ರಾಮ-ರಾವಣರ ನಡುವೆ ಜರುಗಿದ ಮಹಾಯುದ್ಧಕ್ಕೆ ಸಮಾನವಾದುದು ವಿಶ್ವದಲ್ಲಿ ಇನ್ನೊಂದು ಇಲ್ಲವೆಂಬುದು ವಿದ್ವಾಂಸರ ಅಭಿಪ್ರಾಯವಾಗಿದೆ. ಮಹಾರಥದ ಮೇಲೆ ನಿಂತು ಯುದ್ಧ ಮಾಡುತ್ತಿದ್ದ ದಶಕಂಠನಾದ ರಾವಣನು ಇಂದ್ರನಿಂದ ಕಳುಹಿಸಲ್ಪಟ್ಟ ದಿವ್ಯವಾದ ರಥದ ಮೇಲೆ ನಿಂತು ಬಾಣವನ್ನು ಪ್ರಯೋಗಿಸುತ್ತಿದ್ದ ರಾಮನನ್ನು ಪ್ರಶ್ನಿಸುತ್ತಾನೆ. ‘ಅಂದೊಮ್ಮೆ ಮುನಿಗಳು ನೀಡಲು ಬಂದ ಕೆಲವು ಸುವಸ್ತುಗಳನ್ನು ನಿರಾಕರಿಸಿ ಪರರ ಋಣದಲ್ಲಿ ಇರಲು ಬಯಸುವುದಿಲ್ಲ ಎಂದಿದ್ದ ನೀನು, ಇಂದು ದೇವೇಂದ್ರನು ಸಾರಥಿಯೊಂದಿಗೆ ಕಳುಹಿಸಿದ ದಿವ್ಯವಾದ ರಥವನ್ನು ಸ್ವೀಕರಿಸಿದ್ದೆಯಲ್ಲಾ? ಇದೆಂತಹ ನ್ಯಾಯ?’ ಎಂದು ರಾವಣ ಕೇಳಿದಾಗ ಶ್ರೀರಾಮನು, ‘ನಿಜ ರಾವಣೇಶ್ವರ, ಇಕ್ಷಾಕು ವಂಶದವರಾದ ನಾವು ಪರರ ಹಂಗಿನಲ್ಲಿ, ಋಣದಲ್ಲಿ ಬದುಕಲು ಬಯಸುವುದಿಲ್ಲ. ಉಚಿತವಾಗಿ ಏನನ್ನೂ ಪಡೆಯುವುದಿಲ್ಲ. ಆದರೆ, ಹಿಂದೆ ದಶರಥ ಚಕ್ರವರ್ತಿಯು ದೇವತೆಗಳ ಕೋರಿಕೆಯಂತೆ ಶತ್ರುಗಳನ್ನು ನಾಶ ಮಾಡಿ ದೇವತೆಗಳಿಗೆ ಜಯವನ್ನು ಸಂಪಾದಿಸಿ ಕೊಟ್ಟಿದ್ದರು. ಅದಕ್ಕೆ ದಿವ್ಯವಾದ ಕಾಣಿಕೆಯನ್ನು ತಂದೆಗೆ ಕೊಡಲು ಬಂದಾಗ, ಮುಂದೊಂದು ದಿನ ಉಪಯೋಗಿಸಿಕೊಳ್ಳುತ್ತೇವೆ ಎಂದಿದ್ದನ್ನು ತಂದೆಯವರು ನನಗೆ ತಿಳಿಸಿದ್ದರಿಂದ ದೇವೇಂದ್ರನ ಆಗ್ರಹಕ್ಕೆ ಕಟುಬಿದ್ದು ರಥವನ್ನು ಸ್ವೀಕರಿಸಿದ್ದೇನೆ’ ಎಂದು ಉತ್ತರಿಸಿದ. ಶತ್ರುವಾದರೂ ರಾಮನನ್ನು ಆಗ ಶ್ಲಾಘಿಸಿದ ದಶಕಂಠ.
