ದುಡ್ಡಿನ ವ್ಯವಹಾರದಿಂದ ದೂರ: ಕಳೆದ ವಾರ ಜ.7ರಂದು ಆಚರಿತವಾದ ಮಹರ್ಷಿಗಳ ಜನ್ಮ ದಿನದಂದು ನೂತನ ದೈವರಾತ ಆಶ್ರಮ ಉದ್ಘಾಟಿತವಾಯಿತು. ಈ ಆಶ್ರಮದಲ್ಲಿ ಅಗತ್ಯ ವ್ಯವಸ್ಥೆಗಳಿರುವ ಪ್ರತ್ಯೇಕವಾದ ಏಳು ಕುಟೀರಗಳಿವೆ. ಹಸಿರು ವನದ ಮಧ್ಯೆ ದೂರ ದೂರದಲ್ಲಿ ಇವುಗಳನ್ನು ಕಟ್ಟಲಾಗಿದೆ. ದೈವರಾತರು ಆಶ್ರಮ, ಕೃಷಿ ಮತ್ತು ಗೋಶಾಲೆಗಳನ್ನು ವ್ಯವಹಾರ ವೃದ್ಧಿಗಾಗಿ ಅಥವಾ ಧನ ಸಂಗ್ರಹಣೆಗಾಗಿ ಎಂದೂ ಮಾಡಿದವರಲ್ಲ. ಇದೇ ನೀತಿ ನಿಯಮಗಳನ್ನು ಇಲ್ಲಿ ಅನುಸರಿಸಲಾಗುತ್ತಿದೆ. ಹೀಗಾಗಿ ಆಶ್ರಮದಲ್ಲಿ ಕುಟೀರಗಳನ್ನು ದುಡ್ಡಿಗಾಗಿ ಅಥವಾ ಪ್ರವಾಸೋದ್ಯಮ ದಂಧೆಗಾಗಿ ಬಾಡಿಗೆಗೆ ಕೊಡಲಾಗುವುದಿಲ್ಲ. ವಿಶೇಷ ಸಂಶೋಧನೆ, ಅಧ್ಯಯನ, ವೇದಾಭ್ಯಾಸ, ಯೋಗಾಭ್ಯಾಸ, ಕೃಷಿ ಶಿಕ್ಷಣ, ಗೋಸೇವೆ ಮುಂತಾದ ನಿಃಸ್ವಾರ್ಥ ಸೇವೆಗಳನ್ನು ಮಾಡಲು ಬರುವವರಿಗೆ ಇವುಗಳು ಮೀಸಲಾಗಿವೆ. ಇಂತವರಿಗೆ ವಸತಿಯ ಜೊತೆಗೆ ಊಟೋಪಚಾರವೂ ಉಚಿತ. ಆಡಂಬರವಾಗಿ ಇರಲಿಚ್ಛಿಸುವವರಿಗೆ ಇಲ್ಲಿ ಆಸ್ಪದವಿಲ್ಲ.
