ಪಾಕ್ ಸೇನೆಯಲ್ಲಿ ಪದೋನ್ನತಿ ಪಡೆಯುತ್ತಾ ಒಂದೊಂದು ಮೆಟ್ಟಲನ್ನೂ ಏರುತ್ತಾ ಹೋದರೆ ತೆರೆದುಕೊಳ್ಳುವ ಅದೃಷ್ಟದ ಬಾಗಿಲುಗಳೂ ದೊಡ್ಡದಾಗುತ್ತಲೇ ಹೋಗುತ್ತವೆ. ಪದವಿಗನುಸಾರವಾಗಿ ಸೇನಾಧಿಕಾರಿಗಳಿಗೆ ನಗರ ಪ್ರದೇಶಗಳಲ್ಲಿ ನಿವೇಶನಗಳು ಮತ್ತು ಹಳ್ಳಿಗಾಡಿನಲ್ಲಿ, ಮುಖ್ಯವಾಗಿ ಪಾಕ್ ಆಕ್ರಮಿತ ಕಾಶ್ಮೀರದಲ್ಲಿ ಫಾಮರ್್ಗಳು ದೊರೆಯುತ್ತವೆ. ಹೀಗಾಗಿ ಮೇಜರ್ ಜನರಲ್ ಮತ್ತದರ ಮೇಲಿನ ಸ್ಥಾನಗಳಿಗೇರಿದ ಸೇನಾಧಿಕಾರಿಗಳ ಹೆಸರಿನಲ್ಲಿರುವ ನೆಲ ಚದರ ಕಿಲೋಮೀಟರ್ಗಳಲ್ಲಿರುತ್ತವೆ! ಲೆಫ್ಟಿನೆಂಟ್ ಜನರಲ್ ಮತ್ತು ಅಂತಿಮವಾಗಿ ಜನರಲ್ ಸ್ಥಾನಕ್ಕೇರಿ ಸೇನಾ ದಂಡನಾಯಕರಾದರಂತೂ ಹಣವನ್ನು ಅಕ್ಷರಶಃ ಕೊಳ್ಳೆ ಹೊಡೆಯುವ ಅವಕಾಶ ದೊರೆತುಬಿಡುತ್ತದೆ ಮತ್ತು ಅದನ್ನು ಅವರೆಲ್ಲರೂ ನಿರಾತಂಕವಾಗಿ, ನಿರಾಯಾಸವಾಗಿ ಹಾಗೂ ನಿರ್ಲಜ್ಜೆಯಿಂದ ಬಳಸಿಕೊಳ್ಳುತ್ತಾರೆ. ಆದರೆ, ಈ ವಿವರಗಳು ಮಾಧ್ಯಮದಲ್ಲಿ ‘ದೊಡ್ಡದಾಗಿ’ ಕಾಣಿಸಿಕೊಳ್ಳದಂತೆ ಸಾಮೂಹಿಕವಾಗಿ ಪ್ರಯತ್ನಗಳನ್ನವರು ಮಾಡುತ್ತಲೇ ಇರುತ್ತಾರೆ. ಹೀಗಾಗಿ, ಬೆನಝೀರ್ ಭುಟ್ಟೋ ಪ್ರಧಾನಿಯಾಗಿದ್ದಾಗ ಪತಿ ಆಸಿಫ್ ಆಲಿ ಜರ್ದಾರಿ ವರ್ಗಾವಣೆ, ಪದೋನ್ನತಿ, ಆರ್ಥಿಕ ಕಾರುಬಾರುಗಳ ಲೈಸನ್ಸ್ಗಳಿಗಾಗಿ ಬಂದವರಿಂದೆಲ್ಲಾ ಹತ್ತು ಪರ್ಸೆಂಟ್ ಕಮಿಷನ್ ಪಡೆಯುತ್ತಿದ್ದುದರಿಂದ ಮಾಧ್ಯಮಗಳು ಅವರಿಗೆ ಮಿಸ್ಟರ್ ಟೆನ್ ಪರ್ಸೆಂಟ್ ಎಂದು