ಮೊದಲನೇ ಶಿಷ್ಯನು ಎರಡನೇ ಶಿಷ್ಯನನ್ನು ಕಂಡು, ‘ನೀನು ಗುರುಗಳ ಮಾತಿಗೆ ತಕ್ಕುದಾಗಿ ನಡೆದುಕೊಳ್ಳಲಿಲ್ಲ. ನಾನು ನೋಡು, ಜೋಪಾನವಾಗಿ ಇರಿಸಿದ್ದೇನೆ’ ಎನ್ನುತ್ತಾನೆ. ಕಾಲಾಂತರದಲ್ಲಿ ಪರ್ಯಟನೆ ಮುಗಿಸಿ ಬಂದ ಗುರುಗಳು ತಾವು ನೀಡಿದ ಕಡಲೆಕಾಳಿನ ಬಗ್ಗೆ ಶಿಷ್ಯರಲ್ಲಿ ವಿಚಾರಿಸುತ್ತಾರೆ. ಮೊದಲನೇ ಶಿಷ್ಯ, ‘ಗುರುಗಳೆ ಬನ್ನಿ’ ಎಂದು ತಾನು ಪೂಜೆ ಮಾಡುತ್ತಿದ್ದ ಸ್ಥಳಕ್ಕೆ ಕರೆದುಕೊಂಡು ಹೋಗುತ್ತಾನೆ. ಗುರುಗಳು ಆ ಗಂಟನ್ನು ಬಿಚ್ಚಿ ತೋರಿಸಲು ಹೇಳಿದಾಗ, ಬಿಚ್ಚಿದರೆ ಕಡಲೆಕಾಳು ಸಂಪೂರ್ಣ ಹಾಳಾಗಿ ಧೂಳಾಗಿ ಹೋಗಿರುತ್ತದೆ. ‘ನನ್ನ ಅನುಗ್ರಹವನ್ನು ಧೂಳು ಮಾಡಿದೆ’ ಎಂದು ಬೇಸರಿಸುತ್ತಾ, ಎರಡನೇ ಶಿಷ್ಯನಿಗೆ, ‘ನಿನಗೆ ಕೊಟ್ಟ ಕಾಳುಗಳನ್ನು ತೆರೆ’ ಎಂದಾಗ, ‘ತೆರೆಯಲಾಗದು ಅದನ್ನು ತೋರಿಸಬೇಕು’ ಎನ್ನುತ್ತ ಹೊರಗೆ ಕರೆದುಕೊಂಡು ಹೋಗಿ ಹಚ್ಚಹಸುರಾಗಿ ಬೆಳೆದು ನಿಂತಿದ್ದ ಕಡಲೆ ಹೊಲವನ್ನು ತೋರಿಸುತ್ತಾನೆ. ಹಾಗೆ ತೋರಿಸುತ್ತಾ ಗುರುಗಳೆ, ‘ನಾನು ನಿಮ್ಮಅನುಗ್ರಹವನ್ನು ಊರವರಿಗೂ ಹಂಚಿದ್ದೇನೆ’ ಎನ್ನುತ್ತಾನೆ. ಗುರುಗಳಿಗೆ ಸಂತೋಷವಾಗುತ್ತದೆ.
