ಭಾರತದಲ್ಲಿ ಬ್ಯಾಂಕಿಂಗ್ ಕ್ಷೇತ್ರ ಮರುಪಾವತಿಯಾಗದ ಸಾಲದ (ಎನ್ಪಿಎ) ಪ್ರಮಾಣ ಹೆಚ್ಚಳದಿಂದಾಗಿ ಸಂಕಷ್ಟಕ್ಕೀಡಾಗಿದೆ ಎಂಬ ಸುದ್ದಿ ಕಳೆದ ನಾಲ್ಕಾರು ವರ್ಷಗಳಿಂದ ಕೇಳಿಬರುತ್ತಲೇ ಇದೆ. ಇತ್ತೀಚಿನ ಮಾಹಿತಿ ಪ್ರಕಾರ, 2021ರ ಮಾರ್ಚ್ 31ರ ತನಕದ ವ್ಯವಹಾರದಲ್ಲಿ ದೇಶದ 90 ಬ್ಯಾಂಕುಗಳು ಮತ್ತು ಹಣಕಾಸು ಸಂಸ್ಥೆಗಳು 45,613 ಸಾಲ ವಂಚನೆ ಪ್ರಕರಣಗಳನ್ನು ದಾಖಲಿಸಿವೆ. ಇದರ ಒಟ್ಟು ಮೌಲ್ಯ 5 ಲಕ್ಷ ಕೋಟಿ ರೂಪಾಯಿ ಆಗಿದ್ದು, ಇದು ಬ್ಯಾಂಕುಗಳು ನೀಡಿದ ಒಟ್ಟ್ಟು ಸಾಲದ ಶೇಕಡ 4.5ರಷ್ಟಾಗುತ್ತದೆ. ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್ಬಿಐ) ಬಹಿರಂಗಪಡಿಸಿರುವ ಮಾಹಿತಿ ಪ್ರಕಾರ, ದೇಶದ ಅತಿ ದೊಡ್ಡ ಬ್ಯಾಂಕ್ ಆಗಿರುವ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (ಎಸ್ಬಿಐ) ಗರಿಷ್ಠ ಸಾಲ ವಂಚನೆ ಎದುರಿಸಿದೆ. ಇದರ ಮೊತ್ತ 78,072 ಕೋಟಿ ರೂಪಾಯಿ. ನಂತರದ ಸ್ಥಾನಗಳಲ್ಲಿ ಪಂಜಾಬ್ ನ್ಯಾಷನಲ್ ಬ್ಯಾಂಕ್ (ಪಿಎನ್ಬಿ) 39,733 ಕೋಟಿ ರೂಪಾಯಿ, ಬ್ಯಾಂಕ್ ಆಫ್ ಇಂಡಿಯಾ (ಬಿಒಬಿ) 32,224 ಕೋಟಿ ರೂಪಾಯಿ, ಯೂನಿಯನ್ ಬ್ಯಾಂಕ್ ಆಫ್ ಇಂಡಿಯಾ (ಯುಬಿಐ) 29,572 ಕೋಟಿ ರೂಪಾಯಿ ಸಾಲ ವಂಚನೆಗೆ ಒಳಗಾಗಿವೆ. ಸಾಲ ವಂಚನೆ ಪ್ರಮಾಣದಲ್ಲಿ ಟಾಪ್ 5 ಬ್ಯಾಂಕುಗಳ ಪಾಲು ಶೇಕಡ 42.1 ಇದ್ದು 2,06,941 ಕೋಟಿ ರೂಪಾಯಿ ಆಗಿದೆ. ಖಾಸಗಿ ಬ್ಯಾಂಕುಗಳ ಪೈಕಿ ಹೆಚ್ಚು ಸಾಲ ವಂಚನೆ ಎದುರಿಸಿದ ಮೂರು ಬ್ಯಾಂಕುಗಳ ಪಾಲು ಶೇಕಡ 11.87. ಆದಾಗ್ಯೂ, ಖಾಸಗಿ ವಲಯದ ಅತಿ ದೊಡ್ಡ ಬ್ಯಾಂಕ್ ಎಚ್ಡಿಎಫ್ಸಿ ಎದುರಿಸಿದ ಸಾಲ ವಂಚನೆ ಪ್ರಮಾಣ ಶೇಕಡ 0.55.
