ಶಿಕ್ಷಣವನ್ನು ಪೂರ್ಣಗೊಳಿಸಿದ ಯುವ ಸಮುದಾಯ ಉದ್ಯೋಗ ಅವಕಾಶಗಳನ್ನು ಅರಸುತ್ತಿರುತ್ತದೆ. ಕೆಲಸ ಪಡೆದು, ಉತ್ತಮ ಬದುಕು ಕಟ್ಟಿಕೊಳ್ಳಬೇಕು ಎಂಬ ನಿರೀಕ್ಷೆ ಬಹುತೇಕರದ್ದು. ಇದಕ್ಕಾಗಿ ಹಲವು ಆಯಾಮದ ತಯಾರಿ ನಡೆಸಿರುತ್ತಾರೆ. ಪರೀಕ್ಷೆಗಳನ್ನು ಬರೆದಿರುತ್ತಾರೆ. ಈ ನಿಟ್ಟಿನಲ್ಲಿ ವ್ಯಯಿಸಿದ ಸಮಯ ಅಮೂಲ್ಯವಾಗಿರುತ್ತದೆ ಮತ್ತು ಶ್ರಮ ಕೂಡ. ಆದರೆ, ಸರ್ಕಾರ ಆಗಾಗ ನಿಯಮಗಳಲ್ಲಿ ಸೂಕ್ತವಲ್ಲದ ಬದಲಾವಣೆಗಳನ್ನು ತರುವುದರಿಂದ ಉದ್ಯೋಕಾಂಕ್ಷಿಗಳು ಕಷ್ಟಕ್ಕೆ ಸಿಲುಕುತ್ತಾರೆ. ಉದ್ಯೋಗಾಕಾಂಕ್ಷಿಗಳಿಗೆ ಪೂರಕವಾದ, ಯುವಕರ ಕನಸುಗಳಿಗೆ ರೆಕ್ಕೆ ಮೂಡಿಸುವಂಥ ನೀತಿಯನ್ನು ರೂಪಿಸುವುದು ಸಂಬಂಧಪಟ್ಟ ವ್ಯವಸ್ಥೆಯ ಆದ್ಯ ಕರ್ತವ್ಯ. ಆದರೆ, ನೇಮಕಾತಿ ಪ್ರಕ್ರಿಯೆಗಳು ದಿನಕಳೆದಂತೆ ಗೊಂದಲದ ಗೂಡಾಗಿ ಮಾರ್ಪಡುತ್ತಿರುವುದು ವಿಷಾದನೀಯ. ಉದ್ಯೋಗ ನೇಮಕಾತಿಯ ನೀತಿಗಳು ಸರಳವಾಗಿರಬೇಕು, ಪಾರದರ್ಶಕವಾಗಿರಬೇಕು ಎಂಬ ಆಶಯಗಳು ಅನುಷ್ಠಾನದ ರೂಪಕ್ಕೆ ಬಂದಾಗ ಮಾತ್ರ ವ್ಯವಸ್ಥೆಯಲ್ಲಿ ಬದಲಾವಣೆ ಕಾಣಲು ಸಾಧ್ಯ.
