ಡಿಸೆಂಬರ್ 13ರಿಂದ ಗಡಿಭಾಗದ ಬೆಳಗಾವಿಯ ಸುವರ್ಣ ವಿಧಾನಸೌಧದಲ್ಲಿ ಚಳಿಗಾಲದ ಅಧಿವೇಶನ ಪ್ರಾರಂಭವಾಗಲಿದ್ದು, ಉತ್ತರ ಕರ್ನಾಟಕದ ಸಮಸ್ಯೆ, ನಿರೀಕ್ಷೆಗಳಿಗೆ ಪರಿಣಾಮಕಾರಿಯಾಗಿ ಸ್ಪಂದಿಸಬೇಕಿದೆ. ಪ್ರತಿ ಸಲ ಅದೇ ಮಾತು, ಅದೇ ಆಶ್ವಾಸನೆ, ಆಡಳಿತ-ವಿರೋಧ ಪಕ್ಷಗಳ ಹಾರಾಟ-ಚೀರಾಟ ಒಂದು ಕಡೆಯಾದರೆ, ಅಧಿವೇಶನದ ಹೊರಗಡೆ ತಮ್ಮ ಹಕ್ಕಿಗಾಗಿ-ಮೂಲಸೌಲಭ್ಯಕ್ಕಾಗಿ ಪ್ರತಿಭಟನೆ ನಡೆಸುವ ಜನರು. ಇದು ಪ್ರತಿ ಬಾರಿಯೂ ಕಾಣುವ ದೃಶ್ಯ. ಹೀಗಾಗಿ ವಿಪರೀತ ಖರ್ಚು ಮಾಡಿ ಯಾವ ಪುರುಷಾರ್ಥಕ್ಕಾಗಿ ಅಧಿವೇಶನ ನಡೆಸಲಾಗುತ್ತಿದೆ ಎಂಬ ಜಿಜ್ಞಾಸೆ ನಾಗರಿಕರಿಗೆ ಕಾಡುತ್ತಿದೆ. ಹಾಗಾಗಿ, ಅಧಿವೇಶನ ಸಾರ್ಥಕವಾಗಿ ನಡೆಯಬೇಕು, ರಾಜಕೀಯ ಉದ್ದೇಶಗಳಿಗಾಗಿ ಕಲಾಪ ಹಾಳಾಗಾಬಾರದು ಎಂಬ ಕಾಳಜಿ ಆಡಳಿತ ಪಕ್ಷಕ್ಕೂ, ವಿರೋಧ ಪಕ್ಷದವರಿಗೂ ಅಗತ್ಯ.
