ಮಾರನೆಯ ದಿನವೇ ಸಂಧ್ಯಾ ಮೋಹನ್ಗೆ ಕರೆ ಮಾಡಿ ತಾನು ಸುಧಾಳ ತಾಯಿಯೆಂದು ಪರಿಚಯಿಸಿಕೊಂಡು ಅವನನ್ನು ಭೇಟಿಮಾಡಲು ಕೋರಿದಳು. ಇದ್ದಕ್ಕಿದ್ದಂತೆ ಬಂದ ಈ ಕರೆಯಿಂದ ವಿಚಲಿತಗೊಂಡ ಮೋಹನ್ ಪಂಚತಾರಾ ಹೋಟೆಲ್ ಒಂದರ ಕಾಫಿಶಾಪ್ಗೆ ಬರಲು ಸಂಧ್ಯಾಳನ್ನು ಆಹ್ವಾನಿಸಿದ. ಆ ಭೇಟಿಯ ಕೆಲವು ನಿಮಿಷಗಳ ಸಂಭಾಷಣೆಯ ನಂತರ ಸಂಧ್ಯಾ, ‘ಅಪ್ರಾಪ್ತ ವಯಸ್ಕಳಾದ ನನ್ನ ಮಗಳನ್ನು ನಿನ್ನ ಬಲೆಯಲ್ಲಿ ಕೆಡವಿ ಆಕೆಯ ಜತೆಗೆ ಲೈಂಗಿಕ ಕ್ರಿಯೆ ನಡೆಸಿರುವುದು ನನಗೆ ಗೊತ್ತಾಗಿದೆ’ ಎಂದಾಗ ಮೋಹನ್ ಅವಾಕ್ಕಾದ, ಆದರೂ ಸಾವರಿಸಿಕೊಂಡು, ‘ಆಂಟಿ, ನಾನೊಬ್ಬ ಮರ್ಯಾದಸ್ತ ಯುವಕ, ಸುಳ್ಳು ಆಪಾದನೆ ಮಾಡಬೇಡಿ’ ಎಂದ. ಸಂಧ್ಯಾ ತನ್ನ ಮೊಬೈಲಿನಲ್ಲಿದ್ದ ವಿಡಿಯೋವನ್ನು ತೋರಿಸಿದಾಗ ಅವನಿಗೆ ಮಾತೇ ಹೊರಡದಾಗಿ ‘ಯಾರದೋ ದೇಹಗಳಿಗೆ ನಮ್ಮ ಮುಖಗಳನ್ನು ಅಂಟಿಸಿರಬಹುದು, ಈ ವಿಡಿಯೋದಲ್ಲಿ ಇರುವುದು ನಾನಲ್ಲವೇ ಅಲ್ಲ’ ಎಂದು ವಾದಿಸಿದ. ‘ಈ ವಿಡಿಯೋ ಅಸಲಿಯೋ ಇಲ್ಲವೇ ಮಾರ್ಫ್ ಆದದ್ದೋ ಎಂದು ಪೊಲೀಸರೇ ನಿರ್ಧರಿಸಲಿ, ಈಗಲೇ ಪೊಲೀಸ್ ಠಾಣೆಗೆ ಹೋಗಿ ನಿನ್ನ ಬಗ್ಗೆ ದೂರನ್ನು ಕೊಡುವೆ’ ಎಂದಳು ಸಂಧ್ಯಾ. ಆಗ ಹೆದರಿದ ಮೋಹನ್, ‘ನನ್ನಿಂದ ಅಚಾತುರ್ಯವಾಗಿದೆ, ಕ್ಷಮಿಸಿಬಿಡಿ’ ಎಂದು ಕೈಜೋಡಿಸಿ ಕೇಳಿಕೊಂಡ. ‘ಹಾಗೆಲ್ಲ ಸುಮ್ಮನಿರಲು ಹೇಗೆ ಸಾಧ್ಯ? ನನ್ನ ಮಗಳಿಗೆ 16 ವರ್ಷ ಮಾತ್ರ ತುಂಬಿದೆ, ನಿನ್ನ ಮೇಲೆ ಪೋಕ್ಸೋ ಕಾನೂನಿನ ಮೇರೆಗೆ ದೂರು ನೀಡುವೆ, ಇದು ರೇಪ್ಕೇಸ್ ಆಗುವುದರಿಂದ ನಿನಗೆ ಕನಿಷ್ಠ ಏಳು ವರ್ಷ ಜೈಲುವಾಸವಾಗುತ್ತದೆ’ ಎಂದಳು.
