ಹಣವೂ ಇಲ್ಲದೆ, ಉದ್ಯೋಗವೂ ಇಲ್ಲದೆ ಅಜಿತ್ ತೀವ್ರ ಖಿನ್ನತೆಗೆ ಜಾರಿ ಕುಡಿತದ ದಾಸನಾದ. ಸದಾಕಾಲವೂ ತನ್ನ ರೂಮಿನಲ್ಲಿಯೇ ಕುಳಿತು ಮೊಬೈಲ್ಫೋನಿನಲ್ಲಿ ವಿಡಿಯೋಗಳನ್ನು ನೋಡುತ್ತಾ ಕಾಲಕಳೆಯುತ್ತಿದ್ದ. ‘ನಿನಗೆ ಹೆಚ್ಚೇನೂ ವಯಸ್ಸಾಗಿಲ್ಲ, ಕೇವಲ 45 ಆಗಿದೆ. ಜೀವನ ಇನ್ನೂ ಸಾಕಷ್ಟು ಬಾಕಿಯಿದೆ. ನಿನಗೆ ಅನುಭವವಿದೆ, ಯಾವುದಾದರೊಂದು ಕೆಲಸಕ್ಕೆ ಸೇರಿಕೋ, ನಿನಗೆ ಬೇಕಾದ ಸಹಾಯ ನಾನು ಮಾಡುವೆ’ ಎಂದು ಸುಷ್ಮಾ ಹೇಳಿದಾಗ ಅವಳ ಮೇಲೆ ಕೋಪಗೊಂಡು ಮನಬಂದಂತೆ ಬೈದ. ‘ನೋಡು ಜೀತೂ, ನಮ್ಮ ದೊಡ್ಡ ಮಗಳು ಎಂಟು ವರ್ಷದವಳು, ಚಿಕ್ಕವಳು ಆರು ವರ್ಷದವಳು, ನಾವು ಅವರ ಭವಿಷ್ಯದ ಬಗ್ಗೆಯೂ ಯೋಚಿಸಬೇಕಲ್ಲವೇ?’ ಎಂದು ಆಕೆ ಹೇಳಿದಾಗ ಅವಳನ್ನು ರೂಮಿನಿಂದ ಹೊರದಬ್ಬಿ ಬಾಗಿಲನ್ನು ಹಾಕಿಕೊಂಡ. ಕುಟುಂಬ ನಿರ್ವಹಣೆಗಾಗಿ ಸುಷ್ಮಾ ತಂದೆಯಿಂದ ಸಾಲ ಪಡೆದಿದ್ದಲ್ಲದೆ ಅಮೆರಿಕದಲ್ಲಿ ಮಾಡಿದಂತೆಯೇ ಮನೆಯಲ್ಲಿಯೇ ತಿಂಡಿತಿನಿಸುಗಳನ್ನು ಮಾಡಿ ಅವನ್ನು ಮಾರಿ ಹಾಗೂ ಹೀಗೂ ಸಂಸಾರ ಸಾಗಿಸತೊಡಗಿದಳು.
