ನಗರದ ಬ್ಯಾಂಕ್ ಗ್ರಾಹಕರಿಗೆ ಹೋಲಿಸಿದರೆ ಗ್ರಾಮೀಣ ಶಾಖೆಗಳ ಗ್ರಾಹಕರನ್ನು ಖುಷಿಪಡಿಸುವುದು ಸುಲಭ. ಅವರ ಸುಖ ದುಃಖ ವಿಚಾರಿಸಿದರೆ, ಸಲಹೆ ನೀಡಿದರೆ, ಅವರ ಮನೆಯ ಸಮಾರಂಭಗಳಿಗೆ ಹೋದರೆ ಅಷ್ಟೇ ಸಾಕು. ತುಂಬಾ ಸಂತೋಷಪಡುತ್ತಾರೆ. ಅವರು ಬೆಳೆದ ತರಕಾರಿ, ಹಣ್ಣುಗಳನ್ನು ಪ್ರೀತಿಯಿಂದ ಕೊಡುತ್ತಾರೆ. ನಗರದ ಪ್ರತಿಷ್ಠಿತ ಗ್ರಾಹಕರಿಗೆ ಎಷ್ಟು ಸೇವೆ, ಗೌರವ ನೀಡಿದರೂ ಸಾಕಾಗುವುದಿಲ್ಲ. ದೀಪಾವಳಿ, ಕ್ರಿಸ್ವುಸ್, ಹೊಸವರ್ಷ ಮುಂತಾದ ಸಂದರ್ಭಗಳಲ್ಲಿ ಅವರು ಭಾರೀ ಉಡುಗೊರೆ ನಿರೀಕ್ಷಿಸುತ್ತಾರೆ. ಒಮ್ಮೆ ನಾನು ನಮ್ಮ ಶಾಖೆಯಲ್ಲಿ ಒಳ್ಳೆಯ ಠೇವಣಿ ಇಟ್ಟ ಸರ್ಕಾರಿ ಇಲಾಖೆಯ ಮುಖ್ಯಸ್ಥರಿಗೆ ಒಂದು ಲೆದರ್ ಪರ್ಸನ್ನು ಉಡುಗೊರೆಯಾಗಿ ಕೊಟ್ಟೆ. ಅವರು ‘ಏನ್ರೀ? ಖಾಲಿ ಪರ್ಸ್ ಕೊಟ್ಟಿದ್ದೀರಲ್ಲ’ ಎಂದು ಠೇವಣಿ ನೀಡಿದ್ದಕ್ಕೆ ತಮಗೆ ಕಮಿಷನ್ ಬೇಕೆಂಬುದನ್ನು ಸೂಚ್ಯವಾಗಿ ಹೇಳಿದರು.