ಹೆಸರಿಟ್ಟವು. ಅದೇ ಮಾಧ್ಯಮಗಳು ಬೆನಝೀರ್ ಭುಟ್ಟೋ ಮಹಾನ್ ಭ್ರಷ್ಟೆ ಎಂದು ಬರೆದವು, ನವಾಜ್ ಶರೀಫ್ ಚೀನಾ, ಯುಎಇ, ಸೌದಿ ಅರೇಬಿಯಾಗಳಿಂದ ಹೇರಳ ಲಂಚ ಪಡೆದು ಭಾರಿ ಗಂಟು ಮಾಡಿಕೊಂಡರು ಎಂದು ಕೂಗಾಡಿದವು. ಆದರೆ, ಪಾಕಿಸ್ತಾನಕ್ಕೆ ಐಎಂಎಫ್ ಮತ್ತು ಅಮೆರಿಕಾ ಸೇರಿದಂತೆ ಶ್ರೀಮಂತ ಮಿತ್ರ ದೇಶಗಳಿಂದ ದೊಡ್ಡ ಪ್ರಮಾಣದ ಸಾಲ ಅಥವಾ ನೆರವು ಬರುತ್ತಿದ್ದಂತೇ ಸೇನಾಧಿಕಾರಿಗಳು ಮನೆ ಖರೀದಿಸಲು ದುಬೈ, ಲಂಡನ್, ಬರ್ವಿುಂಗ್ಹ್ಯಾಂಗಳಿಗೆ ದೌಡಾಯಿಸುತ್ತಿದ್ದ ಬಗ್ಗೆ ಯಾವ ಮಾಧ್ಯಮವೂ ಒಂದಕ್ಷರವನ್ನೂ ಬರೆಯುತ್ತಿರಲಿಲ್ಲ! ಬೆನಝೀರ್ ಭುಟ್ಟೋ ದುಬೈನಲ್ಲಿ, ನವಾಜ್ ಶರೀಫ್ ಲಂಡನ್ನಲ್ಲಿ ಐಷಾರಾಮಿ ಬದುಕು ನಡೆಸುತ್ತಿರುವುದರ ಬಗ್ಗೆ ಪುಟಗಟ್ಟಲೆ ಬರೆಯುವ / ಹೇಳುವ ಮಾಧ್ಯಮಗಳು 2013ರಲ್ಲಿ ನಿವೃತ್ತಿಯಾದ ಜನರಲ್ ಆಷ್ಪಾಕ್ ಪರ್ವೆಜ್ ಕಾಯಾನಿ ಆಸ್ಟ್ರೇಲಿಯಾದ ಪರ್ತ್ನಲ್ಲಿ, 2016ರಲ್ಲಿ ನಿವೃತ್ತಿಯಾದ ಜನರಲ್ ರಹೀಲ್ ಶರೀಫ್ ಸೌದಿ ಅರೇಬಿಯಾದ ಜೆಡ್ಡಾದಲ್ಲಿ ನೆಲೆಸಿರುವುದು ಏಕೆ ಮತ್ತು ಹೇಗೆ ಎನ್ನುವುದರ ಬಗ್ಗೆ ತಲೆ ಕೆಡಿಸಿಕೊಳ್ಳುವುದಿಲ್ಲ. ಸೇನಾಧಿಕಾರಿಗಳ ಭ್ರಷ್ಟಾಚಾರಗಳನ್ನು ತನಿಖೆ ಮಾಡಿದರೆ ಅವರ ಮುಂದೆ ರಾಜಕಾರಣಿಗಳು ಸಂತರಂತೆ ಕಾಣುತ್ತಾರೆ ಎಂದು ಮಾನವಹಕ್ಕುಗಳ ಹೋರಾಟಗಾರ್ತಿ ಆಸ್ಮಾ ಜಹಾಂಗೀರ್ ಹೇಳಿದ್ದು ಈ ಸಂದರ್ಭದಲ್ಲಿ ಅರ್ಥಪೂರ್ಣವೆನಿಸುತ್ತದೆ.
