ಹೋಳಿ ಹಬ್ಬದಂದು ಸಾಮಾನ್ಯವಾಗಿ ಎಲ್ಲೆಡೆ ಪುರುಷರು ಹಾಗೂ ಸ್ತ್ರೀಯರು ಬಣ್ಣದ ಓಕಳಿ ಆಟವಾಡಿದರೆ ಉತ್ತರ ಪ್ರದೇಶದ ಮಥುರಾದಲ್ಲಿ ಹೆಂಗಸರು ಕೋಲಿನಿಂದ ಗಂಡಸರನ್ನು ಹೊಡೆಯುವ ಸಂಪ್ರದಾಯವಿದೆ. ಇದರ ಹೆಸರು ಲಾತ್ವಾರ್ ಹೋಳಿ (ಕೋಲಿನಿಂದ ಹೊಡೆಯುವ ಹೋಳಿ ಎಂದರ್ಥ). ಇಲ್ಲಿರುವ ಬರ್ಸಾನಾ ಎಂಬ ಹಳ್ಳಿಯಲ್ಲಿರುವ ರಾಧಾ- ರಾಣಿ ದೇವಾಲಯದಲ್ಲಿ ಉತ್ಸವ ಆರಂಭವಾಗುತ್ತದೆ. ಪುರುಷರು ಮತ್ತು ಮಹಿಳೆಯರು ಇಲ್ಲಿ ಸೇರುತ್ತಾರೆ. ಮೊದಲು ಗಂಡಸರು ಗ್ರಾಮದ ಹೆಣ್ಣುಮಕ್ಕಳಿಗೆ ಬಣ್ಣ ಹಚ್ಚಲು ಪ್ರಯತ್ನಿಸುತ್ತಾರೆ. ಅವರಿಂದ ತಪ್ಪಿಸಿಕೊಳ್ಳಲು ಹೆಣ್ಣುಮಕ್ಕಳು ಕೋಲಿನಿಂದ ಹೊಡೆಯುತ್ತಾರೆ. ಈ ಹೊಡೆತ ತಪ್ಪಿಸಿಕೊಳ್ಳಲು ಗಂಡಸರು ಅಡ್ಡಲಾಗಿ ಗುರಾಣಿ ಹಿಡಿದುಕೊಳ್ಳುತ್ತಾರೆ. ಪತಿಯೇ ಪರದೈವ ಎಂದುಕೊಳ್ಳುವ ಭಾರತೀಯ ಹೆಂಗಸರು ಮನೆಯಲ್ಲಿ ಗಂಡನನ್ನು ಹೊಡೆಯಲು ಆಗದಿದ್ದರೂ ಬೇರೆ ಗಂಡಸರನ್ನು ಹೊಡೆದು ಸಮಾಧಾನ ಪಟ್ಟುಕೊಳ್ಳಲೋ ಎಂಬಂತೆ ಗುರಾಣಿ ಹಿಡಿದಿದ್ದರೂ ಬಿಡದೆ ಬೇರೆ ಗಂಡಸರನ್ನು ಹೊಡೆಯಲು ಮುಂದಾಗುತ್ತಾರೆ. ಈ ದೃಶ್ಯ ನೋಡುಗರಿಗೆ ಬಲು ಮೋಜು ಎನ್ನಿಸುತ್ತದೆ. ಈ ಸಂಪ್ರದಾಯವನ್ನು ಒಂದು ಶತಮಾನದಿಂದ ಆಚರಿಸಿಕೊಂಡು ಬರಲಾಗಿದೆ.
