ನಮ್ಮ ಮನೆಯ ಪುಟ್ಟ ಹೆಣ್ಣುಮಕ್ಕಳು ಸೆಲೆಬ್ರಿಟಿಗಳನ್ನೂ ಮೀರಿಸುವಂತೆ ಬಳುಕುತ್ತಾ ನೃತ್ಯ ಮಾಡುತ್ತಾರೆ, ನಾಲ್ಕು ಮಂದಿ ಚಪ್ಪಾಳೆ ತಟ್ಟುವಂತೆ ಡೈಲಾಗ್ ಹೊಡೆಯುತ್ತಾರೆ, ತಲೆದೂಗುವಂತೆ ಮೇಕಪ್ ಮಾಡಿಕೊಂಡು ಕಲ್ಪನೆಯ ರ್ಯಾಂಪ್ ವಾಕ್ ಮಾಡುತ್ತಾ ಪ್ರದರ್ಶನ ನೀಡುತ್ತಾರೆ. ನಾವೂ ಅವರ ಮುದ್ದಾದ ರೀಲ್ಸ್ ಗಳನ್ನು ಮಾಡುತ್ತಾ, ನೋಡುತ್ತಾ ಹಂಚಿಕೊಂಡು ಖುಷಿ ಪಡುತ್ತೇವೆ. ಅದನ್ನು ಮಕ್ಕಳೂ ಸಂತೋಷಿಸುತ್ತಾರೆ. ಆದರೆ ಸೋಷಿಯಲ್ ಮೀಡಿಯಾದ ಟ್ರೆಂಡ್ಸು, ಲೈಕು, ಕಾಮೆಂಟುಗಳಿಗೇ ಸಿಕ್ಕಾಪಟ್ಟೆ ಸ್ಪಂದನೆ ನೀಡುತ್ತಾ ಅದರ ಮೇಲಿನ ಅವಲಂಬನೆಯೇ ಜಾಸ್ತಿ ಆಗುತ್ತಿದೆ ಎಂದಾಗ, ಆತ್ಮ ತೃಪ್ತಿಗಿಂತ ಇತರರ ಗಮನ, ಅವಲೋಕನಕ್ಕೇ ಮಹತ್ವ ನೀಡುವುದು ಕಾಣಿಸಿಕೊಳ್ಳುತ್ತಿದೆ ಎಂದರೆ ಎಚ್ಚರಿಕೆಯ ಅಗತ್ಯ ಇದೆ ಎಂದರ್ಥ. ಏಕೆಂದರೆ ಮಕ್ಕಳ ಮನೋಭೂಮಿಕೆಯನ್ನು ಜಾಲತಾಣವೇ ತುಂಬಿಕೊಳ್ಳುತ್ತಿದೆ! ಹಾಗೆಯೇ ಹೆಣ್ಣು ಮಕ್ಕಳ ರೀಲ್ಸುಗಳಿಗೆ ಬರುವ ತುಚ್ಚ ಮನಃಸ್ಥಿತಿಯ ಕಾಮೆಂಟುಗಳೂ ಅವರ ಕಣ್ಣಿಗೆ ಬೀಳದೇ ಇರದು. ಅದು ತನ್ನ ದೇಹದ ಬಗ್ಗೆ ಅನಗತ್ಯವಾದ ನಿಗಾ, ತನ್ನನ್ನು ಯಾವ ರೀತಿ ಜನ ನೋಡುತ್ತಾರೆ ಎನ್ನುವುದರ ಬಗ್ಗೆ ತಿರಸ್ಕಾರ-ಗೊಂದಲ, ಯಾವ ರೀತಿ ಇಂಪ್ರೆಸ್ ಮಾಡಬಹುದು ಎನ್ನುವ ಲೆಕ್ಕಾಚಾರಗಳನ್ನೂ ತಲೆಗೆ ತುಂಬಿ ಎಳೆಯ ಹುಡುಗಿಯರ ಮನಸ್ಸನ್ನು ದಿಕ್ಕು ತಪ್ಪಿಸುತ್ತದೆ.
