ಚುನಾವಣೆಯಲ್ಲಿ ಪಕ್ಷದ ಕಳಪೆ ಪ್ರದರ್ಶನದಿಂದಾಗಿ ಸೇನೆ ನವಾಜ್ಗೆ ಷರತ್ತುಗಳನ್ನು ವಿಧಿಸಿತ್ತು. ಪ್ರಧಾನಿ ಹುದ್ದೆ ಬೇಕೆ? ಅಥವಾ ಪುತ್ರಿ ಪಂಜಾಬ್ ಮುಖ್ಯಮಂತ್ರಿ ಗಾದಿಗೆ ಏರಬೇಕೇ? ಯಾವುದಾದರೂ ಒಂದನ್ನು ಆರಿಸಿಕೊಳ್ಳಿ ಎಂದು ಸೇನೆ ಕಟ್ಟಪ್ಪಣೆ ಮಾಡಿತ್ತು. ಆಗ ಯೋಚಿಸಿದ ನವಾಜ್ ಷರೀಫ್, ದಿವಾಳಿಯಾಗಿರುವ ದೇಶಕ್ಕೆ ಸೇನೆ ಕಪಿಮುಷ್ಠಿಯಲ್ಲಿ ಪ್ರಧಾನಿಯಾಗುವುದಕ್ಕಿಂತ 12 ಕೋಟಿ ಜನಸಂಖ್ಯೆ ಹೊಂದಿರುವ ಪಂಜಾಬ್ ಪ್ರಾಂತ್ಯದ ಆಡಳಿತವನ್ನು ತಮ್ಮ ಉತ್ತರಾಧಿಕಾರಿಯಾದ ಮರ್ಯಮ್ ಗೆ ನೀಡಿದರೆ ಸಾಕೆಂದು ಒಪ್ಪಿಕೊಂಡರಂತೆ. ಇದರ ಹಿಂದೆ ಪುತ್ರಿ ಮರ್ಯಾಮ್ ಭವಿಷ್ಯವೂ ಇದೆ ಎಂಬುದು ಬೇರೆ ಮಾತು. ಇದನ್ನೆಲ್ಲ ಅರಿತೇ ಪ್ರಧಾನಿ ಸ್ಪರ್ಧೆಯಿಂದ ಹಿಂದೆ ಸರಿದಿದ್ದಾರೆ ಎಂದು ಪಾಕಿಸ್ತಾನ ಮುಸ್ಲಿಂ ಲೀಗ್-ನವಾಜ್ (ಪಿಎಂಎಲ್ -ಎನ್) ಪಕ್ಷದ ಮೂಲಗಳು ಮಾಧ್ಯಮಗಳಿಗೆ ತಿಳಿಸಿವೆ.
