ಹೀಗೇ ಕರೆಯಬೇಕೆಂಬ ಒತ್ತಾಯ ಬೇಡ: ಇದು ಕೇವಲ ಅತ್ತೆ, ಮಾವ ಇವರಿಗೆ ಮಾತ್ರ ಸಂಬಂಧಿಸಿದ್ದಲ್ಲ. ಇನ್ನೂ ಕೆಲವು ಸಂಬಂಧಗಳಲ್ಲಿ ಕೆಲವರಿಗೆ ಕೆಲವು ನಿರೀಕ್ಷೆಗಳು ಇರುತ್ತವೆೆ. ತಮ್ಮನ್ನು ಈ ರೀತಿಯಾಗೇ ಕರೆಯಬೇಕು ಎಂಬ ನಿರೀಕ್ಷೆ ಸರಿಯೇ. ಆದರೆ ಅದು ಕೈಗೂಡದಿದ್ದರೆ ಸುಮ್ಮನಾಗುವುದು ಲೇಸು ಅಥವಾ ಅದನ್ನು ನಿಜ ಮಾಡಿಕೊಳ್ಳುವ ಒಳ್ಳೆಯ ಪ್ರಯತ್ನದಲ್ಲಿ ತೊಡಗಬಹುದು. ಸಾಮಾನ್ಯವಾಗಿ ನಾವು ಹಿರಿಯ ಮಹಿಳೆಯರಿಗೆ ಸುಲಭವಾಗಿ ಅಮ್ಮ ಎಂದುಬಿಡುತ್ತೇವೆ. ಅವರು ಸಂಬಂಧಿಕರು, ಪರಿಚಯಸ್ಥರು, ನೆರೆಹೊರೆಯವರು, ಸ್ನೇಹಿತರ ಸಂಬಂಧಿಗಳು, ಹಿರಿಯ ಸಹೋದ್ಯೋಗಿಗಳು ಯಾರೇ ಆಗಿರಬಹುದು. ಆದರೆ ಇದೇ ಸಂಬಂಧದ ಹಿರಿಯ ಪುರುಷರಿಗೆ ಅಷ್ಟು ಸುಲಭವಾಗಿ ಅಪ್ಪ ಎಂದು ಹೇಳುವುದಿಲ್ಲ. ಕೆಲ ಸಂದರ್ಭಗಳಲ್ಲಿ, ಕೆಲವರ ಸಂಬಂಧಗಳಲ್ಲಿ, ಕೆಲ ಆಪ್ತರ ಬಗ್ಗೆ ಅಪ್ಪ, ಅಮ್ಮ, ಅಣ್ಣ, ಅಕ್ಕ... ಎಂಬ ವಾತ್ಸಲ್ಯ ಮೂಡಿದ್ದರೂ ಆ ರೀತಿ ಸಲೀಸಾಗಿ ಕರೆಯಲು ಆಗದೆ ಹೋಗಬಹುದು. ಆಗ ಆ ರೀತಿ ಕರೆಸಿಕೊಳ್ಳಬಯಸುವವರು ಹೀಗೇ ಕರೆಯಬೇಕು ಎಂದು ಒತ್ತಾಯಿಸದೆ, ಆಪ್ತರ ಭಾವನೆಗಳಿಗೆ ಬೆಲೆಕೊಡುವುದೇ ಗೌರವ.
