ಶುಂಠಿಯಲ್ಲಿದೆ ಔಷಧೀಯ ಗುಣ..

ಪ್ರಾಚೀನ ಕಾಲದಿಂದಲೂ ಶುಂಠಿಯನ್ನು ಪೂರ್ವಜರು ದಿನನಿತ್ಯ ತಯಾರಿಸುವ ಅಡುಗೆಗೆ ಉಪಯೋಗಿಸುತ್ತಾ ಬಂದಿದ್ದಾರೆ. ಹಿಂದೆ ಮನೆ ಮನೆಯಲ್ಲೂ ಶುಂಠಿ ಗಿಡವನ್ನು ಮನೆಬಳಕೆಗೆಂದು ಹಿತ್ತಲಿನಲ್ಲಿ ನೆಟ್ಟಿರುತ್ತಿದ್ದರು. ಅಜೀರ್ಣ, ವಾಂತಿ, ತಲೆನೋವು, ಸಂಧಿವಾತ, ಕಫ, ವಾತ, ಮೂಲವ್ಯಾಧಿ ಮುಂತಾದ ರೋಗಗಳಿಗೆ ಶುಂಠಿಯನ್ನು ಮನೆ ಮದ್ದಾಗಿಯೂ ಉಪಯೋಗಿಸುತ್ತಾರೆ.

| ವೇದಾವತಿ ಎಚ್.ಎಸ್. ಬೆಂಗಳೂರು

• ಹಸಿ ಶುಂಠಿಯೊಂದಿಗೆ ಜೀರಿಗೆ, ಕಲ್ಲು ಸಕ್ಕರೆ ಸೇರಿಸಿ ಜಗಿದರೆ ನಾಲಿಗೆ ರುಚಿ ಹೆಚ್ಚುತ್ತದೆ.
• ಊಟದ ಬಳಿಕ ಸಣ್ಣ ತುಂಡು ಶುಂಠಿಯೊಂದಿಗೆ ಒಂದು ಹರಳು ಉಪು್ಪ ತಿಂದರೆ ಅಜೀರ್ಣ, ಹೊಟ್ಟೆಯುಬ್ಬರ ದೂರವಾಗುತ್ತದೆ.
• ಒಣಶುಂಠಿಯನ್ನು ತೇಯ್ದು ಹಣೆಗೆ ಹಚ್ಚಿದರೆ ಶೀತದ ತಲೆನೋವು, ತಲೆಭಾರ ಇಳಿಯುತ್ತದೆ.
• ಶುಂಠಿಯು ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸುವಲ್ಲಿ ಸಹಾಯ ಮಾಡುತ್ತದೆ.

ಒಣಶುಂಠಿ ಪುಡಿ ತಯಾರಿಸುವ ವಿಧಾನ

ಬಿಸಿಲಿನ ಸಮಯದಲ್ಲಿ ಒಣಶುಂಠಿ ಪುಡಿಯನ್ನು ತಯಾರಿಸಿಟ್ಟು ಕೊಂಡರೆ ವರ್ಷಗಳ ಕಾಲ ಅಡುಗೆಗೆ, ಟೀ ತಯಾರಿಸಲು, ಕಷಾಯ ತಯಾರಿಸಲು ಉಪಯೋಗಿಸಬಹುದು. ಅಗತ್ಯಕ್ಕೆ ತಕ್ಕಷ್ಟು ಶುಂಠಿ ತೆಗೆದುಕೊಳ್ಳಿ. ಅದರಲ್ಲಿರುವ ಮಣ್ಣನ್ನು ನೀರಿನಿಂದ ಚೆನ್ನಾಗಿ ತೊಳೆದು ನೀರು ಪೂರ್ತಿ ಆರಲು ಬಿಡಿ. ನಂತರ ಸಿಪ್ಪೆಯನ್ನು ತೆಳುವಾಗಿ ತೆಗೆದು ತುರಿದು ಕೊಳ್ಳಿ. ತುರಿದ ಶುಂಠಿಯನ್ನು ತಟ್ಟೆಯಲ್ಲಿ ಹಾಕಿ 2 ದಿನ ಬಿಸಿಲಿನಲ್ಲಿ ಒಣಗಿಸಿ. ಒಣಗಿದ ಶುಂಠಿಯನ್ನು ಮಿಕ್ಸಿಯಲ್ಲಿ ನುಣ್ಣಗೆ ಪುಡಿ ಮಾಡಿಕೊಳ್ಳಿ. ಪುಡಿ ಮಾಡಿಕೊಂಡ ಶುಂಠಿಯನ್ನು ಜರಡಿ ಹಿಡಿಯಿರಿ. ಹೀಗೆ ತಯಾರಿಸಿದ ಶುಂಠಿ ಪುಡಿಯನ್ನು ಒಂದು ಡಬ್ಬಿಯಲ್ಲಿ ಹಾಕಿಟ್ಟರೆ ಅಗತ್ಯವಿದ್ದಾಗ ಬಳಸಬಹುದು.

ಶುಂಠಿ ಚಹಾ ಹೀಗೆ ತಯಾರಿಸಿ

1 ಕಪ್ ಅಥವಾ 1/4 ಲೀಟರ್ ನೀರನ್ನು ಪಾತ್ರೆಗೆ ಹಾಕಿ ಕುದಿಸಿ. 1 ಟೀ ಚಮಚ ಜಜ್ಜಿದ ಹಸಿಶುಂಠಿ ಸೇರಿಸಿ 1 ನಿಮಿಷ ಕುದಿಸಿ. ಬಳಿಕ 1 ಕಪ್ ಹಾಲು ಹಾಕಿ ಕುದಿಸಿ. ಹಾಲು ಕುದಿ ಬಂದ ಬಳಿಕ 2 ಟೇಬಲ್ ಚಮಚ ಸಕ್ಕರೆ ಸೇರಿಸಿ ಚೆನ್ನಾಗಿ ಕುದಿಸಿ. ಈಗ 2 ಟೇಬಲ್ ಚಮಚ ಟೀ ಪುಡಿ ಸೇರಿಸಿ 4 ರಿಂದ 5 ನಿಮಿಷ ಕುದಿಸಿ. ಚೆನ್ನಾಗಿ ಕುದಿ ಬಂದಾಗ ಒಲೆ ಆರಿಸಿ. ಚಹಾವನ್ನು ಸೋಸಿಕೊಂಡು ಬಿಸಿ ಇರುವಾಗಲೇ ಕುಡಿಯಿರಿ. ಈ ವಿಧಾನದಲ್ಲಿ ಚಹಾ ತಯಾರಿಸಿದರೆ ರುಚಿ ಜಾಸ್ತಿ ಇರುತ್ತದೆ. ಇದು ರೋಗನಿರೋಧಕ ಶಕ್ತಿ ಹೆಚ್ಚಿಸುವಲ್ಲಿ ಸಹಾಯ ಮಾಡುತ್ತದೆ.

https://www.vijayavani.net/appu-belaku-on-puneeth-rajkumar-birthday-at-hubballi/

https://www.vijayavani.net/student-jumped-from-23th-floor-and-died/