ನಾಡಿನ ಧಾರ್ವಿುಕ, ಸಾಮಾಜಿಕ, ಸಾಂಸ್ಕೃತಿಕ ಹಾಗೂ ಸಾಹಿತ್ಯಿಕ ರಂಗಗಳನ್ನು ಜಾಗೃತಿಗೊಳಿಸುವ ಕಾರ್ಯದಲ್ಲಿ ಪಂಚಪೀಠಗಳು ಬಹುಕಾಲದಿಂದ ನಿರತವಾಗಿವೆ. ಇಂಥ ಪರಂಪರೆಯಲ್ಲಿ ಸಾಗಿಬಂದ ವೀರಶೈವ ಧರ್ಮ ಅತ್ಯಂತ ಪ್ರಾಮುಖ್ಯತೆಯನ್ನು ಪಡೆದುಕೊಂಡಿದೆ. ಇದರ ಪ್ರವರ್ತಕರಾದ ಶ್ರೀ ರೇಣುಕಾದಿ ಪಂಚಪೀಠಾಚಾರ್ಯರು ಸದಾ ಭಕ್ತರ ಉನ್ನತಿ ಮತ್ತು ಸಮಾಜದ ಪ್ರಗತಿ ಹಾಗೂ ವಿಶ್ವಶಾಂತಿಗಾಗಿ ಕಾಲಕಾಲಕ್ಕೆ ಧಮೋಪದೇಶ ಮತ್ತು ಮಾರ್ಗದರ್ಶನ ನೀಡುತ್ತಾ ಬಂದಿದ್ದಾರೆ. ಇಂಥ ಪರಮ ಪೀಠಾಚಾರ್ಯರಲ್ಲಿ ಉಜ್ಜಯಿನಿ ಸದ್ಧರ್ಮ ಪೀಠದ ಲಿಂ. ಶ್ರೀ ಜಗದ್ಗುರು ಸಿದ್ಧಲಿಂಗ ಶಿವಾಚಾರ್ಯ ಭಗವತ್ಪಾದರೂ ಒಬ್ಬರು. ಉಜ್ಜಯಿನಿ ಸದ್ಧರ್ಮ ಪೀಠದ 107ನೇ ಜಗದಾಚಾರ್ಯರಾಗಿ ಮತ್ತು ಮಹಾಮಹಿಮ ಅನುಷ್ಠಾನ ಮೂರ್ತಿಗಳಾಗಿ ತಮ್ಮ ಯೋಗ ಸಾಧನೆಯ ಮುಖೇನ ನಾಡಿಗೆ ಅನೇಕ ಪವಾಡ ಸದೃಶ ಕಾರ್ಯಗಳನ್ನು ಮಾಡಿ ಆ ಮೂಲಕ ಭಕ್ತರ ಮನೆ-ಮನಗಳಲ್ಲಿ ನೆಲೆ ನಿಂತಿದ್ದಾರೆ. ಚಿತ್ರದುರ್ಗ ಸೀಮೆಯ ಬಂಗಾರನಾಯಕನಹಳ್ಳಿ ಹಿರೇಮಠದ ಚನ್ನಬಸಯ್ಯ ಮತ್ತು ಗುರುಸಿದ್ಧಮ್ಮ ಅವರ ಪುಣ್ಯಗರ್ಭದಲ್ಲಿ 1890ರ ಫೆ. 1ರಂದು ಜನಿಸಿದ ಅವರು 8ನೇ ವಯಸ್ಸಿನಲ್ಲಿ ಇಷ್ಟಲಿಂಗ ದೀಕ್ಷೆ ಹಾಗೂ ಧಮೋಪದೇಶವನ್ನು ಪಡೆದರು. 1906ರಲ್ಲಿ ಉಜ್ಜಯಿನಿ ಸದ್ಧರ್ಮ ಪೀಠದ ಜಗದ್ಗುರುವಾಗಿ ನಿಯುಕ್ತಿ ಹೊಂದಿದರು. ಪತಂಜಲಿ ಮಹರ್ಷಿಯ ಯೋಗಶಾಸ್ತ್ರ, ಷಡ್ದರ್ಶನ, ಸಿದ್ಧಾಂತ ಶಿಖಾಮಣಿ, ಭಗವದ್ಗೀತೆ ಅಧ್ಯಯನದಿಂದ ತಮ್ಮ ವಿದ್ವತ್ತನ್ನು ಹೆಚ್ಚಿಸಿಕೊಂಡರು. ಸದಾ ಇಷ್ಟಲಿಂಗಪೂಜೆ, ಜಪ-ತಪಗಳಿಂದ ದಿವ್ಯಜ್ಞಾನಿಯಾಗಿ ಶಿವಯೋಗ ಸಿದ್ಧಿಯನ್ನು ಸಾಧಿಸಿಕೊಂಡರು. ಜನರ ಕಷ್ಟನಷ್ಟಗಳಿಗೆ ಸ್ಪಂದಿಸುತ್ತಿದ್ದ ಶಿವಯೋಗಿ ಅವರು. ಸಂಸ್ಕೃತ, ವೇದ, ಆಗಮಗಳನ್ನು ಅಧ್ಯಯನ ಮಾಡಿ, ಶಿವಾದ್ವೈತವನ್ನು ಮತ್ತಷ್ಟು ಪ್ರಜ್ವಲಗೊಳಿಸಿ, ಅಷ್ಟಾವರಣ, ಪಂಚಾಚಾರ ಹಾಗೂ ಷಟ್ಸ್ಥಲಗಳ ಮುಖೇನ ಶಿವಯೋಗವನ್ನು ಸಾಧಿಸುವ ಪರಿಯನ್ನು ಮನದಟ್ಟಾಗುವಂತೆ ಬೋಧಿಸುತ್ತಿದ್ದರು.
