ಎಲ್ಲಾ ಆಗುಹೋಗುಗಳಿಗೆ ಮನಸ್ಸೇ ಕಾರಣವಾಗಿರುತ್ತದೆ. ಕಣ್ಣಿಗೆ ಕಾಣದ ಮನಸ್ಸು ಮೂರಡಿಯ ಮನುಷ್ಯನನ್ನು ಕುಣಿಸುತ್ತದೆ. ಆರಡಿಯ ಮನುಷ್ಯನನ್ನು ಕುಣಿಸುತ್ತದೆ. ಎಲ್ಲಾ ಪಾಪ ಪುಣ್ಯಗಳಿಗೆ ಮನಸ್ಸೇ ಕಾರಣ. ಇತರರಿಗೆ ನೋವು ಕೊಡುವುದು ಪಾಪದ ಕೆಲಸ. ನೋವಿರುವ ಮನದಲ್ಲಿ ನಗುವ ಕಾರಂಜಿ ಚಿಮ್ಮುವಂತೆ ಮಾಡುವುದು ಪುಣ್ಯದ ಕೆಲಸ. ಭಗವದ್ಗೀತೆಯಲ್ಲಿ ಒಂದೆಡೆ ಅರ್ಜುನ ಕೇಳುತ್ತಾನೆ, ‘ಶ್ರೀಕೃಷ್ಣ, ಮನಸ್ಸು ಹರಿದಾಡುವಂತಹದು. ಅದು ಬಹಳ ಬಲಶಾಲಿ. ಹಿಡಿದ ಪಟ್ಟನ್ನು ಬಿಡದೆ ಇರುವಂತಹುದು. ಅದನ್ನು ಹಿಡಿತದಲ್ಲಿ ಇಟ್ಟುಕೊಳ್ಳುವುದು ಬಹಳ ಕಷ್ಟವೆನಿಸುತ್ತದೆ’ ಎಂದು. ಆಗ ಶ್ರೀಕೃಷ್ಣ ಹೇಳುತ್ತಾನೆ, ‘ಮನಸ್ಸು ಹರಿದಾಡುವಂತಹುದು ಮತ್ತು ಅದನ್ನು ಹಿಡಿತದಲ್ಲಿ ಇಟ್ಟುಕೊಳ್ಳಲಿಕ್ಕೆ ಆಗದೆಂಬುದು ನಿಜ ಅರ್ಜುನ. ಆದರೆ, ಪ್ರಯತ್ನದಿಂದಲೂ, ವೈರಾಗ್ಯದಿಂದಲೂ ಅದನ್ನು ಬಿಗಿ ಹಿಡಿಯುವುದಕ್ಕಾಗುತ್ತದೆ’ ಎಂದು. ಅತಿಯಾದ ವಿಷಯಾಸಕ್ತಿಯಿಂದ ಮನಸ್ಸು ಬಂಧಿಸಲ್ಪಡುತ್ತದೆ. ಮನಸ್ಸು ವಿಷಯಾಸಕ್ತಿಯಿಂದ ಬಿಡುಗಡೆಯಾದಾಗ ಅದುವೇ ಮೋಕ್ಷ. ಮೋಕ್ಷ ಎಂದರೆ ಬಿಡುಗಡೆ. ಅದು ಸತ್ತ ಮೇಲೆ ಸಿಗುವ ಪದವಿಯಲ್ಲ. ಮನಸ್ಸು ನಿರ್ವಿಷಯವಾದಾಗ, ಅಂದರೆ ಕಾಮನೆಗಳಿಂದ ಮುಕ್ತವಾದಾಗ ಅದುವೇ ಮೋಕ್ಷ. ಮನಸ್ಥಿತಿ ಚೆನ್ನಾಗಿದ್ದಾಗ ಎಂತಹ ಪ್ರತಿಕೂಲ ಪರಿಸ್ಥಿತಿಯನ್ನೂ ನಿಭಾಯಿಸಬಹುದು. ಹಾಗಾಗಿ ಮನಸ್ಸನ್ನು ಸಮಚಿತ್ತದಲ್ಲಿರಿಸೋಣ. ಮಾನಸಿಕ ಆರೋಗ್ಯ ಕಾಪಾಡಿಕೊಳ್ಳೋಣ.
