ಆದಾಯ ಗಳಿಸುತ್ತಿದ್ದಾರೆ. ಉದಾಹರಣೆಗೆ 1 ಎಕರೆ ಭೂಮಿಯಲ್ಲಿ ಬರೀ ಅಡಕೆ ಬೆಳೆ ಇದೆ ಅಂದಿಟ್ಟುಕೊಳ್ಳಿ, ಆ 1 ಎಕರೆಯಲ್ಲಿ 400 ಅಡಕೆ ಗಿಡವಿದ್ದು, 1 ಗಿಡದಲ್ಲಿ 400 ರೂ. ಸಿಕ್ಕರೆ 1.60 ಲಕ್ಷ ರೂ. ಆದಾಯ ಸಿಗಲಿದೆ. ಅದೇ ಭೂಮಿಯಲ್ಲಿ 5 ಪದರ ಕೃಷಿ ಮಾಡಿದ್ದೇ ಆಗಿದ್ದಲ್ಲಿ ಯಥಾಪ್ರಕಾರ 400 ಅಡಕೆ ಮರವಿದ್ದು 1.60 ಲಕ್ಷ ರೂ. ಬರುತ್ತೆ. ಜತೆಗೆ ಆ 400 ಅಡಕೆ ಮರಕ್ಕೆ 400 ಕಾಳುಮೆಣಸಿನ ಬಳ್ಳಿ ಹಬ್ಬಿಸಿದರೆ 1 ಬಳ್ಳಿ ಅಂದಾಜು 600 ರೂ. ಸಂಪಾದನೆ ಮಾಡಿಕೊಡುತ್ತದೆ. ಅಲ್ಲಿಗೆ 400 ಬಳ್ಳಿಯಿಂದ 2.40 ಲಕ್ಷ ರೂ. ಆದಾಯ ಅಡಕೆಗೆ ಅಂಟಿಕೊಂಡ ಬಳ್ಳಿಯಲ್ಲೇ ಬರುತ್ತೆ. ಹಾಗೆಯೇ, ಬಿಸಿಲು ಭೂಮಿಗೆ ಬೀಳದ ಹಾಗೆ ಅಡಕೆ ನಡುವೆ ಬಾಳೆ, ಲಿಂಬೆ, ಏಲಕ್ಕಿ ಬೆಳೆಯನ್ನು ಅಂತರ ಕೃಷಿಯಾಗಿ ಹಾಕಿಹೊಳ್ಳಬಹುದು. ಹೀಗೆ ಹಾಕಿದ 400 ಬಾಳೆಯಲ್ಲಿ 1 ಬಾಳೆಯಿಂದ 250 ರೂ. ಸಿಕ್ಕರೂ ಒಟ್ಟು 1 ಲಕ್ಷ ರೂ. ಸಂಪಾದನೆಯಾಗುತ್ತದೆ. ಅದೇ ಭೂಮಿಯಲ್ಲಿ ಹಾಕುವ 1 ಲಿಂಬೆ ಗಿಡ 200 ಕಾಯಿ ಬಿಟ್ಟರೆ 1 ಕಾಯಿಗೆ 2 ರೂ.ನಂತೆ ಲೆಕ್ಕ ಹಾಕಿದರೆ 200 ಕಾಯಿಗೆ 400 ರೂ. 1 ಗಿಡದಲ್ಲಿ ಸಿಗುತ್ತದೆ ಮತ್ತು 200 ಲಿಂಬೆ ಗಿಡಕ್ಕೆ 80 ಸಾವಿರ ರೂ. ಆದಾಯ ಸಿಗುತ್ತದೆ. ಇನ್ನು ಏಲಕ್ಕಿ 250 ಗಿಡವಿದೆ ಅಂದುಕೊಳ್ಳಿ, 1 ಗಿಡದಿಂದ 3 ಸಾವಿರ ರೂ. ಸಿಕ್ಕರೆ 250 ಗಿಡಕ್ಕೆ 7.50 ಲಕ್ಷ ರೂ. ಆದಾಯ ಸಿಕ್ಕಂತೆಯೇ ಸರಿ. ಒಟ್ಟಿನಲ್ಲಿ ಬರೀ ಅಡಕೆ ಹಾಕಿದರೆ ಸಿಗುತ್ತಿದ್ದ 1.60 ಲಕ್ಷ ರೂ. ಇದೀಗ ಸಣ್ಣ ಲೆಕ್ಕಾಚಾರದ ಪ್ರಕಾರ 13.30 ಲಕ್ಷ ರೂ.ಗೆ ಏರಿಬಿಟ್ಟಿದೆ. ಎಲ್ಲಿಂದ ಎಲ್ಲಿಗೆ ಆದಾಯದ ಅಂತರ ಏರಿದೆ ಅನ್ನೋದನ್ನು ಊಹಿಸಿ ನೋಡಿ. ಅಷ್ಟೇ ಅಲ್ಲ, ನಡುವಿನ ಜಾಗದಲ್ಲಿ ಕಳೆ ನಿಯಂತ್ರಣಕ್ಕೆ ಖರ್ಚು ಮಾಡುವ ಬದಲು ಸೊಪ್ಪು-ತರಕಾರಿ ಹಾಕಿಕೊಂಡರೆ ದಿನದ ಖರ್ಚಿನ ಜತೆಗೆ ತಿಂಗಳಿಗೆ ಅತೀ ಕನಿಷ್ಠ ಅಂದರೂ 15 ಸಾವಿರ ರೂ.ನಿಂದ ಗರಿಷ್ಠ 1 ಲಕ್ಷ ರೂ.ವರೆಗೆ ಆದಾಯ ತಂದುಕೊಡುತ್ತದೆ. ಹೀಗಾಗಿಯೇ ಈ ‘ಐದು ಪದರ ಕೃಷಿ’ ರೈತರಿಗೆ ದುಪ್ಪಟ್ಟು ಆದಾಯ ಪಡೆಯಲು ಅತ್ಯುತ್ತಮ ವ್ಯವಸಾಯ ಪದ್ಧತಿಯಾಗಿದೆ. ಆದರೆ, ರೈತರು ಭೂಮಿ, ಬಿಸಿಲು ಮತ್ತು ಬೆಳೆ ವಿಜ್ಞಾನದ ಬಗ್ಗೆ ಅರಿತು ಈ ಕೃಷಿ ಮಾಡಬೇಕಷ್ಟೆ.
