ಮುಗಿದ ಮೇಲೆ ಮಾತಾಡಬಾರದು: ಒಂದು ಡೀಲ್ ಇರಬಹುದು, ಒಂದು ವಾದ ಇರಬಹುದು. ಎದುರುಗಡೆಯವರು ಒಪ್ಪಿಕೊಂಡ ಮೇಲೆ ಏನೂ ಹೇಳಲು ಹೋಗಬಾರದು. ಒಬ್ಬ ಬಟ್ಟೆ ಮಾರಾಟ ಮಾಡುತ್ತಿದ್ದ. ಅದರ ಎಲ್ಲ ಗುಣಗಾನ ಕೇಳಿದ ಗ್ರಾಹಕ, ‘ಪ್ರತಿ ವಾರ ಸಾವಿರ ಮೀಟರ್ ಬಟ್ಟೆ ಬೇಕು’ ಎಂದ. ವ್ಯಾಪಾರದ ಪ್ರಕ್ರಿಯೆ ಮುಕ್ತಾಯಕ್ಕೆ ಬಂದಾಗ ಆ ವ್ಯಾಪಾರಿ ಅತ್ಯುತ್ಸಾಹದಲ್ಲಿ, ‘ಈ ಬಟ್ಟೆ ಬೆಂಕಿಗೆ ಹಾಕಿದರೂ ಸುಡುವುದಿಲ್ಲ’ ಎಂದುಬಿಟ್ಟ. ಆಗ ಗಿರಾಕಿ, ‘ಅಯ್ಯಯ್ಯೋ, ಬೆಂಕಿಗೆ ಹಾಕಿದರೆ ಸುಡದೆ ಇರುವ ಬಟ್ಟೆ ನನ್ನ ಕೆಲಸಕ್ಕೆ ಬರುವುದಿಲ್ಲ’ ಎಂದು ಹೇಳಿ ಆರ್ಡರನ್ನು ರದ್ದುಗೊಳಿಸಿದ. ಗ್ರಾಹಕ ವ್ಯಾಪಾರ ಮುಗಿಸಿದ ನಂತರ ಅದರ ಬಗ್ಗೆ ಮತ್ತೆ ಹೊಗಳುವ ಅಗತ್ಯವೇ ಇರಲಿಲ್ಲ. ಹಾಗೆಯೇ ರಸ್ತೆಯಲ್ಲಿ ಆಗುವ ಬಹಳಷ್ಟು ಹೊಡೆದಾಟ, ಗಲಾಟೆಗಳಿಗೆ ಕಾರಣ ಮಾತು ಮುಗಿದ ಮೇಲೂ ಮಾತನಾಡೋದು. ‘ಹೋಗ್ರಪ್ಪಾ, ಮುಗಿದು ಹೋಯ್ತಲ್ಲಾ’ ಎಂದು ಇಬ್ಬರನ್ನೂ ದೂರ ಮಾಡಿದಾಗ, ಹೋಗುತ್ತಿದ್ದವನು ‘ಮಗನೇ ನನ್ ಕೈಗೆ ಸಿಗು, ನಿಂಗೇನು ಮಾಡ್ತೀನಿ ನೋಡು’ ಅಂದಾಗ ಮತ್ತೊಬ್ಬನಿಗೆ ಕೋಪ ಉಕ್ಕೇರಿ ಸಿಕ್ಕಿದ್ದರಲ್ಲಿ ಹೊಡೆದು ಸಾಯಿಸಿರೋದನ್ನು ನಾವು ನೋಡಿದ್ದೇವೆ. ‘ಹೋಗ್ಲಿ ಬಿಡು. ಅವನಿಗಾದ ನಷ್ಟಕ್ಕೆ ಒಂದಿನ್ನೂರು ರೂಪಾಯಿ ಕೊಟ್ಟು ಹೋಗು’ ಅಂದಾಗ ಕೊಟ್ಟು ಸುಮ್ಮನೆ ಹೋಗುವುದು ಬಿಟ್ಟು ಮತ್ತೂ ಏನೋ ಮಾತಾಡಲು ಹೋಗಿ ಅದು ಬಗೆಹರಿಸಲಾಗದಷ್ಟು ವಿಕೋಪಕ್ಕೆ ತಿರುಗುವುದೂ ಇದೆ.
