತೆಯನ್ನು ಕಲಿಸುತ್ತಾರೆ. ಭಗವದ್ಗೀತೆಯ ಶುದ್ಧ ಉಚ್ಚಾರಣೆಗಾಗಿ ಅನುಸ್ವಾರ, ವಿಸರ್ಗ, ಆಘಾತ ಮತ್ತು ಸಂಸ್ಕೃದ ಸಾಮಾನ್ಯ ನಿಯಮಗಳ ವಿವರಣೆ ಮಾತ್ರವಲ್ಲದೆ, ಶ್ಲೋಕಗಳ ಅರ್ಥವನ್ನು ವಿವರಿಸಲು ವಾರಾಂತ್ಯದಲ್ಲಿ ವಿದ್ವಾಂಸರಿಂದ ವಿಶೇಷ ತರಗತಿಗಳು ಇರುತ್ತವೆ. ಆಯಾ ಅಧ್ಯಾಯದ ಪಿಡಿಎಫ್, ಪ್ರತಿದಿನ ಕಲಿಸಲಾಗುವ ಶ್ಲೋಕಗಳ ಆಡಿಯೋ ಮತ್ತು ಪಠ್ಯವನ್ನು ವಾಟ್ಸ್ಆಪ್ ಗುಂಪಿನಲ್ಲಿ ಹಂಚಿಕೊಳ್ಳಲಾಗುತ್ತದೆ. ತರಗತಿಯಲ್ಲಿ ಶಿಕ್ಷಕರು ಹೇಳಿಕೊಡುವ ಶ್ಲೋಕಗಳನ್ನು ಗುಂಪಿನಲ್ಲಿ ಹಾಗೂ ವೈಯಕ್ತಿಕವಾಗಿ ಪಠಣ ಮಾಡಿಸಲಾಗುತ್ತದೆ. ಹಾಗಾಗಿ ಗೀತೆಯನ್ನು ವ್ಯಾಕರಣಬದ್ಧವಾಗಿ, ಸ್ಪಷ್ಟ ಉಚ್ಚಾರಣೆಯೊಂದಿಗೆ ಕಲಿಯಬಹುದು. ಪ್ರತಿ ಅಧ್ಯಾಯದ ಸಾರಾಂಶ ಮತ್ತು ವ್ಯಾಕರಣಗಳ ಆಡಿಯೋ-ವಿಡಿಯೋಗಳನ್ನು ವಾಟ್ಸ್ಆಪ್ ಗುಂಪಿನಲ್ಲಿ ಹಂಚಿಕೊಳ್ಳಲಾಗುತ್ತದೆ. ಶ್ಲೋಕಗಳನ್ನು ಬಾಯಿಪಾಠ ಮಾಡುವ ಕಡ್ಡಾಯ ನಿಯಮವಿಲ್ಲದಿದ್ದರೂ ಆಸಕ್ತರು ಗೀತಾ ಪರಿವಾರ ನಡೆಸುವ ವಿವಿಧ ಪರೀಕ್ಷೆಗಳಿಗಾಗಿ ಬಾಯಿಪಾಠ ಮಾಡಬಹುದಾಗಿದೆ.
