ಬಾಲ್ಯದಲ್ಲಿ ಮಂಡಗದ್ದೆಯಲ್ಲಿ ಸುತ್ತಮುತ್ತಲಿನ ಜೋಯಿಸರ ಕುಟುಂಬದವರು ಹೇಳುತ್ತಿದ್ದ, ಶಾಲಾ ಶಿಕ್ಷಕರು ಬೋಧಿಸುತ್ತಿದ್ದ ರಾಮಾಯಣ, ಮಹಾಭಾರತದ ಕಥೆಗಳು ಚಿತ್ರದ ರೂಪ ಪಡೆಯಲಾರಂಭಿಸಿದವು. ಪೌರಾಣಿಕ ಪ್ರಸಂಗಗಳನ್ನು ‘ಓಂ’ಕಾರ ಬಳಸಿ ಚಿತ್ರರೂಪದಲ್ಲಿ ನಿರೂಪಿಸತೊಡಗಿದರು.
ಸತತ 38 ವರ್ಷಗಳ ಸೇವೆ ಬಳಿಕ ಬಿಎಸ್ಎಫ್ನಿಂದ ಇನ್ಸ್ಪೆಕ್ಟರ್ ಆಗಿ ನಿವೃತ್ತರಾದರು. ನಿವೃತ್ತಿ ಬಳಿಕ ಸಿಪಾಯಿಗಳು ತಮ್ಮ ಮನೆಗೆ ಹಿಂತಿರುಗುವುದು ವಾಡಿಕೆ. ಇವರಿಗೆ ಆ ಅದೃಷ್ಟವಿರಲಿಲ್ಲ. ಏಕೆಂದರೆ ಇವರ ಗ್ರಾಮ ಮುಳುಗಡೆಯಾಗಿತ್ತು. ಇವರ ನೆರೆಹೊರೆಯವರಿಗೆ ಸರ್ಕಾರ ಪರಿಹಾರ, ಪುನರ್ವಸತಿ ಒದಗಿಸಿತ್ತು. ಆದರೆ ಈ ಯೋಧ ಮುಳುಗಡೆ ಸಂದರ್ಭದಲ್ಲಿ ಸ್ಥಳದಲ್ಲಿರದ ಕಾರಣ ಅವರಿಗೆ ಪರಿಹಾರ ನೀಡಲು ಸಾಧ್ಯವಿಲ್ಲ ಎಂದು ಜಿಲ್ಲಾಧಿಕಾರಿಗಳು ಸರ್ಕಾರಕ್ಕೆ ವರದಿ ಸಲ್ಲಿಸಿದ್ದರು. ಹಾಗಾಗಿ ಮಹಮ್ಮದ್, ಪತ್ನಿ ಹಾಗೂ ಇಬ್ಬರು ಪುತ್ರಿಯರೊಂದಿಗೆ ಬೆಂಗಳೂರಿನ ನಾಗವಾರದಲ್ಲಿ ನೆಲೆ ಕಂಡುಕೊಳ್ಳಬೇಕಾಯಿತು. ಅಲ್ಲಿಂದೀಚೆ ಅವರು ತಮ್ಮನ್ನು ತಾವು ಕಲೆಗೆ ಅರ್ಪಿಸಿಕೊಂಡಿದ್ದಾರೆ. ‘ಓಂ’ಕಾರ, ಶೂನ್ಯ, ತ್ರಿಕೋನದಿಂದ ಕಲೆ ಸೃಜಿಸಿ, ಎರಡು ಮಹತ್ವದ ಕೃತಿ ರಚಿಸಿದ್ದಾರೆ. ಮತ್ತೊಂದು ಕೃತಿ ಶೀಘ್ರದಲ್ಲೇ ಬಿಡುಗಡೆಯಾಗಲಿದೆ.
