ಕಲ್ಯಾಣದ ಶರಣರಲ್ಲಿಯೇ ಅಪರೂಪದವರಾದ, ಶರಣರು ಉಂಡ ತಟ್ಟೆಗಳನ್ನು ಶುಚಿ ಮಾಡುತ್ತಿದ್ದ ಹಾಗೂ ಒಂದಗುಳ ಅನ್ನವೂ ಕೆಡಬಾರದೆನ್ನುವ ಕಾಯಕಪ್ರಜ್ಞೆಯುಳ್ಳ ನಿಜಪ್ರಸಾದಿ ಮರುಳಶಂಕರ ದೇವರನ್ನು ಕಥಾನಾಯಕನಾಗಿಸಿಕೊಂಡು ಆತ್ಮಕಥನ ಶೈಲಿಯಲ್ಲಿ ರಚಿಸಿದ ಕೃತಿ ಇದು. ಬಸವಾದಿ ಶರಣರ ಸಮಕಾಲೀನರಾದ ಮರುಳಶಂಕರದೇವರ ದೇಶ ಕಾಲದ ಚಿತ್ರಣ, ಆಫ್ಘಾನಿಸ್ತಾನದಿಂದ ಕಲ್ಯಾಣವರೆಗಿನ ಪ್ರವಾಸ, ಭಕ್ತಿ ಪಂಥದ ವಿವರಗಳು, ಕಲ್ಯಾಣದ ದಿನಚರಿ, ಅನುಭವ ಮಂಟಪ, ಮಹಾಮನೆಯ ಪರಿಸರ, ಲಿಂಗಾಯತ ಧರ್ಮದ ಸಾಹಿತ್ಯ-ಸಂಸ್ಕೃತಿಯ ವಿವರಗಳು, ಚರ್ಚೆಗಳನ್ನು ಕೃತಿ ಒಳಗೊಂಡಿದೆ. ‘ನನ್ನ ದೇಶ ಅಫಘಾನಿಸ್ತಾನ’ ಎಂಬ ಆತ್ಮಕಥನ ಶೈಲಿಯ ಕುತೂಹಲಕಾರಿ ನಿರೂಪಣೆಯೊಂದಿಗೆ ಆರಂಭಗೊಳ್ಳುವ ಕೃತಿಯಲ್ಲಿ ಅಫಘಾನಿಸ್ತಾನವು ಈ ಹಿಂದೆ ಅಪ್ಪಟ ಶಿವಭಕ್ತರ ದೇಶವಾಗಿರುವುದು, ಬುಡಕಟ್ಟು ಜನರ ನಾಡಾಗಿರುವುದು, ವಿಶ್ವಕ್ಕೆ ಅತ್ಯುತ್ತಮ ಕುದುರೆಗಳನ್ನು ಪೂರೈಸುವ ವ್ಯಾಪಾರ ಮಾಡುತ್ತಿರುವ ವಿವರಗಳನ್ನು ತಿಳಿಸುತ್ತ ಇತಿಹಾಸದ ಮೇಲೆಯೂ ಕೃತಿ ಬೆಳಕು ಚೆಲ್ಲುತ್ತದೆ.
