ಅಮೆರಿಕದ ನಾಸಾ ಮತ್ತು ಜಪಾನಿನ ಬಾಹ್ಯಾಕಾಶ ಇಲಾಖೆ ಜಾಕ್ಸಾ ಜಂಟಿಯಾಗಿ ಜಪಾನಿನ ಕ್ಯೋಟೊ ವಿಶ್ವವಿದ್ಯಾಲಯದ ಮಾರ್ಗದರ್ಶನದಲ್ಲಿ ಹಮ್ಮಿಕೊಂಡ ಯೋಜನೆ ಲೈಗ್ನೋಸ್ಯಾಟ್. ಇದರ ಹಿಂದಿರುವ ಯೋಚನೆ ಸರಳವಾದದ್ದು. ಅಂತರಿಕ್ಷದಲ್ಲಿ ನೀರಿನ ಲಭ್ಯತೆ ಇರದಿರುವ ಕಾರಣಕ್ಕೆ ಮರವು ಶುಷ್ಕ ಮತ್ತು ಗಾಳಿಯಿಲ್ಲದ ವಾತಾವರಣದಲ್ಲಿ ಕೆಡುವುದಿಲ್ಲ. ಜೊತೆಗೆ ಆಗಸದಲ್ಲಿ ನಿಷ್ಕ್ರಿಯವಾಗಿರುವ ಮರದ ಉಪಗ್ರಹವೊಂದು ಮತ್ತೊಂದು ಉಪಗ್ರಹಕ್ಕೆ ಡಿಕ್ಕಿ ಹೊಡೆದರೆ ಅದು ಮಾಡುವ ಲುಕ್ಸಾನು ಏನೂ ಇಲ್ಲ. ಸೇವಾ ನಿವೃತ್ತಿಯಾದ ಮೇಲೆ ಇಂತಹ ಉಪಗ್ರಹವನ್ನು ಭೂಮಿಯತ್ತ ದೌಡಾಯಿಸಿದರೆ ಅದು ಭೂಮಿಯ ವಾತಾವರಣದ ಸಂಪರ್ಕಕ್ಕೆ ಬಂದ ತಕ್ಷಣ ಗಾಳಿಯೊಡಗಿನ ಘರ್ಷಣೆಯಿಂದ ಉಂಟಾಗುವ ಶಾಖಕ್ಕೆ ಸುಟ್ಟು ಭಸ್ಮವಾಗುವುದರಿಂದ ಮತ್ತೆ ಸಾಗರದೊಳಗೆ ಮುಳುಗಿಸುವ ಪ್ರಮೇಯವೇ ಇರುವುದಿಲ್ಲ. ಅದೇ ಲೋಹದ ಉಪಗ್ರಹಗಳಾದರೆ ಅವುಗಳು ವಾತಾವರಣದ ಸಂಪರ್ಕಕ್ಕೆ ಬಂದು ಸುಡುತ್ತಿದ್ದಂತೆಯೇ ಓಜೋನ್ ಪದರಕ್ಕೆ ಹಾನಿ ಮಾಡುವ ಅಲ್ಯೂಮಿನಿಯಂ ಆಕ್ಸೈಡ್ ಅನಿಲವನ್ನು ಬಿಡುಗಡೆ ಮಾಡುತ್ತವೆ. ಮರದ ಉಪಗ್ರಹವಾದರೆ ಆ ಪ್ರಮೇಯವೇ ಇರುವುದಿಲ್ಲ. ಹೀಗಾಗಿ ಒಂದೇ ಕಲ್ಲಿಗೆ ಎರಡು ಹಕ್ಕಿ ಹೊಡೆಯುವ ಯೋಚನೆ ಇದರ ವಿನ್ಯಾಸಕಾರರದ್ದು. ಯೋಚನೆಯೇನೋ ಚೆನ್ನಾಗಿದೆ, ಆದರೆ ಅಂತರಿಕ್ಷದಲ್ಲಿ ತೀರ ಸೆಖೆ ಮತ್ತು ತೀರ ಚಳಿಯಂತಹ ಪ್ರತಿಕೂಲ ಹವಾಮಾನದ ಜೊತೆಗೆ ಸೂರ್ಯನಿಂದ ಹೊರಹೊಮ್ಮುವ ವಿಕಿರಣಗಳೂ ಇರುತ್ತವೆ. ಹೀಗೆ ಹಲವು ಸವಾಲುಗಳನ್ನು ಎದುರಿಸಬಲ್ಲ ಕ್ಷಮತೆಯಿರುವ ಮರಕ್ಕಾಗಿ ವಿಜ್ಞಾನಿಗಳಿಂದ ಹುಡುಕಾಟ ಶುರುವಾಯಿತು. ಈ ಹುಡುಕಾಟದ ಅಂಗವಾಗಿ ಜಪಾನ್ 2022ರಲ್ಲಿ ಹಾರಿಸಿದ್ದ ಉಪಗ್ರಹವೊಂದರಲ್ಲಿ ಮೂರು ಬೇರೆ ಬೇರೆ ಜಾತಿಯ ಮರದ ತುಂಡುಗಳನ್ನು ಇಡಲಾಗಿತ್ತು. ಇವುಗಳನ್ನು ಹೊತ್ತುಕೊಂಡು ಆಗಸಕ್ಕೆ ಹಾರಿದ ಉಪಗ್ರಹದ ಜೊತೆಯಲ್ಲಿ ಈ ಮರದ ತುಂಡುಗಳು ಮೈನಸ್ 100ರಿಂದ ಪ್ಲಸ್ 100 ಡಿಗ್ರಿ ಸೆಂಟಿಗ್ರೇಡ್ವರೆಗಿನ ಪ್ರತಿಕೂಲ ಹವಾಮಾನದ ಜೊತೆಗೆ ಅಲ್ಲಿನ ವಿಕಿರಣಗಳಿಗೂ ಮೈಒಡ್ಡಿ ತನ್ನ ಕಾರ್ಯ ಮುಗಿಸಿದ ಉಪಗ್ರಹದ ಜೊತೆಗೆ ಭೂಮಿಗೆ ವಾಪಸ್ಸು ಬಂದವು. ಹೀಗೆ ಅಂತರಿಕ್ಷ ರಿಟರ್ನ್್ಡ ಮರಗಳ ಮೇಲೆ ನಡೆಸಿದ ಹಲವು ಪರೀಕ್ಷೆಗಳ ನಂತರ ಲೈಗ್ನೋಸ್ಯಾಟ್ ನಿರ್ವಣಕ್ಕೆ ಆ ಮೂರು ಮರದ ತುಂಡುಗಳ ಪೈಕಿ ಜಪಾನಿನಲ್ಲಿ ಕಂಡು ಬರುವ ಮೆಗ್ನೋಲಿಯ ಎಂಬ ಮರವನ್ನು ಆಯ್ಕೆ ಮಾಡಲಾಯಿತು. ಮರದ ಆಯ್ಕೆಯಲ್ಲಷ್ಟೇ ಅಲ್ಲ, ಜಪಾನೀಯರು ಈ ಪುಟ್ಟ ಉಪಗ್ರಹದ ವಿನ್ಯಾಸದಲ್ಲೂ ತಮ್ಮತನವನ್ನು ಮೆರೆದಿದ್ದಾರೆ. ಈ ಪೂರ್ತಿ ಉಪಗ್ರಹದಲ್ಲಿ ಎಲ್ಲೂ ಮೊಳೆ ಅಂಟುಗಳು ಬಳಕೆಯಾಗದೇ ಅಪ್ಪಟ ಜಪಾನಿ ಶೈಲಿಯಾದ ಶಾಶಿಮೋನೋ ಎಂಬ ಮರಗೆಲಸದ ತಂತ್ರಜ್ಞಾನವನ್ನು ಬಳಸಿ ತಯಾರಿಸಲಾಗಿದೆ. ಸದ್ಯಕ್ಕೆ ಅಂತಾರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣದಲ್ಲಿ ಸ್ಥಿತವಾಗಿರುವ ಲೈಗ್ನೋಸ್ಯಾಟ್ ಶೀಘ್ರವೇ ಭೂಮಿಯಿಂದ ಅಜಮಾಸು ನಾಲ್ಕುನೂರು ಕಿಲೋಮೀಟರ್ ದೂರದ ಕಕ್ಷೆಗೆ ಹಾರಲಿದೆ. ಮುಂದಿನ ಆರು ತಿಂಗಳುಗಳನ್ನು ಅಲ್ಲೇ ಕಳೆದು ತನ್ನೊಳಗೆ ಆಳವಡಿಸಿರುವ ಸಂವೇದಕಗಳ ಮೂಲಕ ಅಂತರಿಕ್ಷದಲ್ಲಿ ವಿವಿಧ ವಾತಾವರಣದಲ್ಲಿ ಮರವು ಹೇಗೆ ಪ್ರತಿಕ್ರಿಯಿಸುತ್ತದೆ ಮತ್ತು ಎಷ್ಟು ಟಿಕಾಯಿಸಬಲ್ಲದು ಎಂಬುದರ ಕುರಿತು ಬಹುಮೂಲ್ಯ ಮಾಹಿತಿಯನ್ನು ಹಂಚಿಕೊಳ್ಳಲಿದೆ.
