‘ಕಾಡು ಬೆಳೆಸಿ -ನಾಡು ಉಳಿಸಿ’ ಎಂಬ ಹೇಳಿಕೆ ಚಾಲ್ತಿಯಲ್ಲಿರೋದೇನೊ ನಿಜ. ಆದ್ರೆ, ನಾವು ಅದೆಷ್ಟು ಜನ ಅರಣ್ಯ ಭೂಮಿಗೆ ಪ್ರಾಮುಖ್ಯತೆ ಕೊಡ್ತಿದ್ದೀವಿ? ಲೆಕ್ಕ ಹಾಕಿದ್ರೆ, ಬೆರಳೆಣಿಕೆಯಷ್ಟು ಮಾತ್ರ. ನಮಗೆ ಕೂರೋಕೆ ಕುರ್ಚಿ, ಟೇಬಲ್, ಮಲಗೋ ಮಂಚ ಹೀಗೆ ಪ್ರತಿಯೊಂದು ಪೀಠೋಪಕರಣಗಳಿಗೆ ಮರಗಳು ಬೇಕೇ ಬೇಕು. ಅಷ್ಟೇ ಯಾಕೆ, ನಾವೀಗ ಓದುತ್ತಿರುವ ಈ ದಿನಪತ್ರಿಕೆ ಕೂಡ ಮರದ ಉತ್ಪನ್ನವೇ. ಆದ್ರೆ, ಲಭ್ಯವಿರುವ ಮರಗಳ ಸಂಖ್ಯೆ ಮಾತ್ರ ಬಹಳ ಕಡಿಮೆ. ನಮ್ಮ ದೇಶದಲ್ಲಿ ಶೇ.24.82 ಮಾತ್ರ ಅರಣ್ಯ ಭೂಮಿ ಇದೆ. ಆದ್ರೆ, ಭೌಗೋಳಿಕವಾಗಿ ಇದು ಶೇ.34 ಇರಬೇಕಿದೆ. ಸದ್ಯ ನಾವು ಶೇ.60 ಮರ ಅಥವಾ ಮರದ ಉತ್ಪನ್ನಗಳನ್ನು ಬೇರೆ ದೇಶದಿಂದ ನಮ್ಮ ದೇಶಕ್ಕೆ ಆಮದು ಮಾಡಿಕೊಳ್ಳುತ್ತಿದ್ದೇವೆ. ಹೀಗೆ ಆದ್ರೆ, ನಾವು ಪ್ರತಿಯೊಂದಕ್ಕೂ ಬೇರೆ ದೇಶಗಳನ್ನು ಅವಲಂಬಿಸುವ ಪರಿಸ್ಥಿತಿ ಬರುತ್ತೆ. ಆಗ ನಮ್ಮ ಆತ್ಮನಿರ್ಭರ ಭಾರತದ ಕನಸು ಕನಸಾಗೇ ಉಳಿಯುತ್ತೆ. ಇವೆಲ್ಲವನ್ನೂ ಮೆಟ್ಟಿ ನಿಲ್ಲೋಕೆ ನಾವು ಅರಣ್ಯ ಕೃಷಿಗೆ ಪ್ರಾಧಾನ್ಯತೆ ಕೊಡಬೇಕಿದೆ. ಹೆಚ್ಚೆಚ್ಚು ಮರಗಳನ್ನು ಬೆಳೆಸಬೇಕಿದೆ. ನೀವು ನಂಬಲ್ಲ, ಅರಣ್ಯ ಕೃಷಿಯಲ್ಲಿ ಒಂದಲ್ಲ ಎರಡಲ್ಲ ಬರೋಬ್ಬರಿ 10 ಕೋಟಿ ರೂ. ಸಂಪಾದನೆ ಮಾಡಿರುವ ರೈತರಿದ್ದಾರೆ. ಒಂದು ಎಕರೆ ಜಮೀನಿನಲ್ಲಿ ಅರಣ್ಯ ಕೃಷಿ ಬೆಳೆಯಿಂದ ಕೋಟ್ಯಂತರ ರೂ. ಸಂಪಾದನೆ ಮಾಡುತ್ತಾ ಯಶೋಗಾಥೆ ಮೆರೆಯುತ್ತಿದ್ದಾರೆ. ಅದು ಹೇಗೆ ಸಾಧ್ಯ ಎಂಬ ವಿವರಣೆ ಈ ಅಂಕಣದಲ್ಲಿದೆ.
