ಹೆಚ್ಚುತ್ತಿರುವ ಕೂಲಿ, ಏರುತ್ತಿರುವ ರಸಗೊಬ್ಬರ ಬೆಲೆ, ಬಿತ್ತನೆ ಬೀಜದ ದರ, ಯಂತ್ರೋಪಕರಣಗಳ ಬಾಡಿಗೆ, ಇಂಧನದ ಬೆಲೆ ಹೆಚ್ಚಳ ಹಾಗೂ ಕಬ್ಬಿನ ಬಿಲ್ ಕೈ ಸೇರದೆ ಆರ್ಥಿಕ ಸಂಕಷ್ಟಕ್ಕೆ ಒಳಗಾಗಿರುವ ಕೆಲ ರೈತರು ಸದ್ಯ ನರ್ಸರಿ ಕಬ್ಬಿನ ನರ್ಸರಿ ಸಸಿಗಳತ್ತ ಮುಖ ಮಾಡುತ್ತಿದ್ದಾರೆ. ಸಾಂಪ್ರದಾಯಿಕ ವಿಧಾನದಲ್ಲಿ ಕಬ್ಬು ಬೆಳೆಯಲು ಪ್ರತಿ ಎಕರೆಗೆ ಸರಾಸರಿ 3.5 ರಿಂದ 4 ಟನ್ ಕಬ್ಬಿನ ಬೀಜ ಬೇಕು. ಅಲ್ಲದೆ, ಎಕರೆಗೆ 30 ರಿಂದ 38 ಸಾವಿರ ರೂ. ಹಣ ಖರ್ಚಾಗುತ್ತದೆ. ಆದರೆ, ನರ್ಸರಿ ವಿಧಾನದಲ್ಲಿ ಎಕರೆಗೆ 7.5ರಿಂದ 8 ಕ್ವಿಂಟಾಲ್ ಬೀಜ ಅವಶ್ಯವಿದೆ. ಎಕರೆಗೆ 15 ರಿಂದ 18 ಸಾವಿರ ರೂ. ವರೆಗೆ ವೆಚ್ಚವಾಗುತ್ತದೆ. ಒಟ್ಟಾರೆ ನರ್ಸರಿ ಸಸಿ ನಾಟಿ ಮಾಡುವುದರಿಂದ ಎಕರೆಗೆ ಸರಾಸರಿ 18 ಸಾವಿರ ರೂ. ಉಳಿತಾಯವಾಗುವುದರ ಜತೆಗೆ ಇಳುವರಿ ಪ್ರಮಾಣವೂ ಹೆಚ್ಚುತ್ತದೆ. ಆರ್ಥಿಕ ಚೇತರಿಕೆ ಉದ್ದೇಶದಿಂದ ಸದ್ಯ ಬೆಳೆಗಾರರು ನರ್ಸರಿ ಕಬ್ಬಿನ ಸಸಿಗಳತ್ತ ಮುಖ ಮಾಡುತ್ತಿದ್ದಾರೆ. ಇದು ಉತ್ತಮ ಇಳವರಿಯೊಂದಿಗೆ ಲಾಭದಾಯಕ ಕೃಷಿಗೆ ಪೂರಕವಾಗಿದೆ. 2021-22ನೇ ಸಾಲಿನಲ್ಲಿ ರಾಜ್ಯದಲ್ಲಿ 5.22 ಲಕ್ಷ ಹೆಕ್ಟೇರ್ ಪ್ರದೇಶದಲ್ಲಿ ಕಬ್ಬು ಬೆಳೆಯಲಾಗುತ್ತಿದೆ. ಈ ಪೈಕಿ 80 ಸಾವಿರ ಹೆಕ್ಟೇರ್ ಪ್ರದೇಶದಲ್ಲಿ ನರ್ಸಸಿ ಕಬ್ಬಿನ ಸಸಿಗಳನ್ನು ನಾಟಿ ಮಾಡಿ, ಕಬ್ಬು ಬೆಳೆಯಲಾಗಿದೆ. ಆಯಾ ಪ್ರದೇಶದ ಮಣ್ಣಿನ ಫಲವತ್ತತೆ ಆಧರಿಸಿ ಎಕರೆಗೆ ಸರಾಸರಿ 50 ರಿಂದ 61 ಟನ್ ವರೆಗೆ ಇಳುವರಿ ಇದೆ. ಪ್ರಸಕ್ತ ಸಾಲಿನಲ್ಲಿ ನರ್ಸರಿಯಲ್ಲಿ ಬೆಳೆದಿರುವ ಕಬ್ಬಿನ ಸಸಿಗಳನ್ನು ನಾಟಿ ಮಾಡಲು ರೈತರ ಮುಂದಾದ ಕಾರಣ ಕಬ್ಬಿನ ಸಸಿಗಳ ಬೇಡಿಕೆ ಪ್ರಮಾಣವೂ ಅಧಿಕವಾಗಿದೆ.
