ಪ್ರತ್ಯಕ್ಷವಾಗಿ ಕಂಡರೂ ಪ್ರಮಾಣಿಸಿ ನೋಡು ಎಂಬ ಮಾತು ನಮ್ಮ ಹಲವು ಕಲ್ಪಿತ ನಕಾರಾತ್ಮಕ ಯೋಚನೆಗಳಿಗೆ ಲಗಾಮು ಹಿಡಿಯಲು ಸೂಕ್ತವಾಗಿದೆ. ತಮ್ಮ ಸುತ್ತಲಿನ ವ್ಯಕ್ತಿಗಳ ಪ್ರತಿಯೊಂದು ಚಲನವಲನಗಳಿಗೂ ಏನಾದರೊಂದು ಸನ್ನಿವೇಶವನ್ನು ಕಲ್ಪಿಸಿ ಗಾಳಿಸುದ್ದಿ ಹರಡಲು ಜನರು ಕಾತುರರಾಗಿರುತ್ತಾರೆ. ತಮ್ಮೊಡಲಲ್ಲಿ ದುಃಖದ ಮಡುವನ್ನೇ ಇಟ್ಟುಕೊಂಡಿದ್ದರೂ ಚಂದದ ಉಡುಗೆ ತೊಡುಗೆ ತೊಟ್ಟು, ಮುಖ ಭಾವದಲ್ಲಿ ಸಂತಸದ ನಗು ಬೀರುತ್ತಾ ಬದುಕುವವರೂ ನಮ್ಮ ನಡುವೆ ಇರುತ್ತಾರೆ. ಅಂತಹವರಿಗೂ ಮೇಲ್ನೋಟದ ಅಲಂಕಾರಕ್ಕೆ ಕುಹಕದ ಮಾತು ತಪ್ಪಿದ್ದಲ್ಲ. ಆದರೆ, ಬಾಹ್ಯ ನೋಟದಿಂದ ಒಬ್ಬ ವ್ಯಕ್ತಿಯ ಅಂತಸ್ತು, ಮನಸ್ಸಿನ ನೋವು ಯಾವುದನ್ನೂ ಅಳೆಯಲಾಗದು ಎಂಬುದನ್ನು ಅರಿತಾಗಲೇ ನಾವು ಹೆಚ್ಚು ಸಕಾರಾತ್ಮಕ ಚಿಂತನೆಯತ್ತ ಹೊರಳಲು ಸಾಧ್ಯ. ಪರರ ಬಗ್ಗೆ ಕಲ್ಪಿಸಿ ಹರಡಿದ ಗಾಳಿಸುದ್ದಿಗಳು ಅವರ ಜೀವನದಲ್ಲಿ ಇನ್ನಷ್ಟು ಹತಾಶೆಯ ದಿನಗಳನ್ನು ತಂದೊಡ್ಡಬಹುದು. ನೋವಿನಲ್ಲಿರುವವರ ವೇದನೆಗೆ ಕಿವಿಯಾಗುವ ಉದಾತ್ತ ಮನಸ್ಸು ಬೆಳೆಸಿಕೊಳ್ಳಬೇಕು. ಅಂತಹ ಉದಾತ್ತ ಮನೋಭಾವ ನಮ್ಮಲ್ಲಿ ಮೂಡದಿದ್ದರೂ ಗಾಯದ ಮೇಲೆ ಬರೆ ಎಳೆಯುವಂತಹ ಪ್ರವೃತ್ತಿ ನಮ್ಮದಾಗಬಾರದು. ನಾವು ನೋಡುವ ಮತ್ತು ಅರಿತುಕೊಳ್ಳುವ ವಿಷಯಕ್ಕೆ ಬೇರೆ ಬೇರೆ ಆಯಾಮಗಳೂ ಇರಬಹುದೆಂಬುದನ್ನು ನಾವು ಅರ್ಥ ಮಾಡಿಕೊಳ್ಳಬೇಕು. ಯಾವುದೇ ವಿಷಯವನ್ನು ಸಮಗ್ರವಾಗಿ ಅರಿಯದೆ ವಿಶ್ಲೇಷಣೆ ಮಾಡಿದರೆ ಅದು ಅನರ್ಥಗಳಿಗೆ ಕಾರಣವಾಗುತ್ತದೆ.
