ಹಂದಿ ಸಾಕಣೆಯಲ್ಲಿ ಲಾಭ ಗಳಿಸುವುದು ಹೇಗೆ?: ಮಾಂಸ ಪ್ರಿಯರು ಹೆಚ್ಚಾಗಿ ಕುರಿ, ಕೋಳಿ, ಮೇಕೆ, ಮೀನು ಜತೆಗೆ ಹಂದಿ ಮಾಂಸ ಕೂಡ ಇಷ್ಟ ಪಡ್ತಾರೆ. ಹಂದಿ ಮಾಂಸ ಬಹಳ ರುಚಿಕರ ಮತ್ತು ಸ್ವಾದಿಷ್ಟಕರ ಕೂಡ. ಹಿಂದೆಲ್ಲ ಹಂದಿ ಮಾಂಸಕ್ಕೆ ಅಷ್ಟೇನೂ ಬೇಡಿಕೆ ಇಲ್ಲದ ಕಾರಣ ಈ ಮಾಂಸಕ್ಕೆ ಬೆಲೆಯೂ ಅಷ್ಟೇನು ಜಾಸ್ತಿ ಇರಲಿಲ್ಲ. ಆದರೆ, ಈಗ ಹಂದಿ ಮಾಂಸದ ಅನುಕೂಲಗಳನ್ನು ಜನರು ಅರಿತ ಕಾರಣದಿಂದ ಹಂದಿ ಮಾಂಸಕ್ಕೆ ಬೇಡಿಕೆ ಜತೆ ಬೆಲೆಯೂ ಹೆಚ್ಚಾಗುತ್ತಿದೆ. ಕರ್ನಾಟಕದಲ್ಲಿ ನೂರಾರು ಜನರು ಹಂದಿ ಸಾಕಣೆಯನ್ನು ಮುಖ್ಯ ಉದ್ಯಮವನ್ನಾಗಿಸಿಕೊಂಡಿದ್ದಾರೆ. ಇನ್ನು ಕೆಲವರು ಇದನ್ನು ಕೃಷಿ ಜತೆ ಉಪ ಕಸುಬಾಗಿ ಕೈಗೆತ್ತಿಕೊಂಡಿದ್ದಾರೆ. ಹಂದಿ ಸಾಕಣೆಯನ್ನು ದೊಡ್ಡ ಅಥವಾ ಸಣ್ಣ ಪ್ರಮಾಣದಲ್ಲಿ ಮಾಡಿದರೂ ಲಾಭವೇ. ಹಂದಿ ಸಾಕಣೆಗೆ ಹೆಚ್ಚು ಖರ್ಚಿಲ್ಲ. ಆದರೆ ಹಂದಿ ಮಾಂಸಕ್ಕೆ ಬೇಡಿಕೆ ಇದೆ. ಇದನ್ನು ಅರಿತಿರುವ ರೈತರು, ಉದ್ಯಮಿಗಳು ಹಂದಿ ಸಾಕಣೆಯಲ್ಲಿ ತೊಡಗಿ ವರ್ಷಕ್ಕೆ ಕೆಲ ಲಕ್ಷಗಳಿಂದ ಕೋಟ್ಯಂತರ ರೂಪಾಯಿವರೆಗೆ ಆದಾಯ ಗಳಿಸುತ್ತಿದ್ದಾರೆ. ಪ್ರತಿ ವರ್ಷ ಭಾರತದಲ್ಲಿ 12 ಸಾವಿರ ಕೋಟಿ ರೂ. ಮೌಲ್ಯದ ಹಂದಿ ಮಾಂಸ ಮಾರಾಟವಾಗುತ್ತಿದೆ. ಹಂದಿ ಮಾಂಸದ ಇಂದಿನ ರಿಟೇಲ್ ಬೆಲೆ ಕೆಜಿಗೆ 120ರಿಂದ 350 ರೂ. ಮತ್ತೊಂದು ವಿಷಯ ಏನಂದ್ರೆ, ಹಂದಿ ಸಾಕಣೆಗೆ ನಿಮಗೆ ವಿಶಾಲವಾದ ಜಾಗದ ಅಗತ್ಯ ಇಲ್ಲ. ಕೇವಲ ಅರ್ಧ ಎಕರೆಯಲ್ಲಿ 2,000 ಹಂದಿಗಳನ್ನು ಸಾಕಬಹುದು. ಒಂದು ಆರೋಗ್ಯಕರ ಹಂದಿಯ ತೂಕ 150 ಕೆಜಿಯಷ್ಟಿರುತ್ತೆ.
