ಸಂಜೆ ಮರದಡಿಯಲ್ಲಿ ಕುಳಿತು ದಣಿವಾರಿಸಿಕೊಳ್ಳುವಾಗ ಗುರುಗಳು ಹೇಳಿದರು- ‘ಈ ರಾಜ್ಯವನ್ನು ನಾನಿಟ್ಟುಕೊಂಡು ಏನು ಮಾಡಲಿ?! ನನಗೆ ಕೊಟ್ಟ ರಾಜ್ಯವನ್ನು ನಿನಗೆ ನೀಡುತ್ತಿರುವೆ. ನನ್ನ ಈ ರಾಜ್ಯವನ್ನು ನಿನಗೆ ನೋಡಿಕೊಳ್ಳಲು ನೇಮಿಸುತ್ತಿದ್ದೇನೆ’ ಎಂದು. ಗುರುಗಳ ಮಾತನ್ನು ಮತ್ತದೇ ವಿನೀತ ಭಾವದಿಂದ ಸ್ವೀಕಾರ ಮಾಡಿದ ಶಿವಾಜಿ ಗುರುಗಳ ಹೆಸರಲ್ಲಿ ಜನಾನುರಾಗಿ ಆಡಳಿತವನ್ನು ನೀಡಿದ. ಹೌದು, ಅದು ರಾಜ, ಪ್ರಧಾನಿ, ಮುಖ್ಯಮಂತ್ರಿ, ಮಂತ್ರಿ, ಅಧಿಕಾರಿ ಯಾರೇ ಆಗಲಿ ಅವರು ಜನರ ಸೇವಕರೇ ಹೊರತು ಒಡೆಯರಲ್ಲ. ಅಧಿಕಾರ ಎನ್ನುವುದು ಸೇವೆ ಮಾಡಲು ಭಗವಂತ ಕೊಟ್ಟ ಅವಕಾಶ. ಹಾಗಾಗಿ ಹೇಳುವುದು ರಾಜಾ ಯಾವತ್ತೂ ಬಡವ ಎಂದು. ‘ಏಷಾಂ ರಾಜಾ ಬೂಯಾಸಂ’, ಇದು ಉಪನಿಷತ್ತಿನ ಮಾತು. ಅಂದರೆ ‘ಒಳ್ಳೆಯ ರಾಜನ ಪ್ರಭುತ್ವ ಜನರಿಗೆ ಸಿಗಲಿ’ ಎಂದು. ಸೇವೆಗೆ ನಿಂತವ ಕಾಲ ಸಂದರೂ ಎಲ್ಲರೊಳಗೆ ನೆನಪಾರದೆ ಉಳಿಯುತ್ತಾನೆ. ಆತನನ್ನು ಇತಿಹಾಸ ಎಂದೆಂದೂ ಒಳ್ಳೆಯ ಕಾರಣಕ್ಕಾಗಿ ಸ್ಮರಿಸುತ್ತದೆ.
