ಆಕೆ ಒಬ್ಬ ಮಧ್ಯವಯಸ್ಕ ಗೃಹಿಣಿ. ನಾನಾ ಕಾರಣಗಳಿಂದ ಮಾನಸಿಕ ಖಿನ್ನತೆಗೆ ಒಳಗಾಗಿದ್ದಳು. ಬರೀ ಅಳಬೇಕು ಎನಿಸುವುದು, ಬೇಸರ, ಯಾವುದರಲ್ಲೂ ಸಂತಸವಿಲ್ಲ, ತೃಪ್ತಿಯಿಲ್ಲ. ಎಲ್ಲಿ ಹೋಗಲೂ ಮನಸ್ಸಿಲ್ಲ. ಜೀವನವೇ ಸಾಕಾಗಿದೆ ಎಂದು ಆತ್ಮಹತ್ಯೆಯ ದಾರಿ ತುಳಿಯುವ ಹಂತಕ್ಕೆ ಬಂದು ನಿಂತಿತ್ತು ಆಕೆಯ ಮನಸ್ಥಿತಿ. ಸುದೈವಕ್ಕೆ ಆಕೆಯ ಪತಿ ಸಕಾಲಕ್ಕೆ ಚಿಕಿತ್ಸೆಗೆ ಕರೆದುಕೊಂಡು ಬಂದರು. ಅವಳನ್ನು ನೋಡುತ್ತಿದ್ದಂತೆ ಅವಳಲ್ಲಿನ ಖಿನ್ನತೆಯ ಪ್ರಮಾಣದ ಅರಿವು ನನಗಾಗಿತ್ತು. ಏನಾಗಿದೆ ಎಂದು ವಿಚಾರಿಸಿದೆ. ಕ್ಷಣ ಕಾಲ ಆಕೆ ಉತ್ತರಿಸಲಿಲ್ಲ. ನಂತರ ತುಸು ಸುಧಾರಿಸಿಕೊಂಡು, ‘ಜೀವನವೇ ಸಾಕಾಗಿದೆ. ಯಾಂತ್ರಿಕವಾಗಿ ಬದುಕಿನ ದಿನಗಳನ್ನು ಕಳೆಯುತ್ತಿರುವೆ. ಯಾವುದರಲ್ಲೂ ಸಂತಸ ಎನಿಸುವುದೇ ಇಲ್ಲ’ ಎಂದು ದುಃಖದಿಂದ ಹೇಳಿದಳು.
