ವೈದ್ಯರೆಂಬ ಬಿರುದು ಮಾತ್ರವೇ ಸಾಕೇ?

ಆದರ್ಶ ವೈದ್ಯರ ಕುರಿತಾದ ವಿವರಣೆಯೂ ಪರಿಪಕ್ವವಾಗಿದೆ. ವೈದ್ಯನು ಶಾಸ್ತ್ರಜ್ಞ ಹಾಗೂ ಕರ್ಮಜ್ಞ ಎರಡೂ ಆಗಿರಬೇಕು. ಶಾಸ್ತ್ರದಲ್ಲಿ ಸಂಪೂರ್ಣ ಪರಿಣತಿ ಹೊಂದಿರಬೇಕು. ದೃಷ್ಟಕರ್ವ ಅರ್ಥಾತ್ ಚಿಕಿತ್ಸೆ ಹಾಗೂ ಔಷಧ ತಯಾರಿಕೆಯನ್ನು ಸ್ವತಃ ನೋಡಿ ಕಲಿತಿರಬೇಕು. ಇವುಗಳಲ್ಲಿ ಒಂದಿಲ್ಲದಿದ್ದರೂ ಒಂದೇ ರೆಕ್ಕೆಯಿರುವ ಪಕ್ಷಿಯಂತಾಗುತ್ತದೆ. ವೈದ್ಯರಲ್ಲಿ ಯಾರು ಉತ್ತಮ ಎಂಬ ಪ್ರಶ್ನೆಗೆ ನೀಡಿರುವ ಉತ್ತರವೂ ಪ್ರಶಸ್ತವಾಗಿದೆ. ಔಷಧ ಯೋಗಗಳ ಪ್ರಯೋಗ ಚೆನ್ನಾಗಿ ಅರಿತಿರುವ, ದೇಶ ಹಾಗೂ ಕಾಲಗಳ ಪರಿಗಣನೆಯನ್ನು ಸರಿಯಾಗಿ ಮಾಡಲು ಗೊತ್ತಿರುವ, ಪ್ರತಿ ವ್ಯಕ್ತಿಯ ಸೂಕ್ಷ್ಮಗಳನ್ನು ವೀಕ್ಷಿಸಬಲ್ಲ ವೈದ್ಯನೇ ಶ್ರೇಷ್ಠ ಎಂಬ ಒಕ್ಕಣೆಯಿದೆ. ಗುರುಮುಖದಿಂದಲೇ ಶಾಸ್ತ್ರಬೋಧನೆ ನಡೆದು ಗ್ರಂಥಗಳ ಜ್ಞಾನವನ್ನು ಪಡೆದುಕೊಂಡು ಅವುಗಳನ್ನು ಅನುಷ್ಠಾನ ಮಾಡುವವನೇ ನಿಜವಾದ ವೈದ್ಯ. ಹೀಗಿಲ್ಲದಿದ್ದರೆ ಅವರು ಧನ ಹಾಗೂ ಪ್ರಾಣ ಎರಡನ್ನೂ ಅಪಹರಿಸುವುದರಿಂದ ವೈದ್ಯರಲ್ಲ, ತಸ್ಕರರು ಅರ್ಥಾತ್ ಕಳ್ಳರು! ನಾಡೀ, ಮೂತ್ರ, ಮಲ, ನಾಲಿಗೆ, ಕಿವಿ, ಚರ್ಮ, ಕಣ್ಣು ಹಾಗೂ ಶರೀರದ ಪರೀಕ್ಷೆಯನ್ನು ಸೂಕ್ತವಾಗಿ ಮಾಡಲು ಬರದ ವೈದ್ಯರು ಯಮನಂತೆ ಪ್ರಾಣಹರ ಆಗಿಬಿಡುತ್ತಾರೆ. ಹಾಗಾಗಿ ವೈದ್ಯನಾದವನು ಪರಿಪಕ್ವತೆ ಹೊಂದಿರಬೇಕಾದುದು ಕರ್ತವ್ಯವಾಗುತ್ತದೆ ಎಂದು ಎಚ್ಚರಿಸಲಾಗಿದೆ.

ಚರಕ ಸಂಹಿತೆಯು ರಾಜಾರ್ಹ ಭಿಷಕ್ ಬಗ್ಗೆ ಉಲ್ಲೇಖಿಸಿದೆ. ರೋಗ ಬಂದ ಕಾರಣ, ಲಕ್ಷಣ, ಕಾಯಿಲೆ ಗುಣಪಡಿಸುವ ವಿಧಾನ, ರೋಗವು ಪುನಃ ಬರದಂತೆ ಮೂಲದಿಂದಲೇ ಕಿತ್ತೆಸೆಯುವ ಮಾಗೋಪಾಯ- ಈ ನಾಲ್ಕರ ಜ್ಞಾನವುಳ್ಳ ವೈದ್ಯರೇ ಅತ್ಯುತ್ತಮರು ಹಾಗೂ ರಾಜರಿಗೆ ಚಿಕಿತ್ಸೆ ನೀಡಲೂ ಅರ್ಹರು. ಹಾಗಾಗಿ ಇಂತಹ ಶ್ರೇಷ್ಠ ವೈದ್ಯರನ್ನು ರಾಜಾರ್ಹ ಭಿಷಕ್ ಎಂದು ಕೊಂಡಾಡಿದೆ.

ಹೇತು ಅಂದರೆ ಕಾರಣ, ಲಿಂಗ ಅಂದರೆ ಲಕ್ಷಣ ಹಾಗೂ ಔಷಧ ಅಂದರೆ ಚಿಕಿತ್ಸಾ ದ್ರವ್ಯ - ಮೂರೂ ಸೇರಿದರೆ ತ್ರಿಸೂತ್ರಗಳು. ಇವುಗಳ ಜ್ಞಾನ ಶಾಶ್ವತ ಹಾಗೂ ಪುಣ್ಯಪ್ರದ ಎಂಬುದು ಸೃಷ್ಟಿಕರ್ತ ಬ್ರಹ್ಮನಿಂದಲೇ ಸ್ಮರಿಸಿ ಹೇಳಲ್ಪಟ್ಟಿರುವುದು ಗಣನೀಯವಾಗಿದೆ. ಒಂದೇ ಶಾಸ್ತ್ರವನ್ನು ಅಧ್ಯಯನ ಮಾಡಿದರೆ ಜ್ಞಾನವು ಪರಿಪೂರ್ಣವಾಗಿ ಗ್ರಾಹ್ಯವಾಗುವುದಿಲ್ಲ. ಆದುದರಿಂದ ವೈದ್ಯನಾದವನು ಹಲವಾರು ವಿಷಯಗಳ ಜ್ಞಾನವನ್ನು ಪಡೆದುಕೊಂಡು ಬಹುಶ್ರುತ ಆಗಬೇಕೆಂಬುದು ಸರ್ವಕಾಲಕ್ಕೂ ಅನ್ವಯವಾಗುವ ಸುಶ್ರುತ ಸಂಹಿತೆಯ ವಾಕ್ಯ. ಒಂದು ವಿದ್ಯೆ ಅಥವಾ ಗ್ರಂಥದ ಸಂಪೂರ್ಣ ಜ್ಞಾನವನ್ನು ಹೊಂದಿ ಶಾಸ್ತ್ರ, ತಂತ್ರಯುಕ್ತಿಗಳನ್ನು ಸಮ್ಯಕ್ ರೀತಿಯಲ್ಲಿ ಬಲ್ಲ ವೈದ್ಯರು ಉಳಿದ ವೈದ್ಯ ವಿಭಾಗ ಹಾಗೂ ವಿಜ್ಞಾನಗಳನ್ನು ಯುಕ್ತಿಯಿಂದಲೇ ಗ್ರಹಿಸಲು ಶಕ್ತರಾಗುತ್ತಾರೆ ಎಂಬ ಚರಕಸಂಹಿತೆಯ ಮಾತೂ ಇಲ್ಲಿ ಪ್ರಸ್ತುತವಾಗುತ್ತದೆ.

https://www.vijayavani.net/rise-in-sudden-heart-attacks-among-healthy-young-indians-here-is-the-survey-details/

https://www.vijayavani.net/years-of-frustration-made-actress-veena-kapoors-son-murder-her/