ಇದಕ್ಕೆ ಪ್ರತಿಯೊಬ್ಬರೂ ಸಮಾನ ಸಂಸ್ಕಾರವನ್ನು ಅಳವಡಿಸಿಕೊಳ್ಳುವುದೇ ಪರಿಹಾರ. ಈ ಭೂಮಿಯ ಮೇಲೆ ಜನಿಸಿರುವ ಪ್ರತಿಯೊಬ್ಬರ ಜೀವನಕ್ಕೂ ಒಂದಲ್ಲ ಒಂದು ಉದ್ದೇಶವಿದೆ. ಇಲ್ಲಿ ಯಾರೂ, ನಿರರ್ಥಕವಾಗಿ ಹುಟ್ಟಿ, ಸಾಯಲು ಬಂದಿಲ್ಲ. ಅಂದರೆ ನಿರರ್ಥಕದಿಂದ ಸಾರ್ಥಕತೆಯ ಕಡೆಗೆ ನಮ್ಮನ್ನು ಕೈಹಿಡಿದು ಮುನ್ನಡೆಸುವ ಶಕ್ತಿ ಸಮಾನ ಸಂಸ್ಕಾರಕ್ಕಿದೆ. ಶ್ರೀ ಕ್ಷೇತ್ರ ಶೃಂಗೇರಿಯ ಸಮೀಪದಲ್ಲೇ ಇರುವ, ತುಂಗಾ ತೀರದ, ಹರಿ-ಹರ ಸಮನ್ವಯದ ಪುಣ್ಯಭೂಮಿ ಹರಿಹರಪುರ ಸಂಸ್ಥಾನ ಮಠದ ಜಗದ್ಗುರು ಶಂಕರಾಚಾರ್ಯ ಶ್ರೀ ಸ್ವಯಂಪ್ರಕಾಶ ಸಚ್ಚಿದಾನಂದ ಸರಸ್ವತಿ ಸ್ವಾಮೀಜಿ ಸಮಾಜದಲ್ಲಿರುವ ಎಲ್ಲ ಅಸಮಾನತೆ, ಅಶಾಂತಿ, ಅನಾಚಾರಗಳನ್ನು ದೂರವಾಗಿಸಿ, ಸಹಬಾಳ್ವೆ, ಸಹೋದರತ್ವ ಭಾವನೆ ಜಾಗೃತಗೊಳಿಸುವುದಕ್ಕೆ ಸಮಾನ ಸಂಸ್ಕಾರವನ್ನು ಜೀವನದಲ್ಲಿ ಅಳವಡಿಸಿಕೊಳ್ಳುವುದೇ ಪರಿಹಾರ ಎಂದು ತಿಳಿಹೇಳುತ್ತಾರೆ. ಮಾತ್ರವಲ್ಲ, ಜಾತಿ-ವರ್ಗ-ಅಂತಸ್ತಿನ ಭೇದವಿಲ್ಲದೆ ಪ್ರತಿಯೊಬ್ಬರೂ ಸಮಾನ ಸಂಸ್ಕಾರವನ್ನು ಅಳವಡಿಸಿಕೊಂಡು ಜೀವನಮಟ್ಟ ಸುಧಾರಿಸಿಕೊಳ್ಳುವುದಕ್ಕೆ ಬಹುದೊಡ್ಡ ಸಾಮಾಜಿಕ ಅಭಿಯಾನವನ್ನೇ ಕೈಗೊಂಡಿದ್ದಾರೆ. ಶ್ರೀಗಳ ಅನುಗ್ರಹದಿಂದ, ಸಮಾಜಮುಖಿ ಕಾಳಜಿ ಯಿಂದ, ಸೇವಾತತ್ಪರತೆಯಿಂದ ಅಸಂಖ್ಯಾತ ಕುಟುಂಬಗಳಲ್ಲಿ ನೆಮ್ಮದಿಯ ಬೆಳಕು ಮೂಡಿದೆ. ನಿರಾಸೆ, ಹತಾಶೆಯ ಜಾಗದಲ್ಲಿ ಆಶಾವಾದ, ಸಾಧನೆಯ ಜಾಗೃತಿ ನೆಲೆಸಿದೆ.
