ಇಂತಹ ಎಂದಿಗೂ ರಾಜಿಯಾಗದ ನಿಯಮಗಳ ಗುಚ್ಛವೊಂದು ಜಗತ್ತನ್ನು ಆಳುತ್ತಿದೆ, ಅದನ್ನು ತಿಳಿದು ಅನುಷ್ಠಾನಿಸಿಕೊಂಡು ಹೋಗಬೇಕಾದ ಅನಿವಾರ್ಯತೆ ಜೀವನವನ್ನು ಗಂಭೀರವಾಗಿ ತೆಗೆದುಕೊಂಡ ಪ್ರತಿಯೊಬ್ಬನ ಕರ್ತವ್ಯ ಎಂದು ಘೊಷಿಸಿದ್ದು, ಆ ನಿಯಮಗಳನ್ನೆಲ್ಲಾ ಸ್ಪಷ್ಟವಾಗಿ ವ್ಯಾಖ್ಯಾನಿಸಿದ್ದೂ, ಅವುಗಳ ಮಹತ್ವವೇನು ಎಂಬುದನ್ನು ತನ್ನ ಭೌಗೋಳಿಕ ಮೇರೆಯೊಳಗೆ ನಡೆದ ಘಟನಾವಳಿಗಳನ್ನೇ ಉದಾಹರಣೆಯನ್ನಾಗಿಸಿಕೊಂಡು, ದಾಖಲಿಸಿ, ಮುಂದಿನ ತಲೆಮಾರುಗಳಿಗೆ ಮಾರ್ಗದರ್ಶಕ ಸೂತ್ರಗಳಾಗಿ ನಿರ್ವಿುಸಿ, ಸ್ಪಷ್ಟರೂಪದಲ್ಲಿ ಸಂಗ್ರಹಿಸಿ ಪ್ರೌಢಿಮೆ ಮತ್ತು ದೂರದರ್ಶಿತ್ವಗಳನ್ನು ಮೆರೆದಿದ್ದು ಇಡೀ ಜಾಗತಿಕ ಇತಿಹಾಸದಲ್ಲಿ ಆರ್ಯ ಜನಾಂಗ ಅಥವಾ ಭಾರತೀಯ ಜನಾಂಗವೇ ಮೊಟ್ಟಮೊದಲು. ಬೇರೆಲ್ಲೆಡೆಗೂ ಅದು ವ್ಯಾಪಿಸಿದ್ದು ಇಲ್ಲಿಂದಲೇ. ಇನ್ನು ಮುಂದೆ ವ್ಯಾಪಿಸಬೇಕಾದ್ದೂ ಇಲ್ಲಿಂದಲೇ. ಆದ್ದರಿಂದಲೇ ವಿಧಾತ, ಸೃಷ್ಟಿಕರ್ತ ಈ ಸೂತ್ರಗುಚ್ಛ ಅಥವಾ ಮೌಲ್ಯ ಸಂಗ್ರಹ ಎಂದಿಗೂ ಮಾಸದಂತೆ, ಕುಸಿಯದಂತೆ, ಹಳೆಯದಾಗದಂತೆ, ಅಪ್ರಸ್ತುತವಾಗದಂತೆ ಕಾಲಕಾಲಕ್ಕೆ ಅವುಗಳನ್ನು ಪರಿಷ್ಕರಿಸಲು, ನವೀಕರಿಸಲು, ಪರಿಪೂರ್ಣವಾಗಿಸಲು ಸ್ವಯಂ ತಾನೇ ಒಂದು ಸೂಕ್ಷ್ಮ ರೀತಿಯಲ್ಲಿ ಸಾಧಿಸುತ್ತಾ ಬರುತ್ತಾನೆ. ಅವನು ಹಾಗೆ ಬಂದು ಕಾರ್ಯಪ್ರವೃತ್ತನಾದಾಗ ಅದರ ಹಿಂದಿನ ಗಹನತೆ, ಮಹತ್ವಗಳ ಇಂಗಿತ ಎಳ್ಳಷ್ಟೂ ಸಿಗದಂತೆ ಅತ್ಯಂತ ಸಹಜ ರೀತಿಯಲ್ಲಿ ಇದನ್ನು ನಿರ್ವಹಿಸಿಬಿಡುತ್ತಾನೆ. ಅವನನ್ನೇ ಭಾರತೀಯ ಜೀವನಸಂಹಿತೆ ‘ಯುಗಪುರುಷ’ , ‘ಅವತಾರ’ ಇತ್ಯಾದಿಯಾಗಿ ಕರೆಯುತ್ತದೆ.
