ಭಾರತದ ಒಟ್ಟು ಸಮಾಜ ಹಾಗೂ ಅನ್ಯ ಮತಗಳ ಕುರಿತೂ ಅಂಬೇಡ್ಕರರು ಸ್ಪಷ್ಟತೆ ಹೊಂದಿದ್ದರು. ಹಿಂದುಗಳಿಗೆ ಹಿಂದುಸ್ತಾನ, ಮುಸ್ಲಿಮರಿಗೆ ಪಾಕಿಸ್ತಾನ ಎಂಬ ಘೊಷಣೆ ಮಾಡಿದ ಮೊಹಮ್ಮದ್ ಇಕ್ಬಾಲ್ ಮಾತಿಗೆ, ಗಾಂಧಿಯವರ ಅಪ್ಪಟ ಶಿಷ್ಯನಾಗಿದ್ದ ಮೊಹಮ್ಮದ್ ಅಲಿ ಜಿನ್ನಾ ಸಹ ಜತೆಯಾದ. ಸ್ವಾತಂತ್ರ್ಯವೀರ ವಿನಾಯಕ ದಾಮೋದರ ಸಾವರ್ಕರ್, ಈ ವಿಚಾರದ ಹಿಂದಿರುವ ಮಾನಸಿಕತೆಯನ್ನು ವಿರೋಧಿಸಿದರು. ಆದರೆ ಬ್ರಿಟಿಷ್ ಆಡಳಿತದ ಭಾರತದಲ್ಲಿದ್ದ ಸಿಂಧ್, ಕಾಶ್ಮೀರದ ಹಿಂದುಗಳು ಸಾವರ್ಕರ್ ಮಾತಿಗೆ ಬೆಲೆ ಕೊಡಲಿಲ್ಲ. ಈ ಪ್ರತ್ಯೇಕತಾವಾದಿ ಮಾನಸಿಕತೆಯಿಂದ ಭಾರತದ ಅಖಂಡತೆಗೆ ಆಗುವ ಅಪಾಯವನ್ನು ಯಾರೂ ಅರಿಯಲಿಲ್ಲ. ದ್ವಿರಾಷ್ಟ್ರವಾದದ ಕುರಿತು ಸಾವರ್ಕರರ ಮಾತುಗಳನ್ನು ಅನೇಕ ಸಂದರ್ಭಗಳಲ್ಲಿ ಅನೇಕರು ಓದಿರುತ್ತಾರೆ. ಆದರೆ ಈ ಕುರಿತು ಡಾ.ಬಿ.ಆರ್.ಅಂಬೇಡ್ಕರ್ ಅವರು ಸ್ಪಷ್ಟ ಆಲೋಚನೆಗಳನ್ನು ‘ಥಾಟ್ಸ್ ಆನ್ ಪಾಕಿಸ್ತಾನ್’ ಕೃತಿಯಲ್ಲಿ ದಾಖಲಿಸಿದ್ದಾರೆ. ಈ ಕೃತಿಯನ್ನು ಕರ್ನಾಟಕದ ಖ್ಯಾತ ಬರಹಗಾರ್ತಿ, ಸಂಶೋಧಕಿ, ವಿಧಾನ ಪರಿಷತ್ ಮಾಜಿ ಸದಸ್ಯೆ ಡಾ. ಎಸ್.ಆರ್.ಲೀಲಾ ಅವರು ಭಾವಾನುವಾದ ಮಾಡಿದ್ದಾರೆ, ‘ಹಿಂದುಗಳಿಗೆ ಹಿಂದುಸ್ತಾನ, ಮುಸಲ್ಮಾನರಿಗೆ ಪಾಕಿಸ್ತಾನ ಎಂದಿದ್ದು ಏಕೆ?’ ಕೃತಿಯಲ್ಲಿ. ಪ್ರತ್ಯೇಕ ರಾಷ್ಟ್ರದ ಹಿನ್ನೆಲೆಯಲ್ಲಿ, ಮುಸ್ಲಿಂ ಮಾನಸಿಕತೆಯನ್ನು ಐತಿಹಾಸಿಕ ದೃಷ್ಟಿಯಿಂದ ಅರಿಯುವ ಪ್ರಯತ್ನವನ್ನು ಅಂಬೇಡ್ಕರ್ ಮಾಡಿದರು. ಇಸ್ಲಾಮಿನ ಹೃದಯಭಾಗವಾಗಿರುವ ಕುರಾನ್ ಹಾಗೂ ಹದೀಶ್ಗಳಲ್ಲಿ ನಿಷ್ಠೆ, ತಮ್ಮ ಮತವೇ ವಿಶ್ವದಲ್ಲಿ ಸರ್ವಕಾಲಕ್ಕೂ ಶ್ರೇಷ್ಠ ಎನ್ನುವ ಅಖಂಡ ನಂಬಿಕೆ, ಅದರ ಹಿನ್ನೆಲೆಯಲ್ಲಿ ಭೂಮಂಡಲವನ್ನು ದಾರ್-ಉಲ್-ಹರಬ್ ಹಾಗೂ ದಾರ್-ಉಲ್-ಇಸ್ಲಾಂ ಎಂದು ವಿಭಾಗ ಮಾಡುವುದರ ಹಿನ್ನೆಲೆ- ಇವುಗಳನ್ನು ಸ್ಪಷ್ಟವಾಗಿ ಅರಿತುಕೊಂಡಿದ್ದ ಕೆಲವೇ ನಾಯಕರಲ್ಲಿ ಅಂಬೇಡ್ಕರ್ ಅವರೂ ಒಬ್ಬರು. ಆ ಸಮಯದಲ್ಲಿ ಗಾಂಧೀಜಿ, ನೆಹರು, ಡಾ. ರಾಜೇಂದ್ರ ಪ್ರಸಾದ್, ಕೃಪಲಾನಿ ಮುಂತಾದವರಿಗೆ ಇಸ್ಲಾಮಿನ ಬಗ್ಗೆ ನೈಜ ತಿಳಿವಳಿಕೆ ಇರಲಿಲ್ಲ ಎಂದು ಡಾ.ಎಸ್. ಆರ್. ಲೀಲಾ ಅವರ ಕೃತಿಯ ಮುನ್ನುಡಿಯಲ್ಲಿ ಖ್ಯಾತ ಲೇಖಕ ಡಾ. ಜಿ.ಬಿ. ಹರೀಶ್ ತಿಳಿಸಿರುವುದು ಅಂಬೇಡ್ಕರರಿಗಿದ್ದ ಸ್ಪಷ್ಟತೆಯನ್ನು ಸೂಚಿಸುತ್ತದೆ.
